الجمعة، ديسمبر ٠٨، ٢٠٠٦

ما لا يريده الجمهور

ظاهرة غريبة انتشرت ولا شك أن كثير منكم لاحظها وربما مثلي استنكرها ...ألم تلاحظوا أنه بات مؤخرا من المقرر علينا أن نقرأ يوميا في صحافتنا خبرا من الأخبارغير المهمة لأحد المشاهير من ممثلين أو مذيعين أو عارضات أزياء أو أو ...؟
حقيقة لا أعلم ماهو السر الذي يجعل صحافتنا تتحفنا بمثل هذه الاخبار التافهة والتي لا تهم أحد , فحتى لو كان هناك من هو معجب بأحد هؤلاء المشاهير فربما يتوق لمعرفة أخبار مثل الزواج والانفصال أي الامور العامة إلا أن لا احد يملك من الوقت ما يضيعه بمعرفة أخبار سخيفة ..الطامة الكبرى أن هناك من المشاهير من فرح بهذا الترحيب من قبل الصحافة لكل ما هب ودب من الأخبار فما صدقوا على الله وأصبحوا هم أنفسهم يروجون لسوالفهم ويعلنون عنها ويتنافسون عليها أيضا فأصبحت تطل علينا يوميا بوقاحة مثل العناد ونحن نتجرعها قسرا ونقول بيننا وبين أنفسنا : احنا شكو !!!!!!!؟
منذ فترة لم تخل جريدة في صفحتها الفنية من خبر مفاده أن المذيعة الفلانية ستحيي حفل ميلادها في لندن !( طبعا لأن خلصت الأخبار اللي عندها ) فهذه المذيعة ذاتها لم يبق أمر من أمور حياتها الخاصة لم تعلنه أو تخبر عنه بدءا بالطريقة التي تعرفت بها على زوجها ومن ثم خطبتها وقيمة مهرها ! وفستان زفافها و شهر العسل ومن ثم خبر حملها وإنجابها وربما حتى لون ملابس مولودتها !
والمذيعة العلانية التي تضاهي أبراج الكويت بشهرتها وقيمتها الفنية كما تدعى !!!أيضا لم تعتقنا من تفاصيل حياتها ودلع أهلها لها مرورا بالالوان التي صبغت بها شعرها والخلاجين التي ارتدتها وصورت بها ووصلت للحد الذي سجلت به مذكراتها صوتيا ( الشرهه على الشركة اللي معطيتها ويه ) كي يتمكن الناس من معرفة لون الدبدوب الذي تحتفظ به في غرفتها واسم المسلسل الكارتوني الذي كانت تتابعه في طفولتها! والله إني قريت خبر عنها يقول هذا الفستان اللي المخرج ما اختاره في إعلان عطرها !!! بذمتكم هذي سالفة عاد !؟ يعني ما اختاره المخرج تحسفت فلازم اتصوره واتراوينا اياه الحمدالله على نعمة العقل
في السابق ( ولازال في بعض الدول الاجنبية ) الفنانين وغيرهم ممن هم في دائرة الأضواء يرفضون الحديث عن خصوصياتهم بل ويحيطونها بمزيد من السرية والبعض يتهرب من هذا الأسئلة . وكان اللوم يقع دوما على عاتق الصحافيين الذين ينتهكون حصار الخصوصية بيد أن في هذه الايام انقلبت اللآية وأصبح هناك من يعلن عن أدق تفاصيل حياته الخاصة والتافهة وغير الهامة دون أدنى مشاعر خجل أو حياء .
قد نتجاهل الموضوع لو كان الأمر مجود خبرا عارضا ولكنه اليوم يكاد يصبح إعلانا تتناقله جميع الصحف والترويج يتم بمباركة ومبادرة من الفنان نفسه !!في أغلب الأحيان
بعض المخضرمين من المشاهير حين يسمح بالحديث عن حياته الخاصة ويسرد ذكرياته وغالبا يتم ذلك بشكل مسئول وبضوابط معينة فهو عادة لهدف الافصاح عن بعض الجوانب في حياته والتي كانت تتطلب ربما صبرا أو تحديا خاصا فهي بذلك تكون بمثابة العظة والعبرة لمن يود أن يسير على نفس المسار وبالطبع لا بد أن تكون سيرة بها ما يستحق أن يذكر , هنا فقط نشجع أن يزاح الستار عن بعض التفاصيل في الحياة الخاصة للفنان أو الرياضي أو المذيع وغيرهم , أما غير ذلك من أخبار لا تودي ولا تجيب فهي أمور لا معنى ولا هدف لها ولا أعتقد أن هناك من يهتم بمعرفتها من عدمه . فيا جماعة يا مشهورين إحترموا أنفسكم وضعوا حدودا لحياتكم كي لا يتجرأ أحد على انتهاكها والتطاول عليها , فأنتم بذلك لا تقتربون من الجمهور بل تجعلون من أنفسكم مهزلة وأضحوكة ...كفاكم فشخرة على الفاضي وياريت تهتموا بالترويج عن أعمالكم وتجتهدوا بها بدلا من ذلك ..فالنجومية ليست صفة تكتسبونها بالولادة بل تتصفون بها مؤقتا عندما تقدمون عملا مميزا ولا تتصفون بها ثانية إلا إذا واصلتوا تقديم الاعمال المميزة , فرحمة بنا كفانا مغثة من أخباركم التي لا يستمتع بها سواكم .

