السبت، نوفمبر 08، 2008

طقوس

أشعر ومنذ فترة أنني أعاني من خرس كتابي فلا أشعر بالقدرة على الكتابة أبدا وحالة الصمت الرهيب تعتبر في قاموسي أنني أما مستاءة أو أشعر بثقل في الدم فلا أحب أن أثقل به على أحد أو ربما كلاهما معا (يا ساتر ! ) وللأمانة وعلى الرغم من أن أمورنا الخاصة هي أهم ما يمكن أن ننشغل ونستاء لأجله إلا أنني لن أنكر أن
تدهور الأوضاع العامة في البلد تفاقم للدرجة التي يصعب بها علينا أن نتجاهله أو ندعي مجرد الإدعاء بأننا لا نبالي به , إنحدار في المستوى الرياضي والفني , الزحمة وصلت لأقصى حالاتها , الواسطة وعدم تكافؤ الفرص في العمل , تواضع أداء النواب, المزيد من التضييق على حريات الشعب الخ ...كثيرة هي الامور التي تجعلنا نقول وينج يا كويت وحسافة ياكويت ولي متى !؟؟ وكثيرا ما أنقهر وأنوي التحلطم في بوست لأتراجع بعدها حين أزور المدونات وأجد التشاؤم والقهر حالة طاغية على أغلب الشباب فلا أرغب بزيادة الطين بلة خاااالص خاااااااالص أو نشر المزيد من الطاقة السلبية ( جملة ما أعرف شنو معناها بالضبط سامعتها من صديقتي p: )

المهم يا محافيظ السلامة وأنا سرحانة (عبدالبصير ) طرى على بالي الأشياء اللي أسويها بقصد أو بدون قصد لما أتضايق فقلت أذكرها لكم عسى أن تفيدكم أو حتى تخليكم تركزون على الأشياء اللي تسوونها عشان ترفع معنوياتكم وتعطيكم التفاؤل والفرح وبهذا نكون (على قولة رفيجتي ) عززنا الطاقة الإيجابية ( ياربي هذي دورات ال NLP وماتسوي ) المهم إليكم ما أفعل عند الشعور بالقمتة والإحباط ولحد يسألني ليش أو اشمعنى أو إشلون مادري المهم إني دأبت على هذه السلوكيات وأحسست بالفرق... والفرق واضح :



عند الشعور بالإحباط والإكتئاب:


  • أسمع أغانيي المفضلة ...مو أي أغاني... أبلش بالحزين وأوصل بعدها للمفرح وقد يتخللها في كثير من الأحيان أغاني هندية !


  • ألبس أحمر أو أحط حمرة حمرا ...مادري ليش الأحمر معاي صج يعبر ...برج الثور ماكو فايدة


  • أطلع مع رفيجتي ودايما انتواعد بمارينا مادري ليش ! ودايما أصفط بمكان بعيد عنها ! ودايما نقول مانبي ندش زارا صار يلوع الجبد بس ندش زارا ونحوس فيه !!


  • أتسبح ! ريحة الصابون والشامبو إتونس ومادري شنو السر


  • أسوي روحي بقضي الوقت أقرا كتاب ...بعد ما أقرا جم صفحة أشوحه والسبب عدم التركيز


عند الشعور بالحزن أو النقص العاطفي :

  • آكل كاكاو ( أنا لأني مو من محبي الكاكاو أصلا )


  • أروح الصالون أسشور شعري , أقصه , أصبغه , أسوي منيكير وبديكير أي شي مو مهم يعني


  • أروح الجمعية بدون سبب مقنع أو حاجة وأشتري أغراض لي وأحيانا حق البيت


  • أشوف فلم هندي وأبجي ليييين أقول بس وبعدين أكسر خاطر روحي وأنام عقب ...لازم عقب البجي أنام مادري ليش !؟


عند الشعور بالضغط والغضب وحدة الأعصاب :


  • أغيب ما أداوم ...عشان أأدبهم !


  • على طول أطلب لي غدا أو عشا من أي مطعم أشتهيه وغالبا فاست فود ودائما أتحسف عقب


  • أروح غرفتي وأقفل الباب وأحط موسيقى صاخبة و...أرقص


  • أروح أمشي بالممشى


  • أروح السوق أو أي محل وأشتري شي يديد ...على قولة أمي : كل يديد له طربه



ملاحظة : العبارات باللون الأحمر تعبر عن حديثي الداخلي مع نفسي ...مو قلنا الأحمر يعبر



وهكذا أكون قدمت لكم وصفتي في القضاء على الأجواء السلبية أو تخفيف حدتها على الأقل , هل لكم طقوس معينة تمارسونها ؟


















هناك 18 تعليقًا:

حلم جميل بوطن أفضل يقول...

