الاثنين، أغسطس ٢١، ٢٠٠٦

help

موضوع عال قلبي من فترة ومحيرني , أفكر فيه وايد وكل اللي حوالي طقت جبودهم وانا أكلمهم عنه وأسألهم , من فترة وأنا أحس أني مو مرتاحة في شغلي ومحتارة في أني اطلع أو أتم على مينوني وأتحمل الظيم والظلايم , قلت تشاركوني بنصايحكم وخبرتكم
عشان أنقل لكم الوقائع بإمانة راح أذكر المزايا والمساوئ وآراء الأهل والاصدقاء
المزايا :-
  1. المرتب عالي نوعا ما
  2. وقت انتهاء الدوام جيد مقارنة بجهات أخرى
  3. كفائتي في العمل ( احم احم ) الناتج من الكراف جعل تقديري عند المسئولين المباشرين ممتاز
  4. قرب الدوام من المنزل

أما المساوئ :-

  1. احتكاك مباشر بالجمهور من خلفيات وثقافات مختلفة وتبعات ذلك من ضغط عصبي ونفسي وازعاج و صداع مستمرولوعة جبد ومغثة
  2. تدوير كل جم شهر في مكان أي انعدام الاستقرار
  3. ما أبالغ اذا قلت مافي راحة
  4. انعدام الخصوصية لأن العمل بين الناس كالتمثيل في مسرحية الكل يتفرج
  5. تكرار المعاملات وانعدام التطور الوظيفي الى اشعار آخر غير معلوم

أما الآراء الحلوة اللي سمعتها جراء حنتي وتحلطمي كانت كالتالي :-

الوالد : طبعا الكلام اللي معناه أنتوا جيل ما اتحملون ,و مكان اتعرفينه وتعودتي عليه احسن من اللي ما تعرفينه , والراتب جيد ( مع اني ما اهتم لها الموضوع بالمقارنة براحة البال ) كا رفيجاتج ماحد شكا منهم شمعنى انتي !؟

الوالدة : واللي يا بنيتي الظاهر مسوين لج شي على هالدوام والا حاسدينج ومخلينج تكرهينه ! لوول مع انه قريب من البيت ( اهم شي عند أمي ) بس اللي يريحج انتي كيفج

أخوي : طلعي بس حطي في بالج احتمال تندمين ! أو تشتغلين في مكان مافي شغلل ملل واتصيرين مثل هالبنات اللي ما يسولفون الا عن اللبس والميك أب

صديقتي 1 : انا اهم شي عندي الراتب بس انتي دام مو مرتاحة طلعي لأن الشغل بتظلين فيه طول عمرج

صديقتي 2 : أنتي دلوعة ( بغيت أكفخها لأنها تدري اشكثر أكرف والمشكلة في الكويت كلما شافو أحد يشتغل عدل اكرفوه زيادة بس ان كان صاحبك عسل ) ا

ما أدري ليش الناس دايما تفكر في الراتب بالشكل الأول والأخير ويستغربون لما أحد يقول أنا ما أتحمل طبيعة العمل هذي أو ما أحبها , مع اعترافي ان المادة مهمة بس مو لهالدرجة ! أنا من الناس اللي اشوف راحة البال وحب العمل اهي الاولويات , صراحة مابي أشتغل في مكان بدون نفس

هل صار الطموح والرغبة في تطوير القدرات والعمل في المجال الذي تحبه من علامات الدلع والترف وعدم تحمل المسئولية !؟

أنا أميل أكثر لأني أطلع وأشتغل في مكان ثاني , وأقول الواحد يندم على شي سواه أحسن من انه يندم على شي ما سواه

but i don't wana make the wrong choice

محتاجة رايكم ..هالمرة تعليقاتكم مو مجرد مشاركة أو تفاعل على بوست أكتبه ممكن تكون سبب في إتخاذ قرار مصيري وفي حال كان رايكم بالعمل في مكان ثاني عطوني إقتراحات وين ممكن مثلا !؟

مع الاخذ بعين الاعتبار :

  • ساعات العمل فترة وحدة مو صبح وعصر
  • مايكون المكان اليديد في ناس هيلق وانتوا فاهمين قصدي ماله داعي أوضح بس في بعض الوزارات تحديدا فيها موظفين ما يتعاشرون
  • يكون عندهم باركنج أحط سيارتي لأن بالصيف ماعندي استعداد أنشوي وانا رادة البيت

لووووول الحين بتقولون طرارة واتشرط , لا جد محتاجة حق نصايحكم لأن الموضوع شاغل بالي وايد

هناك ٣٨ تعليقًا:

QiYaDiYa يقول...

