الأحد، أغسطس ١٣، ٢٠٠٦

مشّي معي

صار لي جم يوم ماني قادرة أركز ولا أكتب أي موضوع أحس مخي يعاني من حالة جفاف ضبابية خلت الرؤية شبه منعدمة فقررت أعطي مخي إجازة راحة واستجمام عل وعسى ألقى حبيبي المغترب لوووووووول ...أمبي تويتي بدت الخوارة هذي أولها الله يعين على تاليها عاد أنا أقول سبحان الله بعد أخوره زيادة والا أقط خيط وخيط اللي بيقرا خل يستر على ما وايه والستر زين عسى الله يستر عليكم إنشالله
ذاك اليوم وأنا في الدوام لايعة جبدي كالعادة وفجأة والا وحدة تتمخطر جدامي مافيها شي بس مشيتها عجيبة صراحة قلت بيني وبين نفسي هذي من الله جذي !؟ المهم طوفت قلت يا تويتي تعوذي من ابليس وخليج خوش بنية انتي اشعليج من الناس وشعلى الناس منج , مرت وحدة ثانية والا هم المشية عجيبة زين قدرت أقمت ضحكتي , رديت أكلم نفسي يا ترى يا هل ترى الناس يانيين والا انا مو نايمة عدل أمس والا شالسالفة!؟ خلص الدوام ورديت البيت بس ظلت هالسالفة في بالي بعد فترة إكتشفت إني قمت أركز على مشية كل واحد أصادفه جدامي خاصة في الاماكن اللي فيها نطرة : بالمطاعم , السوق , المستوصف , البنك ...وأضحك
أتذكر الممشى أيام الشتي والبرد طبعا لأن الحين محد يقدر يمشي في الممشى الا الضبان ( جمع ضب مادري صح والا غلط بس هذا اللي طلع معاي ) المهم اتذكر اشلون بعض الناس يمشون واتييني الضحكة
قبل لا أحد يفهمني غلط ويظن أني أتطنز وأعيب لا سمح الله على خلقه أنوه يعني أوضح الآتي : أنا مو من الناس دقيقين الملاحظة على الشكل أو الملابس بس أركز على حركات الجسم مثلا اللي يحركون ايدهم وهم يتكلمون ...وتعابير الويه . لما أقول أني أضحك على مشية الناس أقصد المشي غير الطبيعي ...ترى كل واحد له مشية مميزة حسب عمره , جسمه أحيانا شخصيته اذا واثق من نفسه أو العكس بس أنا اللي أقصدهم اللي الحمدالله والشكر حتى بالمشي يبدعون ويتصنعون ويتهولون .
عموما بعد فترة بسيطة صارت عندي معلومات لا بأس بها ففكرت أسوي برنامج على قناة الراي اسمه : سيرة المشي وأناقش في الآثار النفسية والإجتماعية وتأثيرها على مشية الأفراد وأتنافس مع فوزية الدريع والا أطبع كتاب إسمه : عجائب الزمان في المشي الزعفراني , أو على أقل تقدير أسوي برنامج إذاعي إسمه : على رمشي يمشي ونفك الأوادم من مغثة الدغيشم ونستقبل إهداءاتكم على الأغاني التالية لعلاقتها بالموضوع وهي :0
مشيت خلاص
أمشي وبقلبي حزن
إنتي مشيتي
مواق في مشيته
ماشي الحال وغصب عني بعد يمشي
على هونة مشى والخطوة موزونه

وبعد التدقيق والتمحيص واسترجاع بعض المشاهد السابقة من الذاكرة استخلصت أن للمشي المعبر عدة أنواع نذكر منها على سبيل المثال وليس الحصر :
مشية الطاووس : هذي سلمكم الله غالبا يمشونها البنات اللي هابين يحطون قوطي روب بقمة راسهم تحت الشيلة
فتكون المشية بطيئة والراس مرفوع بسبب قوطي الروب لدرجة ما تتحرك فيها الرقبة ولا الراس طبعا

مشية البيض : هذي يمشونها البنات اللي يلبسون كعب عالي ومبوز طبعا سميت بالبيض لأن مشيتهم تكون صعبة اشوي ويهبدون جنهم ماشين على بيض ومن ضرورة هذي المشية المشي بخطوات بطيئة مترنحة وغالبا تصادفونهم وهم يعبرون الشارع عاد إذا بتنطرونهم يعبرون يعني اليوم انتوا طالعين وامكم داعية عليكم لأنها راح تاخذ ربع ساعة تمخطر