هناك ٣٧ تعليقًا:

Kuw_Son يقول...

في الدول الغربية .. الخير ينباع بذهب .. البباراتزي يتعب علشان يصور لقطة لفنان أو نجم و يعيش من وراء بيعها ..

هني السالفة أشكرة و عينك عينك !! الجريدة أو الصحفي ما يتعب في الحصول على الخبر .. مجردد يدز مسج أو اتصال خفيف .. و الفنان أو الرياضي أو اللي هو يخر الحجي و أهو مستانس ..

صج .. إذا لم تستح فاصنع ما شئت ..
و رحم الله امرئ عرف قدر نفسه ..

و شرهة والله على الجمهور اللي معطين ذيج المذيعة السخيفة وجه و إهي تتكلم عن نفسها و نفنوفها !!

موضوع شيق و مهم .. الله يعطيج العافية

Kuw_Son يقول...
أزال أحد مشرفي المدونة هذا التعليق.
Kuw_Son يقول...
أزال أحد مشرفي المدونة هذا التعليق.
Kuw_Son يقول...

sorry for that problem with the post .. please delete el mokarar

Unknown يقول...

قوة
شوفى لله فالله انا عندى مع الفنانين كره احس انهم واطين ومجتمع فاسد
مع وجود بعض الاستثناءات
مثلا كنت احب محمد السريع ويها طيب الله يرحمه
ما علينا
كنت اقرى كتاب من زمان عن اساسيات الاعلام
بالكويتى اعطيج اياها اللى فهمته
لكل ساقطة لاقطة
وبما ان مجتمعنا سخيييييييييييييييف
فشئ مهم جدا جدا جدا
ان مثلا المذيعة البست
والا طارت
والا انتحرت
او الفنانة تزوجت
او تطلقت
او لقوها سكرانة
او طلعت متزوجة عرفى
يعنى كل ماشى
وعلى قولة عبادى
كل ماشى يا حبيبى مالى فى الطيب نصيب :))
تحياتى

Alia يقول...

أما سالفة احتفال المذيعة ماغيرها بعيد ميلادها في لندن .. فخبر عجيب وحده ما له داعي .. وانا استغربت وامتعضت مثلج لما قريته .. ناس فاضية

لا يكون عبالهم صج مشاهير؟؟؟؟

KQ8 يقول...

وآدي أعده..مره ثانية

صدقيني اذا قتلج صارلي مدة افكر في هالموضوع..كل ما افتح صفحات الفن بالجريده القى مذيع/مثل/مغني /مش عارف ايش...يديد..قبل إنعيب

على مصر من كثر الفنانين اللي يطلعون عندهم صرنا اضرط منهم..!!

وجوه ما اعرفها..ويقول انا فنان..زين وين مثلت / غنيت/أذعت...ماتدرين تسمعين اسم مسلسلات دايخه على قولتهم لوبدجت..ويقول مثلت تلقينه

كومبارس ولا طلعله مشهد ولا اثنين وصار فنان ..ياخي فن لما يديك على حنطور عينك..بلا قرف..!!

بخصوص المذيعة ايها..الظاهر والله اعلم عندها عقدة نقص مستحكم..يمكن لأن الريل فيه مشكله فنية..ولا اهي ماصدقت على الله اتزوج..شنو

يعني رايحه لندن..مالندن صارت مثلات سوق اليمعه..اللي ماعنده شغل يروح لندن...!!!
هفت لايمج حتى هفت لايمج...!!