هالنوع من القرارات صعب جدااا ..

و صراحة الله يعينج !


من مدة قصيرة مرت بتجربة مشابهه تقريبا ..


اذا انتي مو مرتاحة من المكان غيري مكانج احسن ..

و راح تحققين ذاتج بالمكان الي تختارينه ..

استخيري ..

رايي : غيري دوامج =)


و الله يوفقج و ييسر لج كل امورج =)

sologa-bologa يقول...

قبل لا اعطي اي راي
احب احدد الالويات
عادة اذا شخص استشارني في مثل هالموضوع
اقول له حدد اولوياتك
مثلا شنو اهم شي بالنسبة لك
مثال اول شي الراتب وثاني شي نوع العمل ثالث شي انه ما في احتكاك مع مراجعين
وعلى هذا الاساس يتم الاختيار
ومن زاوية ثانية يجب تحديد الارباح والخسائر
يعني في حال تغيير الوظيفة شنو اللي ممكن يخسره الواحد
يخسر جزء من الراتب مثلا والامتيازات المادية لكن بالمقابل يربح راحة البال
فتكون كفتي الميزان راحة البال والراتب ايهما اهم

بس بصراحة
الدوام بعد ثلاث او اربع سنوات يصير ممل
لكن الشاطر اللي يقدر يطور نفسه ويجدد من قدراته
وهم في شغلة مهمة وهي تغيير المكاتب من حيث الشكل
ترا تغيير مكان المكتب او شكله بين فترة وفترة يكسر الروتين

الخلاصة
انا ضد تغيير الشغل الا للافضل
والافضل في وقتنا الحالي هو القطاع الخاص
يعني اطلع من حكومة الى حكومة
ما سوينا شي

ونسال الله لكم التوفيق والسؤدد اينما حللتم وعملتم

Q80Batman يقول...

نفس الموضوع صال لي قبل 12 سنة وبسبب التردد والخوف من المصير المجهول اصبحت أسير وظيفة ما أحبها واشتغل مع ناس تايهين المهم في الموضوع ان الشخص إذا اشتفل في وظيفة ومجال يحبه ينتج ويثبت نفسة و الأهم يرضي نفسة لان راحة البال ليس لها ثمن ولاتقدر براتب خصوصا إذا كانت كل الاحتياجات الاساسية متوفره في النهاية اتمني ان تصلي الي القرار المنلسب و ما تندمين على عدم اتخاذ القرار المناسب بعد سنوات من الان

layal يقول...

اللي يريح شخص يمكن ما يريح الثاني

ما تكلمتي عن الحوافز والدراسه في دورات تدريبيه مثلا

واهم شي نفسيتج وراحة بالج ؟؟
اذا الجماعه اللي معاج اوكي- ومهما قلتي -انتي لين قعدتي مع نفسج شنو تقولين ؟؟ مرتاحه وله لا؟؟

ولا تستبقين الاحداث يمكن تدورين وما ترتاحين حق ولا شغل تحصلينه

هل انتي تحبين التغيير هذي نقطه ثانيه
خصوصا اذا الانسان ما عنده ذيك الالتزامات القويه التغيير عنده اسهل في نفس الوقت التغيير يعطيج خبرات يديده
في النهايه كل اللي راح نعطيج نصايح والقرار راجع لج لانج انتي اللي عايشه الوضع عدل فلا تتأثرين بكلام الغير في اخر قرار تتخذينه

sOulvOice يقول...