هو شئ واحد. يغسل الجروح و يزيل الهموم و يمسح كل دمعة حزن

اللعب و الطلعة مع الأطفال

تنسيني كل شئ

لا أغاني عوض الدوخي و لا ملابس زارا الداثرة و لا أصباغ جي تي سي و لا روست بيف هارديز !

Sweet Revenge يقول...

يحليلج يا تويته هذا وانت مالج خلق دمج خفيف ,ماشا ءالله عليج يبا انا لي ضاق خلقي يا اطقها بجيه,يا اروح امشي لما ينهد حيلي "تري يقولون ان المشي يفرز هرمون السعادة "الميلاتونين "اي والله اسمه هرمون السعادة ما االف انا
-اكل بيبسي وكاكاو
-اطلع اتسوق واهيم علي وجهي في المجمعات ليما يدقون علي ويقولون لي ردي P:

هلا بردتج يا تويته ويا حلوج ويا حلو طاقتج :)

ma6goog يقول...

أروح الجمعية بدون سبب مقنع

منو يروح الجمعية لسبب مقنع؟

Broke يقول...

طقوسي لا تعد و لا تحصى و بعضها يشبه طقوسك .. ساعات أفكر إني أكتبهم بلستة عشان اذا يتني الحالة ما أفكر وايد بالحل الأنسب ..على طول أفتح اللستة و أختار الأسهل و الأسرع

و أكثر هذه الطقوس فاعلية .. تكون بأي نشاط له علاقة بالبحر .. حتى لو بس أجابله
أما بقية الأشياء فتدور معظمها حول الموسيقى ..القهوة ..العطور ..الأطفال ..التسوق .. الأدب

Mishari يقول...

على طول أطلب لي غدا أو عشا من أي مطعم أشتهيه وغالبا فاست فود ودائما أتحسف عقب


هذا انا ولازم يكووون دهههههن

ماكدونالدز
برجر كينج

او هااردييز علشان انغثثثثثث

7osen يقول...

تصدقين مادري انج عدتي للكتابة والعود دائماً احمد

:)

بوست جميل جداً وممتع
اهم شي انج ابتعدتي عن التحلطم للاوضاع العامة
لأنا وين ما نروح نلقى هالتحلطم بالويه

عجبتني الاشياء اللى تسوينها عند الشعور بالضغط والغضب وحدة الأعصاب

تضحك
بس فعلاً تنفس عن الغضب

واخيراً
يعطيج العافية

وخووش لوك يديد
بس لازم تغييرين الاسم بعد لأن تويتي ماعاد موجود
:)

7osen يقول...

و

حسافة طافني البوست اللي قبله
قريته وحبيته واايد

في جملة وااايد حقيقية انتي قلتيها
بس مابي اقول اي وحدة
لأني انا تأثرت فيها حيل وتأملتها وحسيت انها حقيقة بالفعل


واايد استمتعت بالبوست صج حيييل ممتع
ويجذب بشكل تام ....

يعطيج العافية

layal يقول...

اقعد (بشفتي) هذي تسميتي لغرفتي عشان احس بمزيد من العزوبيه
اطلع اتغدي او اتعشي بروحي
اطلع اتمشي بروحي
ليله مع الطرب واكمله بكاكاو داكن وكاديه
عندي مكان سري اقعد فيه
ابقي بالبيت بالاجازه
اقراء اقراء
ركعتين ودعاء وصفحه من القرأن

Mamloo7a Q8ia يقول...

اهلا اهلا
ومبروك الطله الجديده
شي شي الوريدات شحلاتهم

هههههههههههههههههه
خوش طقوس بنجربها
والله يستر من النتائج
ولهاااانين واااايد
:)

violinist_q8 يقول...

الطقوس غالبا ما تكون وانا مبسوط لول :)

لما يخترب المزاج يصير عندي هدوء
بس قراءة ارشيف المدونه اتوقع انها تكفي لتعديل المود:)

ReLaaaX يقول...