اما بخصوص اميرة الغنج والدلال..

سليلة الحسب والنسب..

قاهرة الجياكر وكاسرة المياكر...

صاحبة الصوت الشجي والنَفَس السخي..

دلوعةالشاشات مغيظة الجيكرات..

مفرقة الازواج عن الزوجات..( بعد تبين ولا بس)..

فما اقول ما شافت ريال يشكمها..ويسنعها ويخليها تصير مره..

اللعن آبو الرجوله اللي تخلي الواحد طرطور..مرته..!!!

هالنماين من اللي طرحيتهم..بدون إعلام يموتون..مايقدرون إتنفسون من غيره..فعلشان جذيه تلقينهم بكل مقز ابره..بعكس مثل ماتفضلتي..الفنانين الاجانب..هذول اعمالهم تسحب لهم الاعلام...مو العكس مثل ماعندنا...!!!

7osen يقول...

كلامج عدل بالعموم

والمذيعه الاولى

انا قريت خبر انها تقيم عيد ميلادها في لندن

اول رد فعل كان كلمه
واحنا شكو

صج والله شي يضحك ويبط الجبد

لكن المذيعه الثانيه

كل شي تسويه حلو
ولايق عليها

وااايد ناس يهمها تعرف عنها كل صغيره وكبيره

حتى لو كانت تبالغ احيانا
لكن حتى المبالغه لايقه عليها
وحلوه منها

المشكله بللي محد مهتم فيه ويحط حق نفسه اهتمام

ام الحفيز يقول...

تويتي

اولا السلام عليكم جميع...وعساج ماتفقدين غالي ياحياتي يا تويتي ومشكوره على الزياره

وموضوعج ينطبق عليه المثل رزق القطاوه على الخاملات...بعد ماتعرفيين البابارازي..الي ودروو جنت الملكه ديانا....هذول هم نفسهم بس نسخه عربيه والي يكتبون عن الممثلات والفنانات وقطيعه المذيعات ما عندهم عمق ثقافي ولا ادبي فاسهله يقابلهن شنو كومكياجج ولا شتاكلين واخر دور وشسم شحاطتج وشتبلعين الصبح وزيائج الله يزيد النعمه منو مفصلهم تزوجتي لو بعد عندج اعيال وابأي صف وليش اطردوج من روتانا وليش انثبرتي بالاوربت....الخ سخافات وبسخافات وكله بصوب والبووزات بصوووب الحمره جنها بالعه جبده والكحل حاطته بمحقان والويهه لو تقرفين بقفشه ماتوصلين للجلد خلووووووووووووه ويقولون قدوه في المظهر ويــــــــــــــع عليهم وعلى من قابلهم والله لو فجييين مخهم تلاقينه يديد بقراطيسه مو مستعمل ابد
وما اقول الا الله يستر على جيل حالـــــــــيمه

sologa-bologa يقول...

الشي الجميل
اني لما قريت التعليقات
لقيتها كلها تنتقد هذي المذيعة اللي بتسوي عيد ميلادها في لندن
يعني الغالبية قرأوا الخبر

على فكرة
موضوع أخبار الفنانين أو المشاهير وحياتهم الشخصية
موجود في صفحات العالم كله
مو بس بالكويت

يعني هذا أمر طبيعي

لكن الرك كله على الصحفي كيف يتناول الخبر

يفترض ان للصحافة دور مهم في تنمية المجتمع
لكن شنسوي اذا كان الصحفي يترزق من ورا هالاخبار
وصاحب الجريدة يحقق توزيع أكبر
والتوزيع يكثر الاعلان
يعني ربح أكبر من وراء هذه الاخبار


أنصح بمشاهدة الفصل الثاني
من مسرحية حامي الديار

رئيس التحرير:أبي صورة الغلاف للراقصة شوشو وهي مضطجعة


وتحياتي

DiLLi O MiLLi يقول...