حيرة مابعدها حيرة الله يعينج

من حجي غيري وخبرتهم يقولون الدوام المريح والمسؤول الزين اهم من الراتب

اشفايدة الراتب القوي ومسؤول امطلع عينج

فديت عينج والله هههههه

لاجد دام الراتب مو مهم وعندج بديل افضل بس بمعاش اقل ومكان حلو وراقي توكلي على الله وقدمي استقالتج وترى فرق 100 ولا 50بالراتب ماتسوي شي ابد


بلغينا بقرارج بأسرع وقت
عسى الله يوفقج

nice يقول...

شوفي تركي عنج سوالف هالمكان ما احبه وهالمكان كرف
بالنهاية فيه مميزات هايلة راتب وقرب الواحد يبي اكثر من جذيه
اذا عندج واسطة تشتغلين بالديواتن الاميري او مجلس الوزراء اوكي لكن ماكو واسطة وبتشقين وتكلمين هذا ولا ذاك
لا خليج بمكانج وارتاحي
شوفي اذا تعتبرين نفسج تشقين وتكرفين اشتغلي على قدر راتبج ولا ترهقين نفسج محد بقضبج الباب
والله المستعان

Fuzzy يقول...

طبعا ترددج في تغيير مكان عملج راجع لانج تشتغلين في جهة حكومية.. نصيحتي كالتالي : اسألي صديقاتج ومعارفج عن اماكن عملهم واذا مرتاحين أو لا .. وروحي شوفي المكان أوّل .. تالي دبري واسطة :) .. بعدين في طريقتين.. يا أمّا انتداب .. يا أما نقل خدمات أو استقالة وتعيين جديد. انتي تبين تطلعين لانج ما تبين تعامل مباشر مع المراجعين.. انزين مافي ادارة في مكان عملج الحالي صادّة شوي عن الناس ؟ اسهل الانتقال من ادارة الى ادارة من الناحية الادارية. أهم شي في الموضوع صراحة الواسطة .. اذا عندج واسطة قوية تقدرين تنتقلين أي جهة حكومية بسهولة.. انتي حاليا سألي عن الخيارات المتوفرة والبديلة عن جهة عملج الحالية وشوفي شنو راح تكون فرصتج الوظيفية في المكان اليديد.. لان وايد وزارات المكان مريح لكن ماكو شغل بالمرة الموظفين والموظفات مقزرينها ريوق تالي جرايد تالي حش هاهاها .. تبين جذي ؟

Fuzzy يقول...

عاد انا حاليا قاعد ادور سكرتيره.. انتقلي عندي هاهاها

Chai-7aleeb يقول...

أستخيرى و شاورى الوالد و الوالده

ZiZoTiMe يقول...

Yoba el eflos khal etwaly! aham shy eb hal denya el nom wel akel o etha fe wagt nestanas feh laish la ;)

nadeyah يقول...

الانتقال من عمل لاخر شى صعب وقرار مصيرى بالنسبه لى قعدت 4 سنوات اقول وع وع لدوامى الاولى وابى انتقل تخيلى 4 سنين وانا اكرف وابى انتقل بس تعودت على البنات اللى معاى اشلون اطلع لكن لما حسيت انى مو قادره اكمل خلاص سويت نقل لاداره تانيه بمكان مختلف بتاتا عن شغلى الاولى والحمدلله رب العالمين لانى نفسج اتعامل مع مراجعين واعرف شنو المراجع وشلون النفسيات تكون.... انتى فكرى ووازنى المميزات وشوفى وجربى اداره تنتقلين مو تغيرين المكان اللى ينابج وترى وانا اختج كل الوزارات فايضه من الموظفات وبس قاعدين للحس

Charisma يقول...

اكره انحط بهالاختيار وايد صعب الصراحه
نوعى انا عشريه وائلف المكان ما احب اغير

بس انا اقولج شى اهم شى بالشغل وقبل الراتب ، الراحه النفسيه والبنات الى حواليج والناس الى فيه هذا اهم شى ، اهمه الى يخففون عليج كل شى بالدوام وحتى قثه المسئولين

وحطى فى بالج ترى محد مرتاح بدوامه صدقينى لازم فيه شى يقث ،، انا كل شى اوكى بدوامى الالا مسئولى زفت حشاج بس الى مسكتنى ان الى حوالينى ما يتبدلوون بالذهب ناس والنعم فيهم واحنه على قلب فى الدوام فحدى معطيته طاااف مع ان تقييمى كله زفت على ادائى يعنى كله ظالمنه بس الله فوقه

