السبت، أغسطس ٢٦، ٢٠٠٦

بيبي متو سقتني مرمرة


تذكرون واحنا صغار كانت في أغنية أطفال حق هدى حسين اسمها بيبي متو سقتني مرمرة ؟ اليوم أنا مضطرة أقتبس عنوان الأغنية وراح اتعرفون ليش , تحلطمي اليوم سلمكم الله عن الوالدة تحديدا وعلاقتها بالمتو اللي عندنا ( متو مو كاسكو ولاحد يسألني ليش لأني شخصيا ما أفهم بهالسوالف ) سلمكم الله أنا وحدة عندي فوبيا من الحيوانات وما أحبهم وأتضايق لما أشوفهم ومع هذا أهلي خاصة أخوي لودي ولا معبرني ولا مهتم ويايب قطوة في البيت ! ومع أني فارضة عليهم فارامان أنه القطوة ما توطوط داخل البيت ولا أشوفها ولا تشوفني بس الموضوع ما يخلى من المضايقات
أما الطيور فأحبهم طبعا بس ما أرجح فكرة تربيتهم بالبيت أحس مايجوز نحبسهم عشان نشوفهم ونستانس عليهم المفروض مكانهم بره في الهواء الطلق ..بالحدايق ..مادري وين بس المهم بحريتهم ومع هذا محد معبرني ومن 5 سنوات أو أكثر صار عندنا متو ( ببغاء ) في البيت ما أذكر منو اللي أهدانا إياها أو شراها جان حسابي وياه اليوم صار عجب عجاب بس للأسف ما أذكر

البيبي متو هذي وبرغم تمتعها بالإقامة في بيتنا لمدة طويلة إلا أنها ما تنطق الله وكيلكم ولا كلمة ..طرمة !؟ يا ريييييييييييييييييييييييييييييييييييييييت فالحة بس اتصارخ بصوت مزعج جدا جدا ودايما في أوقات الذروة : من صباح الله خير , الظهر واحنا رادين من الدوام , المغربيات ... لما أتصارخ تلقائيا تنسى كل شعارات حماية حقوق الحيوان وتتمنى لو تزنطها أو تزنط روحك وترتاح , المشكلة أنها تمردت بالفترة الأخيرة وايد ولما تتبعت الأسباب لقيت الوالدة الله يجازيها كل خير اهي اللي معطيتها الضوء الأخضر . تعلقت فيها ( على شنو مادري ) و هات يادلع ولما نشتكي تقول : حرام عليكم خلوا بقلوبكم رحمة ! أهي الوحيدة اللي حاسة فيني !! طبعا الحجي مقصود فيه الوالد لووووول عشان جذي اهو ينسحب بدال لا يفتح على روحه جبهة تحلطم . بس بيني وبينكم الوالدة صاجة هالمتو ما ترضى تاكل الا من إيدها ولما تطلع تخنس بطاريتها ومن تسمع حسها رادة البيت ودها اتطير من القفص وساعات تلحقها لي الباب اذا شافتها لابسة عباتها بتطلع ! ليش لأ اهي حاصل لها ست الحسن والدلال الوالدة متوصية فيها عدل :0


  • الاكل تنقي لها نقوة مو حيالله شي وما ظل موز ولا كرز ولا أفندي ما لقموها وساعات اتييب لها أكل خاص من مركز سلطان وهوعبارة عن فواكهة مجففة مع مكسرات
  • تحط لها راديو عشان ما يضيق خلقها !
  • الساعة 7 موعد نومتها المسعدة فالويل لمن تسول له نفسه يشب الليت عليها حتى لو بالغلط يسمع محاضرة يكره فيها روحه !
  • تحك راسها
  • تدلعها وما تناديها الا حبيبتي !!!
  • الصبح لازم اتصبح عليها وتغنيلها : صباحك الصباحي والورد والتفاحي ( انا ما أذكر انها غنت لي هالاغنية في يوم من الايام ) ! هذا وأنا بنتها
  • تحطها بالصالة جبال التكييف وبالشتا تحط لها دفاية وتلحفها