مشية البطريق : هذي مشية بعض المتان اللي ما يحبون يتحركون وساعات الواحد يضعف بس اتظل مشيته مشية البطريق طبعا أقصد أصحاب الوزن الثقيل وايد الله يرزقهم الصحة

مشية العروس : هذي المشية بطيئة والوحدة تسحب ريولها ما تمشي جنها عروس طبعا صاحبات هالمشية غالبا اهم اللي يلبسون عباة تسحب وراهم مترين وهالنوع حاولوا ما تمشون وراهم بالجمعيات عشان ما اتعلق العباة بعربانتكم وتبتلشون ...صايرة معاي لوول

مشية الحوامل : هذيله الناس اللي يعانون من الكرش الكبير طبعا مو بالضرورة يكونون حريم أو حوامل حتى الرياييل تلقاه يمشي والظهر مقوس للخلف جنه أحد دازة

مشية الهليكوبتر : هذي أكيد شفتوها وايد بالممشى واهم الحريم اللي يمشون ويمدون ايدهم بحركة أفقية لليمين واليسارهالنوع يفضل ما تمشون يمهم لأن عادي جدا تخطف عينكم وهي تمشي وغالبا ما تصاحب هذه المشية مد الظهر وتقويسه للأمام بدلا من إستقامته باختصار الوحدة منهم تمارس السباحة بالهواء الطلق مو المشي

مشية العلاق : هذي غالبا يمشونها الرياييل وتتمثل بأن يلبس الريال الدشداشة مع العلاق يعني ما يحرك جتوفه ولا رقبته ولاراسه بفضل النشا اللي في الغترة هالنوع لي مشى عباله خالد الفيصل بيفتتح أمسية شعرية

مشية البيب بيب : في حريم اسم الله عليهم بالسوق تلقونهم سريعين بالمشي جنه أحد لاحقهم ..أبد زيبق ما ينصادون

مشية عسكرية : في حريم وايد لاحظوهم يمشون جنهم داشين دورة رقبا

مشية القبقب : هذي مشية المجسمين بما أن أشكالهم اتصير جنهم قباقب فأكيد المشية بعد وانتوا عارفينهم وشايفين
منهم وايد ماله داعي أشرح

مشية الفيل : في بنات يلبسون كعب عالي بس متوازي مثل القبقاب فلما يكون الارتفاع عالي اتصير جنها تمشي على طابوقة والا على عمارة هذي ما تمشي تخبط مثل الفيل ويفضل ما توقفون جبالهم لأن ان داست على ريل أحد راحت اصابعه
مشية النعامة : والنعامة طير كبير له جناح وما يطير هذي يمشونها بخفة ورشاقة مع طقة رقبة خفيفة ..لووول وعادي يمشونها الجنسين

مشية العيزان : في ناس مالهم خلق يمشون ودهم أحد يدزهم هم ينشافون وايد بالممشى ولازم مع كل واحد منهم موبايل الناس تروح وترد وهم ما مشوا خطوتين بس هذرة بالتلفون مادري هالنوع يروحون الممشى غصب .. صج ودي اعرف جم توصل فاتورة موبايلاتهم

مشية كاسبر : في ناس ( أنا اللي صادفوني حريم مادري إذا في منهم رياييل ) يمشون ويدعمون ولا يهمهم يدشون عرض , يكفخونكم بالجنطة المهم تمر بالطول بالعرض بتمر ماتنطر بس الفرق ان كاسبر يدش بالطوف وهالنوع أتمنى يدشون بالطوفة من طفاقتهم

هذي كانت نبذة من ملاحظاتي وانتوا جربوا وبتشوفون العجب العجاب وساعتها بتعذروني لي ضحكت .
بس خلاص

هناك ٤٠ تعليقًا:

Diver يقول...

تبين الصج ضحكتيني
على فكرةان شاء الله ما امر جدامج جان اطلعين تسمية على مشيتي بعد
مشكورة على الموضوع على الاقل خليتينا نبتسم بالهوقت الصعب

Unknown يقول...

ما قريته كله لانى بالدوام :))
بس عجبتنى انواع المشيات
وممشى مشرف فيه ناس حتى الساعة 4 بهالحر يمشون بس احس حزة عقب صلاة العشاء يأذن ويصلى المسجد على بسرعه واطلع تمشى مع انى صارلى يمكن سنتين مو ماشى فيه بس فكرة شكلى اليوم باجرب
باى :)

Dakhtour يقول...

LoooooooooL bada3tay ma3a hal mashiat!! la o 7a6ah asamy 7ag'hom ba3ad hehehe

Enty ay mashya fehom? :P

Mr_CHoCoLaTe يقول...