ارجع اقولج نفسيتج اهم يعنى اذا مرتاحه نفسيا بالمكان صدقينى قضبى مينونج

الله يوفقج ويكتبلج الخير والصالح ونصيحه استخيرى ربج

kila ma6goog يقول...

if u found a better place go, if not stay

salary is vital for me:P

tweety يقول...

qiyadiya
ياعمري مشكورة على التشجيع وانشالله ألقى المكان المناسب قريبا

sologa
أهم شي عندي :راحة البال
ماكو مراجعين
مكان راقي
بيني وبينك القطاع الخاص اذا مو قطاع نفطي او بنوك يعني مافيه ضمان ولا انتظام في سداد الاشتراكات أحيانا وقانون العمل في القطاع الخاص مو مريح بالنسبة للبنت من حيث الاجازات وساعات العمل

q80batman
والله هذا اللي مخوفني أني أظل وأتحسف عقب خاصة أنه مو بس موحابة المكان ماله مستقبل ومتعب من حنة المراجعين
شكرا علي التشجيع

layal
ما أحب التغيير وايد بس صاير الدوام مرهق وغير مرضي
شكرا يالغالية على رايج وتشجيعج

soulvoice
ماني عارفة ليلحين البديل الافضل وهذا اللي معقد السالفة شوي
by the way :مغيره بلوقج !؟

nice
نفس كلام ابوي ..أخاف متفق معاك من وراي :p
تدري أنه ضغطي ارتفع وصار معاي صداع مزمن من الحنة والازعاج

fuzzy
صعوبة الانتقال للإدارات أكبر من صعوبة الانتقال لمكان ثاني في شغلي , وبصراحة مكان مافي شغل ومريح بالي حتى لو ملل بس شارية دماغي أنا الحين صايره زفتي ببيزة عندي قصص من المراجعين راح أتحفكم فيها مستقبلا بسوي فيها كتاب والنشر عليك
أنا موافقة بس عاد جامعية واشتغل سكرتيرة !؟ عطني مميزات وانا أفكر بالموضوع وبالنهاية انت المستفيد :p

chai-7aleeb
أحس مهما كان رايهم بس اهم مو عايشين في قلب الحدث وخضم المعركة !

zizo
i told u be4 that i like u ;)
ma3a eny ma a7eb 9ortek la2nha ma etshaje3 :p
thanx dear

nadeya
أنا صار لي 3 سنوات ونص وأحس أني أكرر نفسي ومستقبلي ضايع ومنغثة من المراجعين اللي يسوون واللي ما يسوون بس في صعوبة بالنقل يبيلها مو واسطة ابرة حصن

kitty
لاحظي تعليقات البنات أغلبهم تحط راحة البال في الدرجة الاولى عكس الشباب يمكن لأن الريال اهو اللي يتحمل مسئولية البيت بشكل أكبر والمرة وراها مسئوليات ثانية في البيت تتطلب انه تكون مرتاحة نفسيا
بس أنا مو قادرة اتحمل المراجعين

kila ma6gog
wallah i'm trying
بس هم فيها مخاطرة لأن في أشياء ما تبين بالشغل الا بالممارسة

sOulvOice يقول...

تويتي حبيبي حددي شتبين بالضبط

القطاع المصرفي

قطاع حكومي

شركات


وقارني بين الثلاث من حيث المميزات والسلبيات



البنوك



الرئيسي عالاغلب افضلج من البرانشز



مميزات البنوك:

راتب حلو
علاقات ومعارف


سلبيات البنوك


دوام مرهق خاصة لو كان زامين

حياة اجتماعيه ماكو

صرامة المسؤولين وتدقيقهم حتى بالبنوك اللي مو بذاك المستوى



حكومة


يعتمد اي مكان حاطة في بالج



شركات استثمارية


سلبياتها


دوام طويل متواصل
بأي لحظة توقعي الاستغناء عن خدماتج


مميزاته

نفس مميزات البنوك عدا النقطة الاخيرة شوي الوضع اخف بالشركات

لج فرصة كبيرة بالتدرج الوظيفي


اتمنالج التوفيق:)

tweety يقول...