ههههه...عرفت المذيعه ، بس شوفي روحج قريتي الخبر وعلقتي عليه معناته عطيتيه أهميه
:)
شوفي يا حبيبتي هذي الأخبار لها قراءها فاللوم ليس على الجرائد بل على الناس اللي تهمها هالأخبار !! تدرين شلون عرفت أسمها ... وحده بالدوام تفتر على ربعها بالجريده وهي تقول شفتوا المالقه أمسويه عيد ميلادها بلندن ما بقى أحد ما نقز وخمط الجريده عشان يقرى الخبر
:)
أرجع على سالفة الأجانب وتنحشهم من الصحافه... اللي ينحاش منها عرفي أنه ممثل وصل القمه من الشهره يعني أي خبر عنه بالجريده ما يهمه ... وبعدين الأجانب هذيل مااا ألوهم الباباراتزي حتى وهم بحمامات بيوتهم صوروهم ... والباباراتزي ما ينلام أذا راح أيحصل الملايين من الدولارات للصوره اللي ياخذها !!ء
ذكرتيني بسالفة وحده من صديقاتي اللي قرت الخبر اللي يقول أي مصور يقدر يلتقط أول صوره للبيبي مال أنجلينا جولي وبراد بت له 4 ملايين دولار ... فصديقتي تقولي ها شرايج ناخذ الكاميرا ونرووح أندورهم هذي 4 ملايين 2 لج و 2 لي هههههه
:)
وربعنا الفنانين محد يدري عنهم فتلاقينهم يتصلون بالجرايد ويعطونهم أخبارهم يعني "حسوا فينا حسحسونا ، ناسينا ناسيناااا"ههههه
:)

sOulvOice يقول...

@@ tooOTO


اشتغلت حاسة الفضول عندي منو المذيعه ام عيد ميلاد بلندن؟؟




شوفي حبي شفت لقاءات قديمة حق ممثلين وفنانين قبل تحجو عن حياتهم الخاصة وتفاصيل ولكن ماكان هم الصحفيين بذيج الايام الحياة الشخصية بقدر اعمالهم وكذلك الفنانين ماكانو محبين للبهرجة والتحدث عن الذات مثل ايامنا الحالية


بالنسبة لي ماكو مشكل خل تتحجي عن حياتها بالعكس احنا هم ترى فينا هالفضول من ناحيتهم ولكن كنا نتمنى منهم مايغرقووونا بتفاصيل التفاصيل لان فعلا شي ممل اقعد اقرى لقاء ثلاث ارباعه عن سفرتها ونومتها وقعدتها


بالنسبة حق حلومة وايد اتكرر احاديث وهذا اللي امخرب عليها يعني بكل لقاء ان دلوعة بابا وماما وانزين لي متى يعني!!!



نقطة ثانية


اشعر ان الاغراق بالتحدث بالامور الشخصية بعض المرات يجرىء الجمهوور عالفنان ويضيع هيبة المذيع او الفنان






مشكورة حبيييي وبقولج شي كان عندي حدس انج بتكتبين شي من هالقبيل عقب ماشفت لقاء فوفوو دريع

Mamloo7a Q8ia يقول...

والله يالغاليه ناس فاضيه وما عندهم سالفه ويحبون الظهور وفيهم نقص شديد يحتاج علاج نفسي مكثف
انا اعتقد انهم يدفعون حق الجرايد علشان تحط اخبارهم
وانا صار لي فتره ما افتح الصفحه الفنيه في الجرايد علشان ما بحوشني تلوث بصري من الاشكال الغريبه اللي يحطونها وعلشان ما يرتفع ضغطي من السخافات اللي يكتبوتها مثل هالسخيفه اللي بتسوي عيد ميلادها في لندن
احنا شكووووووا
حسبي الله ونعم الوكيل فيهم ارفعوا ضغطي
يلا توييتي وديني لندن انزل ضغطي
هههههههههه

tweety يقول...

kuw_son

الله يعافيك ويخليك
قلت كل اللي بقلبي

ماعليك مسحنا المكرر بس انت الاول لا تخاف :p
لا تحرمنا تعليقاتك


kitty

اي والله ظيم وظلايم
يعني أخبار شخصية وتفاصيلها بلعناها بس أخبار جذي !! مالها لون ولا كيف
يعني هذي اللي مصورين ولادتها بالله شنو الهدف من هالسالفة !؟ محد ولد غيرها !؟ والا ولادتها غير مثلا !!!؟
ربنا لا تحاسبنا على ما فعل السفهاء منا يا رب


mishari

أولا أنا عكسك أحب الفن وأتابعه بس أؤمن أن هناك فرق والفرق واضح بين الفن نفسه وفنانين هالايام , يعني السريع الله يرحمه كان فنان بكل معنى الكلمة حتى أدائه محد يشابهه الحين الا ماغير صراخ وكلام فاضي