يعني اعصب والا ما أعصب بالله ؟؟؟؟؟؟؟؟

صراحة قمت أغار وأستحي أتشكى وأقول أني آخر عمري أغار من بيبي متو لا راحت ولا جت بس الحق حق أمي أتدلعها أكثر مني لا وساعات لي تكلمنا بصوت عالي واحنا صوبها سكتتنا عشان ما نقعدها من النوم ! هالمتو أمها داعية لها اللي لقت بيتنا , ولما يفيض فيني الصبر وأغلي وأقولها اتقول لي: أنا محد مونسني بالبيت الا اهي وانتوا كبرتوا على الدلع !!! انزين عديني بيبي متو والا كاسكو ودلعيني

مرة لما أبوي عصب صج وشوي وكان راح يشوحها ويفكنا منها والا أمي تدمع عيونها وتقول :

شوف يا بو تويتي إذا طلعتها من البيت راح اطلع وراها

لوووووووووووول أتخيل أمي زعلانة رايحة بيت خوالي والسبة المتو . شكلي راح اتصل على برنامج فوزية الدريع وأقولها أريد حلا

---------------------------------------------------------------------------------------

من فترة وانا أحاول أعرف اشلون أضيف أغنية في البوست لأني بهديها حق شخص عزيز علي ومن الطريف أن اللي علمني اشلون الطريقة اهي نفسها اللي كنت حابة أهديها الأغنية

butterfly

i hope u will like it

هناك ٣٢ تعليقًا:

QiYaDiYa يقول...

يحليلها امج الله يخليها لكم .. قلبها طيب شتسوي لا تلومينها ..

انتي قلتيها مالج غير فوزية الدريع تحل المشكله ;p

mishari يقول...

تذكرة ذهبية مع موبايل خط ذهبى حق حديقة الحيوان والوعد عن قفص الشواذى

وبعدين يحطون راديو يمه مو علشان لا يضيق خلقة علشان يتعلم الكلام :)

ياحلوج يا تويتى عزيزة وغالية وترى اللى اقوله غشمرة من باب المعزة :)

layal يقول...

رفيجتي كان عندهم بيبيه نفس الشي
وامها قعدت تصيح لما ماتت
الله يخلي لج الوالده يا رب ويطول في عمرها

Fuzzy يقول...

هاهاهاها ابشرج البغبغاء ممكن يعيش أكثر من 100 سنه . انا عندي كاسكو اسمه كوكا .. ونفس الحالة متدلع آخر دلع عايش بفندق خمس نجوم الاكل بوفيه وموسيقى وينام عقب صلاة العشا ويغطون القفص عشان ما يزعجه الضوء .. بس صراحه مسوي جو بالبيت يسولف ويقرق وساعات يتحلطم مثل الوالدة مادري شيقول ويقلد صوت كل شي .. ذاك اليوم سمعته يقول نياو نياو !! تالي عرفت ان قطوة هجمت عليه هاهاها قامت تحوشه كوابيس بالليل وينونو مثل القطوه ! بس شي غريب انه ما يتكلم مع ان في احد مجابله .. جربوا وكلوه فلفل يا ينطق يا يحوشه حارج هاهاها

Chai-7aleeb يقول...

والله أنا أقول خلى الوالده تستانس

صدوا عنها

بالأخير،هذا بيتها بعد و هى اللى تآمر

Warda يقول...

hehehehehehehehehehehhehe :)
الله يخليلكم الوالده
و الله يعينج :)

I hate cats as well !!

sOulvOice يقول...

توتو

عندنا وعندج خيرررر
ترى سلوك الامهات مثل مثل ماتلاحظين هيهيهي كان عندنا كاسكو امي امسويته يادهينة لاتنكتين اكثر من عيالها مع انه كان معتوه مايعرف يتحجى ماغير فالحلي يقلد صوت التلفون

الله يذكرك بالخير يا بوجبار

لين يه ذاك اليوم ولقيت امي تبجي بالمطبخ عبالي واحد من الاهل صار فيه شي لا قدر الله اثاري الكاسكو عطاج عمره وادفنته بالحديقة

الله يرحمنا برحمته شباب يموتون كل يووم وامي تبجي على كاسكو هاهاها

تويتي لو اقولج تاريخ العايلة بهالمجال شي شي صاعق ككككك

وين اليزابيث تايلور عن امهاتنا

sOulvOice يقول...