soulvoice
والله أتوقع الحكومي ماعندي استعداد اتمرمر بالبنوك والشركات وانا عارفة انه مافي ضمان للمستقبل عندهم
يمكن الحكومة راحة بال ويخليني أتفرغ أكثر للكتابة اللي احبها
بس مشكلة الحكومة انج تبين مكان راقي
انا ما ادور مكان مافي شغل بالعكس بس بعيد عن المراجعين لضمان الخصوصية
الله خير الوزارات وايد لكن الرك على المكان المحترم اللي في ناس محترمين مو ربع البطاط والبيديان والحب والبنك طول النهار

9ahba'a يقول...

Tweety
if you,re not happy leave, there are alot of other options, ask your self what do you like to do?
where can you see your self? where can you be active, devoted....loyal?

inshallah you will get an answer
wish you all the best:)

Fuzzy يقول...

Whats your major by the way ?

mishal يقول...

والله انا عن نفسي الوظيفه لازم يكون فيها تطوير
احب الوظيفه يكون فيها تطوير وتنمّي عندي مهاراتي او تزيدني علاقات اجتماعيه اما الماديه هذا شئ لابد منه

وسالفة اني انكرف على غير فايده مثل اشيل الاوراق وأوطيها
واجمعها وافرقها
واقعد الزّق بالطوابع
واختمها واوقعها
هذي الوظيفه ماتناسبني

هيك انا بحب حياتي تكون

واللي يبي الزين لازم يضحّي ويتنازل عن كثير اشياء

ومين بماله اشترى في الدنيا راحة البال...


:)

Diver يقول...

شوفي
مسكي ورقة و قلم و حطي المساوء و المميزات اولا و هذا سويتيه هني
بعدين بصفحة ثانية كتبي كل الي انتي تبينة من الشغل اليديد او من اي شغل و قيمي شغلج اذا ما كان التقييم زين حاولي تنتقلين
المهم انج تعفين شنو تبين بالضبط تعرفين هدفج صدقيني اذا عرفتيه هذا %90 من الحل

The Simper يقول...

maethoo3 wayid kibeer,

first things first, i see one thing for u? do u see ur self in the future? if u do.. then it is easy.. and future i am talking about short term and longER term..

if u nail those 2 points down, then u can find the field you are willing to work at. and from then u narrow the places down acording to many important things TO U.

if u don't have the vision of ur self in the future, then it is easy to be swayed away from it by other minor current issues like (nas wiyay, o ratib, 3alaqat, ra7a, o mas2ol,...)

one more thing, are u talking about a career improvement or change, or a new career?

are u in private or public? or semi-public?

those are the main points in my mind, ask more, i can carify.

o alah ewafgich :)

LonDonY يقول...

تويتي، والله موضوع مووو سهل .. ويبيله رووووية وطووولة بال.
اهم شي اتعرفينه ان مافي مكان كامل امكمل وخالي من السلبيات.. شيلي من اهني وحطي اهني بس شكل ثاني.. وخبرررج
The Grass on the Other Side is Always Greener
وفي الغالب، الشغلة الزينة عادة اتييي منها ومن نفسها.. اتحسين ان احد امهندسها لج وامفصلها عليج بالضبط.. وهذي اللي ما انتردد في قبولها.. بس مو شرط اتكون بهالصورة وغير هالصورة معناتها موزينة.. لا كلش مو شرط

but i don't wana make the wrong choice
هذي اللي صعبة احد يضمنها لج :/// مو ليش اهي دنيــا

اهم شي، وكلّــــي ربج واستخيريــه وانت كلج يقين.. وان شاء الله الله ينور بصيرتج للي فيه مصلحتج

LonDonY يقول...

شنو تخصصج؟؟ لان صعب نعطيج اختيارات بدون لا انعرف التخصص
يعني اذا بزنسن..ادارة/تمويل
اقولج فكري بالهيئة العامة للاستثمار

Mr_CHoCoLaTe يقول...