ثانيا : ترى انا ما أحب اللي يوعد ويخلف ايييييي مو تقول ناطرة الكتاب
:p

ثالثا : لوووول
موتني من الضحك , اي والله مو اهي لو شي خاص جان اوكي بس شي يفشل وماله معنى والله في شغلات قريتها ما تنقال حتى بين رفيجات وماني قايلتها اخاف اخش الحياء على قولتك ومع هذا للأسف منشورة بالجرايد واهي أقل كلمة ممكن توصفها : عيييييييييب ,والمصيبة ان المذيعة اهي اللي قايلة هالحجي عن روحها !!


alia

شفتي !!!!!
والمشكلة ما ظل جريدة ما حطت الخير !!
اشدعوه !؟ جان سوت مؤتمر صحفي بعد وشرحت تفاصيل زيارتها الميمونة حق لندن ! وتأثير هالزياره على علاقات الصداقة بين الدولتين


krakatoa

لول
انت من تقول وادي قعدة يكون تحليلك أروع من الروعة :p
اي والله صدقت يعني الحين منو اللي ماراح لندن !؟ بعدين احنا شالمطلوب منا بعد ما نعرف مثل هالخبر يعني ابي افهم !؟

اما الثانية : فلاااااا ظلمتها ماعطيتها حقها صراحة , تزعل علينا أبراج الكويت عقب !!

مو اهي هذي الزبدة احنا مانبي ناس اتطل بالجرايد عمال على بطال في ناس موهوبين وجادين بالفن او في مجالاتهم ويستحقون تسليط الضوء عليهم وعلى انجازاتهم , سالفة وحدة تدلعت والثانية صبغت شعرها احنا شنسوي لها يعني !!؟


7osen

انا اولا كتبت عن الموضوع بشكل عام يعني مو محصور بأشخاص معينيين بس حطيت هالامثلة لأنها الابرز
ثانيا : واضح انك تحب المذيعة الثانية وهذا حقك بس مسألة كل يوم حاطين عنها خبر تافه عن نفنوفها والا شعرها والا دلعها هذا وان كان مقبول عنك او عند غيرك بس ما هو شي صحيح , يفترض التركيز الاعلامي والاخبار على عمل الفنان او الاعلامي او الرياضي وماتكون الصحافة بهذه الدرجة من السخافة لإيصال مثل هالنوع من الاخبار اللي ما لها فايدة من اي نوع على القارئ
مسألة كل شي لايق عليها أتفق معاك , كل شخص تصرفاته اللي تصدر منه تلوق عليه حتى السخافة والغباء فهي لا تصدر الا من شخص سخيف وغبي
والاناء بما فيه ينضح
وتأكد لو كان الشخص مهم فهو لن يحتاج للترويج عن نفسه أعماله تتحدث عنه


أم الحفيز

يا هلاااااااااااا
تو ما نور البلوق ...وين كل هالغيبة عنا !!؟ جانها ظروفج رضينا

والله صاجة كلامج كله عدل ولا غبار عليه
اي قدوة !!! حدوة ممكن
:p
لا لا تحاتين ما طار طير وارتفع


sologa bologa

ومنو ما قرا هالخبر !؟؟؟ أقولك حاطينا بكل الجرايد يا سلوقا !!
أتفق معاك ان هالامور موجودة بكل الدول بس عاد احنا بزود ومصاخة أكثر

وهم أتفق ان المسئولية تقع بالدرجة الاولى على الصحافة اللي فاتحها بيبانها حق كل من هب ودب ومشجعة على هالنوع من الاخبار التافهة اللي مالها معنى
لووول
اي ذكرت المشهد
الحين كلهم صورهم مسدحين حسبي الله على ابليسهم تقول ميد مسموم
:p

7osen يقول...

شيء صحيح ان السخافه والغباء ما تصدر الا من شخص غبي او سخيف

لكن ما اعتقد ان كل شخص التصرفات اللى تصدر منه تلوق عليه

وهذي المشكله

انا برأيي ان شخصيه مثل هالمذيعه
شيء طبيعي ان الصحافه راح تكتب عن ازيائها او تسريحة شعرها
لسبب بسيط جدا
هو ان اغلب البنات تحاول تقلدها
فا يكون هذا الموضوع ماده دسمه
تحقق من خلاله المطبوعه اكبر قدر من المبيعات

شكرا لج
واسف على الاطاله

tweety يقول...