ويه ويه خرفت انا بعد شكو اليزابيث تايلوور اقصد الثانية ذيج مالت حقوق الحيوان اعوذ بالله منك ياابليس نسيت اسمها

صوفيا لورين!!!

MiSs-ToFa7a يقول...

تويتي تبين الصج

اللي يقرا البوست مالج وده يصير بيبي متوو عند الوالده

الله يحفظها ويخليها لكم يارب آميين

Fuzzy يقول...

sOulvOice

قصدج الممثلة الفرنسية بريدجت باردو

Fuzzy يقول...

تويتي عندي لج حل تحرين فيه البيبي متوه مثل ما اهو حارج ... روحي الله يسلمج مطحنة الرفاعي واشتري كيلو حب شمسي محمص .. وردي البيت وبسطي جدام الكاسكو واكلي وحذفي عليه القشور هاهاها اضمنلج خمس دقايق يصعد فوق القفص ويطب وينتحر

lawyer يقول...

ايييييييييي مع الكبر امهاتنا مدري شنو صاير فيهم
ههههههههههههههههههههه

يدلعون خدم
و يدلعون حيوانات
مدري ليش بالله


و احنا اعيالهم ننزف كل يوم على سبه خدامه و ساايق

و كل هذا لان مافي قلبنا رحمه
!!!!!!!!!!!!!!!!!!!

sOulvOice يقول...

fuzzy


loooOOOOoool

اي هي هي :p

والله على بالي شكلها بس ناسيةةةةةةةةةةةة الاسم





توتي

استعبطي مثل ما غيرج سوة ورشيه بالفليت كككككك

the tooth.fairy يقول...

لووووووول يا بعد عمري يا توييتي

اطلعت الأغنية حقي وآنا مادري؟ يا بختي والله فييج

:* heheheh

عيل خليني اقولج سالفتي ويا قطوتنا، الظاهر انتي نفسي آنا أخاف من جميع أنواع الحيوانات ماعدا الحصن !!! لييييش لا تسأليني مادري

عاد القطوة اللي كانت عندنا بيضة ومربربة والكل يستانس عليها.. الا آنا الوحيدة اللي ماقرب صوبها مولية

ذاك اليوم خلوها اتحوس بالبيت وآنا أطالعها من بعيد لي بعيد يوم ييت بمشي ولا تركض تلحقني

آنا اهنييييي زرر عقلي شوي واتعلق بالثريا

لوووووول جان أقوللهم مقولتي المشهورة

"يااااا آنا يا قطوتكم
"

وبالفعل أيام معدودة وباي باي
:P

الله يعييينج الصراحة

و هم مشكورة علأهداء مرة ثانية
:**

أحب هالأغنية وايد

غير معرف يقول...

Interesting blog
Check out ours:
http://theitrevolution.blogspot.com

arwa يقول...

ههههههه
بوست دمه خفيف
الله يحفظ الوالده ويطول في عمرها
وخلوه لها مستانسه فيه
:)

kila ma6goog يقول...

ذكرتيني بعيايز لندن كل وحدة ماشية و كلابها يمشون جدامها و تناديهم هنري , بيتير, مايكل, خلود

لوول

اعتقد سر انجذاب الأوادم للحيوانات على كبر يأتي بعد الخبرة و العشرة و التأكد ان الحيوان اوفى و أحن من الاوادم

سالفة قلب يقول...

انتو متو واحنا مسعود(كاسكو بيت ابوي)

امي امجابلته ويوم تزوجت حت ريشه امي تقوللي منصدم بعد فراقج هاهاها

تخيلي امي اترقصه واهو يطق رقبه وماترضى عليه امسميته ولدنا...شنسوي امرنا لله

بس عشان تفتكين من صيحته جربي حطيله منظره داخل القفص ..لاتساليني ليش بس جربي

Charisma يقول...

لوووووووووووووول بعد عمرى والله امج

اى غفلى عنها جنكم ما تشوفون خلوها موسعه صدرها
شتبون بسكم كبرتو

والله انا انظم لى جبهت الوالد دامها مستانسه خلوها :)))))))

الله يخليها لكم

3AJEL يقول...