لاتخافين فيه طقوس مشتركه :p

loooool

لا مو فاست فوود .. اكل هندي والا جاينيز المهم شي يسوى ان الواحد يمتن واهوا مستمع فيه



اكثر شي يعدل مودي القهوه وافضل اشتريها او اطلب من احد يسوي لي



وإذا كنت ببجي او بجيت وخلصت يعني المهم متضايقه مرات احب ادق على وحده قراقه تقرق على راسي عشان انسى يعني وطبعا تتخلل القرقه نجره ونقاش يصل إلى ان كل وحده فينا تتمسك برايها عادي المهم تضيع السالفة



وبعد شنو ياربي ؟


لما احس بضغط اروح اسوي شي احس اني قاعده ادلل نفسي فيه واني احتاج فعلا حق هالراحة والاستجمام على قولتهم :)


يعني لاحظت جم شغله مشتركه بس تختلف باختلاف الطاقة السلبية وسببها :p

chatterbox يقول...

عند الشعور بالضغط والغضب وحدة الأعصاب :




أغيب ما أداوم ...عشان أأدبهم !

لوووووووووووووووووووووووول
تأدبيم منو بالضبط؟؟؟؟

Kuw_Son يقول...

هههههههه !! لا تعليق
:P

أهم شي الطاقة السلبية و الإيجابية

Gooosfrapaaaaa :P !

Anger management
its a movie ;)

tweety يقول...

للمرة المليون أعتذر عن التأخير في الرد عليكم وإنشالله يكون الإعتذار الاخير

حلم جميل بوطن أفضل

الله يخليك حق اعيالك ويخلي عيالك لك
أنا ياخوك اليهال يسببون لي صداع لاصار ولااستوى

عوض الدوخي !!!!!!!!! الظاهر إنك وايد مشدق يا حلووووم p:


sweet revenge

حلوه أهيم على وجهي اعجبتني لأني وايد أهيم أنا بعد لوووول
صح انا بعد سامعه عن هالهرمون بس ماكنت عارفه اسمه مشكورة على المعلومة
والله يعطيني المجاجة والخلق للمشي


ma6goog

اهو المفروض إن في أحد يروح بسبب مقنع بس منو مادري !


broke

يختي الراقي راقي وحتى طقوسه راقيه ورومانسية مثله عطور وقهوة وأدب ياسلام


mishari

عاد هارديز صج يغث
بطيني ماكو فايدة منك :pppppp


7osen

ماشالله عليك يعجبني فيك دقة ملاحظتك بالفعل كنت قاصدة الابتعاد عن التحلطم جديا والعودة للكتابة بأمور تعبر عنا وعن مشاعرنا
بس مو قبول الا تقول لي شنو هالجملة اللي مست مشاعرك وحبيتها كيفك

اما على الاسم تويتي فما اقدر اغيره أصلا أنا اخترته مو عشان تويتي ماغيره عشان معنى ثاني

tweety يقول...

layal

مكان سري !!! جنه يبيلي أدورلي مكان سري وعاجل جدا أنخش فيه !


mamloo7a q8iya

الله يستر !!! ياحافظ ليش عاد التشكيك بقدراتنا يا بنية يا حلوة يا كويتية هذا أشكره وأخبره وجدامي تقولين جذي أفا :pp

اي شفتيني وانا موردة أهم شي عيوني المدفنين



violهnist_q8

جان قلتهم جود انسويهم ويحوشنا انبساط
الله يسلمك والله عاد جد جد لي ضاق خلقي أقعد أقرا تعليقاتكم يتعدل مودي وأستانس



relaaax

فعلا فعلا أنا النسكافيه لها دور فعال في تعديل المود خاصة الصبح وتخليني أتقبل الدوام
ولما وايد أتعومس وأعصب لا مفر من المساج في سبا تايم بعد قاعدة أسوي لهم دعاية مجانية شيبون


chatter box

لوووول
إي والله أحس غيابي يأدب مديرووو ومسئوليني لأنج عارفة طبعا إن مسئولينا أهم شي عندهم اتداومين مو مهم شتسوين المهم اتكونين موجودة من الصبح ما تتأخرين وآخر وحدة تطلعين


kuw son

ممكن أطلب مترجم يا افندم ؟

wohnungsräumung يقول...

موضوع ممتاز جدااً....ونتمني لكم التوفيق الدائم
umzug-umzug
wohnungsräumung wien

Entrümpelung Wien يقول...

موفقين ... لكل ما هو جديد و قيم

Entrümpelung Wien
Entrümpelung
Wohnungsräumung
Wohnungsräumung WIEN

الربح من الانترنت يقول...

الف شكر على الموضوع الرائع
التسويق الالكتروني
bookmarks