dilli o milli

أنا ضد هالفكرة إن إذا تكلمتي عن موضوع يلفت النظر يعني هالموضوع مهم , لأن أشد ما يلفت الانتباه هو الامر الشاذ وبالتالي من حقنا أن نقف عند هالموضوع ونقومه ونستنكره أو حتى نرفضه ليش نصير سلبيين مالنا راي ! بما الموضوع عام تم نشره لابد من توضيح آرائنا كي لا نسمح بتزايد مثل هذي الظواهر الشاذة
انا شخصيا ما أقدر ألوم الناس يعني دام الصحافة قاعدة تقدم لهم هالاخبار يوميا مع وجبات الاكل يعني ما عندهم بديل يتكلمون فيه , شفتي احد عطى أهمية حق كتاب أو ندوة أو حتى تعب روحه في تحليل عمل أو مناقشة موضوع فني له فايدة !؟ اذا هذا الموجود الناس مضطرة اتكلم عنه


soulvoice

سوسوووووو
اشتعطيني وقولج :p
علميني اشلون أحط أغنية ترى ليلحين ما عرفت :p
اسمها يبدأ بحرف الميم

انا هذا قصدي احنا كلنا معجبين بفنانين وانحب انعرف أخبارهم بس شي عن شي يفرق ..يعني أخبار نفنوف والا لون شعر والا عيد ميلاد ودبدوب وغيرها هذي مالها معنى ولا هدف
أتفق معاج بالشق الثاني تماما أساسا اللي ما يحترم خصوصياته الناس ما تحترمه ويطيح من عينها

عاد هالحلقة بالذات ما شفتها كنت كاتبة الموضوع قبل بس سمعت أن الحلقة عجيبة لووول


mamloo7a q8ia

والله يا مملوحة أني أحب تعليقاتج لأن مصطلحاتج اتينن لوول , خاصة علاج مكثف صاجة يبيلهم 250 جلسة وكل جلسة 189 دينار :p
أفااااااا عليج
امشي خنروح لندن بس اول نكتب اعلان سافرت الفتاتان الجميلتان الى ربوع لندن للتباحث في شئون الضغط المرتفع وموضوع اسقاط القروض !!


commentor

i know what u mean and i agree with that bas eljamal nesby wenas athwaq yemken fi nas 3endhum ehy mot el7amar
wc in my blog

tweety يقول...

7osen

انا فاهمة قصدك عشان جذي أقولك الرك على الصحافة يعني برايك هذا شي صحيح أكتب عن مكياج ونفنوف عشان الناس يقلدونها !!؟ هذا ضعف في صحافتنا الفنية
ولو تذكر نفس سالفة نرفانا سووا منها شي جنه محد يعرف السنع باللبس والمكياج الا اهي والحين نفس الشي , وهم هذا مو صح لأن اللي بعض الناس يشوفونه ذوق وجمال يشوفونه غيرهم هلاقة مثلا ! فالمفروض ما يكون التركيز بشكل اساسي على شكل المذيعة او الفنانة وأخبارها الخاصة أو تفاصيل حياتها

ولا اتأسف البيت بيتك والمكان مكانك
حياك الله بأي وقت قهوة جاي بارد
:p

Unknown يقول...

اهم شي اخبار الراقصة شوشو

ويا مدير التحرير نزلها صورة وهي مضطجعة

----

من مسرحية حامي الديار

Unknown يقول...
أزال أحد مشرفي المدونة هذا التعليق.
sOulvOice يقول...

امرك يا قميل


جيكي ايميلج حياتو

SAJA.S يقول...

الغلط في اللي معطيهم ويهه ومخليهم مشهورين .. ويتكلمون بالفاضي
الحمد االله انا ماني مالت جرايد فنيه ولا برامج فنيه .. علشان ما احر نفسي واضيع وقتي في اشياء تافهه .. مثل من وين ريتي هالنفنوف والا وين رحتي والا اسأله سخيفه والاسخف مقدم البرنامج والفنان الضيف السخيف اللي ما يهمه شي الا انه يتكلم
اسخف برنامج فني واللي ما ادري ليش معطينها افضل مذيعه عربيه
هاله سرحان وبرنامجها

ام الحفيز يقول...

تويتي
يابعد عمري ماتفقدين غالي ياختج قاعده ازهب حق البر ...بنطلع ان شاء الله بالعطله مع العيلااااااااان والله يعوده علينا وعليكم باليمن والبركات خوش اشته شتانا هالسنه الله يتمم علينا الامن والامان وراحت البال....ياختي انتي طول عمرج واصله وماتقاطعين الله يطرح فيج البركه يا اعيووووني

the tooth.fairy يقول...