ليش فوزية الدريع المسالة بسيطة
سم فيران بقفشة الشاي الصغيرة ورشيها بماي الطير المزعج كلها ربع ساعة الا وهو متكود على ويهه
خلصي عمرك

غير معرف يقول...

انا امي مثلج فيها فوبيا من الحيوانات , عشان جذي بدال لا تحطلها كاسكو مدللة سيارتها وفييه خيييييير اللي يقول ابي السويتش

tasty_as_berry يقول...

لوووول .. واي أمج تهبل :)

بس المتو مالكم متريش حده ... الله يخليلكم اميمتكم يا رب ،،

تخيلي عاد المتو من يتكلم يقولج .. " حره .. حره " خخخخخ

جكرا

tweety يقول...

qiyadiya
قلبها طيب ما اختلفنا بس صاير على حسابنا ..إذا سمعتوني في برنامج د.فوزية لا تستغربون :p

mishari
لوووووووووووول ..حسبي الله على ابليسك قفص الشواذي عاد !؟ انا شبعانة من الشواذي وين ما اروح القاهم مو ضروري بالحديقة :p
والله لو بتعلم الكلام جان تعلمت مالت عليها
و لا يهمك تمون يا ميشو ( اشتبي بعد قاعدة ادلعك )

layal
مشكورة يالغالية ويخليلج اهلج يا رب
أتوقع أمي من هالنوع

fuzzy
أولا : مو خوش بشارة
ثانيا : يا بختي فيك والله ! بعد اسمه كوكا اشلون ما يتدلع , بس أخاف يوم قال نياو من كثر الدلع فقد الذاكرة!؟
عمي قال نفس الشي الفلفل يخليها اتكلم بس ما اهقا امي توافق

chai-7aleeb
ما عندنا مشكلة انصد عن الدلال الزايد بس الصوت المزعج اشلون ؟؟؟؟ ما نقدر

warda
مشكورة ويخليلج اهلج ويطول باعمارهم
أنا أحترم فيج شعورج اتجاه القطاوه :p

soulvoice
لووول ..والله الامهات صج اطلعوا يتشابهون ..أنا اتوقع لو تحس انها مرضت تقلبها مناحة اذا ما يابت دكتور لي البيت ! ما استبعد
لا اليزابيث ولا صوفيا ..بريجيت باردو قصدج :)

miss-tofa7a
شفتيييييييييييييي !! وانا اولهم :P
والله يخليلج أهلج وكل من يعز عليج
ترى صورتج حدها اتشوق

fuzzy
شكرا على الإفادة ...ما نستغني عن خدماتك الجليلة :p
أنا بنتخبك مراجع التدقيق للمدونات
ومشاري رقيب المدونات
يعني اتهقا اسويله تعذيب نفسي ينفع !؟ أخاف أنا اللي انقهر وانتحر :p

lawyer
أقولج اكتشفت إن سلوك الامهات في عمر معين يتشابه الظاهر مستخسرين فينا العاطفة اللي عندهم
لووول عندنا وعندج خير أنا زفتي اببيزة عند الوالدة

soulvoice
يالله بسوي لكم خط ساخن لإستقبال خططكم الإجرامية بهدف التخلص من خطر المتو :p

butterfly
والله تستاهلين أكثر حبيبتي ..عاد الحين انا تعلمت الله بشري كل بوست أغنية :)
اتصدقين عاد انا نفسج عندي مواقف غير مشرفة مع القطوة والكلب اللي كان عندنا حتى اهلي لي بغوا يطفروني تذكروا هالمواقف واضحكوا
أنا اللي لازم اشكرج
:*

her
thanx ... i will check the blog inshallah as soon as i could
nice 2 c u in my blog

arwa
هلا والله ..ويحفظ لج كل غالي قولي آمين
هذا احنا مخلينها بعد شنقدر انسوي

kila ma6goog
عاد عيايز لندن لي حطوا لهم كلاب لأن ما يكون عندهم احد عايش معاهم مو نفس أهلنا
جزاك الله خير ..يعني قصدك ان امي اكتشفت ان هالمتو المزعجة أوفى وأحن عليها منا !؟ أنت شكلك متعاون مع الوالدة وقابض منها قرشين أنا شاكة فيك :p