السلام عليكم

الصراحه يا أختي تويتي

لو كنت أشتغل ما يهمني المعاش وايد كثر حبي لشغلي و تطوري فيه

يعني أنا ما درست طب علشان أصير مدرس أحياء

أو درست هندسه كمبيوتر علشان أصير كاتب

أنا ما أقولج طلعي بس فكري مرتين هل يمكن اتييلج فرصه و تصيرين بمرتبه عاليه بالمكان ؟

هل شايفه إن اشتغلتي اب هالمكان بوقت كافي و درستيه عدل ؟

إذا اجابتج متعارضه مع الأسئله عيل توكلي و شوفي شغل بس ضمني الشغل قبل ما تطلعين

و إن شاءالله أفدتج مع السلامه :>

mishari يقول...

شوفى اذا تبين نصيحتى
العلل اللى مدوامج وااااااايد عادية
بالعكس الاحتكاك بالجهور على قولتج خبرة وعلاقات احسن من القعدة بالمكتب اتا جربت الاثنين ولقيت بالاخير هالشى يعتمد على شخصية كل واحد
بعدين لا تقولين الراتب ما يهم انتى صارلح فترة تستلمين راتب معين تعودت مزانيتج عليه لما تتغير تحسين بالفرق صدقينى

لا تتذمرين بس لما تحسين بهالشى اخذى اجازة على طول علشان تردين فرش :)
موفقة

Яeema يقول...

أنا قاعدة أمر بنفس الظروف
أقعد و إلا أشتغل

مع إني توني رادة من 4 سنين إجازة

:\

tweety يقول...

9ahba'a
iam not happy & i feel that i don't belong 2 this work
WHERE CAN U C YR SELF ?
emmmm i used 2 ignore this q but will not any more
thanx dear

fuzzy
manging and organizing

mishal
انا معاك الف % كراف بدون تطوير يعني انتحار بطيء
احس ساعات اني قاعدة اضيع مني !!

diver
الورقة صارت خريطة من كثر ما كتبت فيها بس أحس الحين الرؤية بدت تتوضح أكثر عندي

the simper
my future vision is still un clear i feel lost halayam , i need 2 listen 2 my self more
i'd like a new career but i don't know am i ready enough or not
i'm in public (mu2assasah)
thaaaaaanx 4 caring

londony
مشكووووووووور وايد عزيزي على الدعوة وصدقني ملاحظاتك على البال تخصصي إدارة وتنظيم

mr-chocolate
بالنسبة لشغلي الحالي ما في مستقبل
مشكور وايد على النصايح الغالية وكلامك مقنع جدا جدا

mishari
انت تدري الاحتكاك بالناس من مختلف البيئات والخلفيات الثقافية مو شي وايد زين وبعدين نوع المعاملات أحيانا يفرق , بعدين انا ما قلت الراتب مومهم بس ما يسوى ان الواحد يعيش في مكان مو عاجبه ولا مريحه عشانه

reema
أحس الموضوع يحتاج قرار جريء
الله يوفقج وين ما كنتي

sOulvOice يقول...

تووووووووتو




ادارة وتنظيم مطلووووووووووووب

تدرين قالولي قبل التخرج الفايننس اهو التخصص المرغوب بمجال الوظايف بس لما شفت الوضع لااااا الادارة سوقها ماشي اكثر وتأكدت لما رحت الديوان وسألت الموظفة عن اكثر التخصصات المطلوبة قالتلي ادااااااارة وتنظيمممممم

بس مع هذا لا اتوهقين نفسج ضمني البديللللل عقب طلعي من شغلج

غير معرف يقول...

انتي مو مرتاحه بشغلج لان اهم شي الراحة النفسية بالشغل ( شفيني مروان المطوع ) بس انا اقول ان لو في مجال يرقونج وتصيرين مديرة ماعليه قعدي بس اذا حاسة ان الادارة بتخليج مثل ما انتي وتمص دمج بالشغل وبس لا طلعي واي ابرك , انا جذي كنت اكرررف 6 سنوات وبعدين صارت سالفة ضد الادارة جمدوني سنتين واللي باطين جبدي ان المصريين اللي معانا يوم اختربت علاقتي بالادارة قاموا ما يعطوني ويه لوول
كراف مو مشكله بس بيرقونج والا بيمصون دمج واخر شي بيرفعون ايدهم عنج هني السؤال .

tweety يقول...

soulvoice
والله انج ترفعين معنوياتي
انا بابدا رحلة البحث والتطوير وراح أطلعكم على النتايج اول بأول

hamad
لا بيمصون دمي الى اجل غير مسمى أكثر من دراكولا

White Wings يقول...