تويتي

مالك ومال الناس؟
:P

ليش امناشبة خلق الله ؟؟

لووول

الله يسلمج عندما تنتهي الأخبار وتصبح مستهلكة لا مفر من السخافات

تخيلي وحدة من رفيجاتج تدق عليج كليوم وتسألج شخبارج و شنو يديد؟

لو تلاحظين ماكو شي يتغير الا تفاصيل سخيفة

غير عن جذي احس ان صار ماكو خصوصية انعدمت مولية

بس ناقص انعرف ..... هذا اذا مانكتب اب احد المجلات

باختصار

ماعندهم سالفة

بس جاوبيني ليش امناشبة خلق الله؟؟؟؟

:PPP

esTeKaNa يقول...

اهي وقفت على الفنانين؟
اليوم قريت بالجريده خبر صج ضحكني
بنص الجريده
لا يم المواضيع الاجتماعيه ولا بالصفحة الاخيرة،صورة ياهل واعلان ملون ومكتوب فيه فلان الفلاني اقام حفله عيدميلاد بنت اخته ...على شرف جدتهم
!!
وانتهى الخبر
عسى دريتي؟
عسى بس وصلكم الخبر؟
يعني بللله شنو المهم
!!!
غير الصور اللي بناتنا متعكفين وهذي تخرجت وهذي نجت وهذي شاركت
فاذا البنات والشباب اللي ماحد يعرفهم قاعدين يسون جذي
فمابالج بالفنانات ..اذا صح الاسم انهم حقا فنانات
!!

Cr8ivia يقول...

هذي من السخافة الله يسلمج !!

و الا هالزنكوي ما تستحين على ويهج تقولين جم مهرج و شنو عطاج و شرالج عشان الزواج ! بيعه انتي !!

و الثانيه عاد حدث ولا حرج قطيعه

المشكله مو فيهم .. المصيبه باللي يتابعهم و معطيهم ويه

ليش مذيعينا ز فنانيينا اللي قبل يرفضون التدخل بحياتهم الخاصة؟ و لا احد يدري عنهم شي؟
و اهمه قمه في النجاح
الدنيوي طبعا

حسام بن ضرار يقول...

اعتقد ان مستوى الخبر له علاقه بمستوى فكر من غطى الخبر نفسه

ح. ب. بتحج

واحنا شعلينا؟

Mohammad Al-Yousifi يقول...

طنشي هالأخبار

انا ما اقراهم او بس اقرأ العنوان و أطوف

Яeema يقول...

حاطين هالأخبار لأنهم ماعندهم شي يقولونه


أشونه ما أقرا جرايد


تدرين إن مرة يسألني مستشار عندنا يشتغل ، يقوللي ها شنو آخر أخبار الديرة

جان أقوله و الله إن لا إسم وزير أدري عنه و لا إسم عضو مجلس ذاكره ويهه

أنا ما أعرف إلا نوعين من الأخبار
أخبار الديرة إللي بسافر للسياحه فيها

و أخبار الطقس

هههههههه

و مريحه بالي

ReLaaaX يقول...

loooooooooooool


الله يقطع ابليسج ياتوتوووه


وااااي بالضبط الموضوع كان يحوووس بمخي


تبين الصج .. آنه لما اتصفح الجريدة مااطل بالصفحة الأخيرة بس ادور جان فيه مقالات صجيه والا هالاخبار بس اشوف عناوينها انئرف .. وصفحة الفن يالله من فضلك هاذا عاد حالها حال صفحة الرياضه والاقتصاد تشوفيني اقدر جم صفحه واقلبهم مع بعض :)



وبلا غثى وعوار راس ^_^



صراحه الشرهه مو عليهم الشرهه على الجرايد والمجلات اللي تهمها هالاشيا التافهه !؟

KQ8 يقول...

بدنا شي جديد

yokin2007 يقول...

صح لساااانج
تونى كاتب من اسبوع ان الى بتروح الحج
الجرايد صفحات الفن الى فيها و والفنانين
خمة بقعة
الا من رحم الله
وتسلم ايدك على ما كتبتى

tweety يقول...