سالفة قلب
لووول أي امي تغنيلها وايد بس اهي دعلة ما جد شفتها رقصت والا طقت رقبها جان يمكن حبيتها :p
بجرب خطة المنظرة وأقولج الاخبار ومشكورة مقدما عل وعسى الحل يكون على ايدج

kitty
تسلمين ويخلي لج أهلج
بس ياربي ما تهون علي نفسي وأنا أشوفني محقورة والدلع حق متو ! :(
أحس أكسر خاطر روحي :p

عاجل
لووول
انت صاير لك جم يوم ماشي بسكة الاجرام يا ريس :p

hamad
انا امي لو تسوق جان ممكن جدا اتدلع سيارتها بس الحين موزعها الدلال على السايق والمتو الله يستر من الياي

tasty as berry
متريش عالآخر ومسيطر عالوضع تمام
الله يخليلج اميمتج بعد وكل غالي عليج
اتصدقين احسها اتصارخ عشان اتنرفزني وتقولي حرة بطريقة غير مباشرة لأنها تدري ما احبها

sOulvOice يقول...

توتي


جنج ماتدرين حطيلج مروحة يم القفص علبونه بتخففين عنه الواهي

نياهاهاها وطلعيه من القفص راح يحلق اكيد يم المروحة وتنئطم ارقبته

ReLaaaX يقول...

loooooooooooooool


يابعد قلبي والله



انا اقولج الفرق بين البيبي متو والكاسكو ... احنا كان عندنا كاسكو اللي لونه رمادي مادري اسود وابيض وفيه شويه احمر .. عرفتيه؟

والبيبي متوو اللي لونه اخضر وشويه فيه اصفر


الله يرحمه كاسكونا .. كان ونيس يحليله .. وكل ماشافنا نسولف يجبب فينا لووول .. مره قال حق يدتي الله يرحمها جب جان تقوله هااو ! جب يجبك


والمشكله ان يسميني باسمي + اووه

مثال : ريلاكسيووووو


بس عقب سوا حق امي حساسيه واضطرينا نعطيه احد .. ومن عقبها ماتأقلم مع الناس الثانين الظاهر ..هاذا الحب ومايسوي ياختج ;)

Diver يقول...

عندنا و عندكم خير الوالد عنده كاسكو يقوم من الغدا يعطيه اكل و يوصينا نعطيه اذا ما تغدا و زفنا اذا صرخ روحوا شوفو شفيه
لا و خليه يعض اليهال يقول عشان يتعلمون ما ياذونه

tweety يقول...

soulvoice
لووووول أنتي لا تجابلين عاجل عشان ما تتألقون بالخطط الاجرامية

relax
صاجة المتو اللي عندنا لونها اخضر
ذكرتيني بمحبوبة مرزوق اللي سموا الفرس باسمها :)

diver
لوووووووووووووول
اشوه انه امي ماتعرف حق الانترنت عشان ما تقتبس الفكرة مالنا خلق تعضض متو بعد

the tooth.fairy يقول...

هاااا اشصار عليج رحتي الفلم ولا لي الحيين؟؟

اليوم فقدت لتر و نص دموع

:P

Midnight Madness يقول...

il 7al 3endiiii
ba6la3 bas il gofas chinich ma tadreen o khaleeha it6eer

Fuzzy يقول...

مبروك على التصميم الجديد للبلوق ما شاء الله التصميم لايق على موضوع البيبي متو هاهاها ... يالله متى العشا بمناسبة التصميم اليديد .؟

the tooth.fairy يقول...

لوووووول Fuzzy

تويتي مبروك اللوك اليديد

و صح يبيله عشا

;P

tweety يقول...

butterfly
ليلحين مارحت لا تعورين قلبي :(

midnight madness
ماأتوقع يطير عينه قوية

fuzzy
الله يبارك فيك لوووووووول يوز عني لا تخليني أكره البلوق ..موافقة على العشا بس تذبح لنا كوكا نحلي فيه :p

butterfly
حددوا المكان والزمان وانا حاضرة
انتوا تامرون أمر