عزيزتي
حتى لا تخسرين بأي صورة، ابحثي عن عمل أول وتيقني من نوعيته وبعدين قرري ترك عملك العحالي، يعني أوجدي البديل أول وتأكدي منه
وفي عملك ما ينتدبون لمكان آخر؟ هذه دائماً طريقة جيدة للتجربة
والله يطمن بالك ويكون الأفضل نصيبك

Fuzzy يقول...

اذا تبين وظيفة في مكان هادي ومافيه مراجعين .. اقترح الاماكن التالية :
1- مجلس الامة
2- مجلس الوزراء
3- الديوان الاميري

طبعا كل مكان فيه ادارات زينه وادارات تلوع الجبد فلازم تسألين قبل لا تختارين مكان وادارة .. وطبعا أهم شي هو الــــواســـــــــــطه

LonDonY يقول...

تويتي

فكرت لج وبالنيابة عنج.. انتي ما تبين وظيفة بو سنتين .. صح ؟؟
وتبين شي يوالم وضعج المستقبلي .. ريّل .. عيال .. استقرار .. معاش .. مكافآت .. امووومة .. تقااااعد
صح ؟؟؟

الديـــوان الأمــيري
ينطرررج

رايي من راي الاخ فززي وقولج.. تعبي
على الديـــوان

luloo يقول...

تويتي

ما في ضرر من التقديم في أماكن أخرى.. ومن ثم تأتي المقارنة بين العمل الحالي والعروض الاخرى... التغيير هو الشئ الوحيد الثابت في الدنيا.. ولكن يجب أن يكون للأفضل

قدمي على أماكن أخرى..وقارني

موفقة

the tooth.fairy يقول...

و آنا أوافقهم

الديوان الأميري ولا مجلس الوزرا

وبعدين اي استخيراي وشوفي اشيطلعلج

أهم شي راحتج والله

اموفقة وسويلنا اب ديت على وضعج الوظيفي
:P

tweety يقول...

white wings
شكرا يالغالية على الدعوة والنصيحة , هذا اللي راح أسويه باذن الله

fuzzy
صديقي العزيز
لك خالص الشكر على النصائح والاهتمام
عاد الديوان كان في بالي من فترة

londony
أحلى شي انك فكرت نيابة عني صح :)
جنك تدري باللي في بالي

luloo
في الاول كنت مترددة من مجرد التفكير في التغيير لكن الحين لأ , شكرا على التشجيع عزيزتي


butterfly
خلاص الديوان والمجلس اهم الوجهة القادمة وانشالله راح أوافيكم بالاخبار
مشكورة حبيبتي على اهتمامج

للجميع

إخوتي ...
أصدقائي...
أعزائي ...
شكرا جزيلا على اهتمامكم وتفاعلكم ونصائحكم الغالية علي
لم أتصور أن كلماتكم سيكون لها ذلك الاثر الكبير في مساعدتي , سابقا وبسبب الظروف التي حولي كنت اخشى من مجرد التفكير في التغيير ولكن تشجيعكم بدد خوفي , شكرا لكل من نبهني الى ان كل المميزات في أي وظيفة تقع في الدرجة الثانية بعد راحة البال
شكرا لمن أعاد لي فكرة العمل في المجال الذي أرى نفسي به كإحدى أولولياتي
شكرا للدعوات الصادقة
تمنياتي لكم بالتوفيق في كل مجال من مجالات حياتكم

MiSs-ToFa7a يقول...

but i don't wana make the wrong choice


والله يا تويتي مالج غير الاستخاره وماراح تندمين صدقيني

dipali sharma يقول...

Keep your choices open while getting such solutions as there are numerous provider that assures lot yet falls short to provide the desirable results. buy targeted usa facebook likes