3ajel

الحين الكل مضطجع حسبي الله عليهم ما فيه صورة سنعة وطبيعية


soulvoice

ليلحين اعاني من جهل
ارد لج خبر بالايميل


smile

اي والله صاجة
انا احب اتابع البرامج الفنية بس للأسف مستواها بالعالم العربي غير مشجعة أبدا وفي انحطاط والمستوى الاعلامي حدث ولا حرج


ام الحفيز

اي والله شتانا مال بر
الله يجعل أيامكم كلها يمعة ووناسة وديري بالج على العيلان
الله يبارك بعمرج ما سوينا الا الواجب


the tooth.fairy

انتي ليش مناشبتني !!؟ لوول
تدرين فيني لازم أتحلطم وانتقد الظواهر السلبية في المجتمع
اشرايج فيني ؟ ;)


estekana

يا سلاااااااااام !! اهم شي انه على شرف يدتهم
اهو نعترف ان السخافة متفشية والصحافة مسئولة بشكل مباشر وبقية وسائل الاعلام المعتمدة على التطبيل , ربنا يشفي


cr8ivia

والله ان هاللي قلتي عنها مسوية مقابلة اتفشل ومجاوبة عن أسئلة تتعلق بشهر العسل مادري اشلون ناشرينهم لأنهم بمنتهى التفاهة وقلة الحيا انا ما ذكرت الاسئلة لأنها فعلا فعلا اتفشل

اجابة سؤالج : لأن اللي يحترم نفسه بعمله وسلوكه وتعامله يفرض احترامه


حسام بن ضرار

بالضبط
وأضيف من يروج لهذه الاخبار
خبرك هالايام صايرة موضة الفنانين اهم يعطون تقريرهم اليومي للصحفي السكة اللي تابعهم


killa ma6goog

مو شسوي !!؟ أنا ما اواطن أخبار السياسة ولا الاقتصاد قلنا نشوف الفن طلع الفن عندنا مسخرة للأسف
انا قايلة بتعلم اوردو واقرى جرايد هندية احسن لي


reema

والله زين اتسوين ..شارية دماغك
لأن فعلا الاخبار كلها ما اتشجع على المتابعة وعلى مختلف الاصعدة
ماكو الا انقاطع الاخبار


relaaax

اشوه يعني مو يس انا اللي اقلب الصفحات ولا أقرا !! أنا عبالي مخي مو قادر يركز والا انا فيني بلا ..اثراها حالة متفشية الله يعينا عذا بعد ما طلعت الجرايد اليديدة ...الله ياحنا بنشوف علوم


krakatoa

انشالله طويل العمر
بس انا حاشتني حالة اكتئاب شتوي على كسل فالسموحة


yokin 2007

الله يسلمك
صج مصخوهااااا انغثينا منهم
ما خلاص انا فاض بيا ومليت

Nora يقول...

انا انصعقت لما تصفحت مجلة طايحة فبيت يدتي .. الا صوور شهر عسل هالميم
!!!!

و ترى ما تلبس مايوه الا بره الكويت

استغفر الله .. شالمستوى الاعلامي شالتسويق الساقط

big fat YUk !

ميموو ما كان لها صوت ينت و انهبلت من عقب شطحاتج انتي يا حلوووومة

الحين انا محتارة .. ودي اعرف شنو الاحتراف اللي وصلت له .. ما شتفها الا فبرامج مسابقات
!!!

و جلسات غنائية اظنتي
!!

جيزيل خوري بكل العقلية اللي فيها ما قالت عشر اللي قالته حلحل !!

تبين اللي عاد صج صج تضحك .. ما عليه طولت بس بقوول

;P

اللي حاطه خبر انها برحلة في شرم .. و تيمعوا حواليها معجبين عبالهم اهيا
.
.
تاليا
ما غيرها

لووووووووووووووووووووووووول
طبعا هالفنانة مو كويتية .. ما عمري شفت لها عمل الا رمضان اللي طاف بس

.
.
اخر ملاحظة

شنو في بالحوار معاهم غير انا دلوعة
!

ميموو .. سألينها شنو الشبه بينج و بين دور رانيا ؟

والله ما انسى ردها
.
.

شبه كبير
فهي ذكية جميلة دلوعة تحب الموضة ههههه

brain wash isn't it ??

الاء سعود المجيبل يقول...

باختصار...

سخافة...!

الاء سعود المجيبل يقول...

باختصار...

سخافة..!

tweety يقول...

a7la eng

اي والله صاجة يا غثهم ويا غث دلعهم الماصخ اللي مو مستفيدين منه

q8ya

بالضبط واحنا المبتلين فيها

Unknown يقول...

When you are being guaranteed 24/7 Customer Care and life time replacement then don’t think twice any time you Buy facebook reviews from a service agency. buy facebook 5 star rating