قوه

يعطيج العافيه على المواضيع الحلوه

من حسن حظي أول مره أدش مدونتج و عجبني أسلوبج لأن قريب من طريقتي يمكن

بس ما أحب المواضيع اللي فيها أسامي ممثلين و دوخه على طول أطوفهم هي هي

و خوش موضوع عن المشي ذكرني بموضوعي عن الربع

و كنت أتسائل عن مشيتج موجوده بينهم ؟

مو قصدي أعيب بس صعب الإنسان يلاحظ تصرفاته هي هي

و إلى الأمام باي باي

the tooth.fairy يقول...

لوووووووووووول

الله يغربل ابلييييسج يا تويتي انجانج خليتني ابطها ضحكة وامي تعطيني نظرة "هاو اشفيها بنتي ينّت"

لوووووول

< لا أحد يفهمني غلط ويظن أني أتطنز وأعيب لا سمح الله على خلق>

ايي لا صح، حتى قعدت اقرّي امي البوست لأنها من جم يوم هم تقول شفيهم الأوادم استخفّوا موهما عارفين شلون يمشون

:P

مشية القبقب :لووووول يبتيييها ييب

و مشية كاسبر هاهاها حلوة

بس بس خل أروح آكل البسبوسة قبل لا تطير

يالله سلام وشكرا على هالبوست الممتع المضحك

Chai-7aleeb يقول...

بوست مااااااااااااا صاااااااااار

ضحكتينى

كل ما أقرا قوطى روب أموت من الضحك
حسبى الله على إبليسك

لكن،حقوق الطبع مالت القبقب عندى أنا الله يهداج

كتبت بوست كامل عن المعضلين و أحتفظ بهاللقب إلا إذا طلبتى الإذن

لكن بالأخير؟؟؟

تستاهلين و يسلم راسك

layal يقول...

من قريت الاغاني تذكرت اغنيه عبدالحليم
مشيت مشيت علي الاحزان وجيت لاحبابك

العين الساهرة يقول...

ما قصرتى على هالموضوع الجميل. منوين يبتى التسميات والله راح تصير قاعدة أطبقها على كل واحد يمشى جدامى لوول

ولا قوطى الروب، وأنا أقول كلهم شعرهم طويل ومسوين كبه ناطه طلعت السالفة قوطى روب وآنا ما أدرى. بس مشيت كاسبر أوف أكثر شىء في الجمعية وأماكن النطرة

خوش موضوع

the tooth.fairy يقول...

لأ جد جد ينرفزوني ربع مشية كاسبر بسرعة يرتفع ضغطي من وحدة تدعمني وما اتأسف ودي ارقعها بالجنطة

على طاري قوطي الروب
آنا مرة سألت رفيجة بنت خالتي المتحجبة قلتلها هاو مريوم اشعندكم اتسوون جذي بحجاباتكم قالتلي موضة اشفهمج انتي بالموضة

تالي قالولي بما أن البنات غير المحجبات هابين بالـ buff

تضامنا معاهم يسوون المتحجبات البفف بس تحت الشيلة أو الملفع

والله غريبة ، و يا كره موضة البفف أصلاً

و بس
نأسف على التحلطم

sologa-bologa يقول...

هههههههه
الحين عرفت سر البنات اللي شيلاتهم مرتفعة لي فوق
اثاري حاطين قوطي رووووب
هههههههههههه

اعتقد في مشيات وايد ما تطرقتي لها
مثل مشية اللقلق ومشية الناقة ومشية الزرزور
ومشية الحمسة
وشلون تمشي الحمسة
واقترح اسم للبرنامج

الانعكاس السيكوباتي على المشي الاكروباتي

nadeyah يقول...

الله يونسج بالعافيه يا تويتى ضحكتينى على الموضوع اللطيف :)

وخوش تصنيفات للمشى والله امس اشوف بالسوق بنيه ما تمشى اشفيها اتسحب جناها عقرب ولا كعب ومو قادره اى شاللى حادج عاد ..

وبالنسبه للروب هههههههههه عجيب بس ترى فى مثل روس المخلوقات الفضائيه يعنى اللفه التانيه تستند على اسطوانه فيصير راسها باللفه بيضاوى
مثل المخلوق الفضائى

mishal يقول...

هههههه

--اقتباس---
مثلا اللي يحركون ايدهم وهم يتكلمون
------
شلون يعني يتكلم بدون مايحرك ايده اكيد وجهه بارد

-----
مشية كاسبر:يمشون ويدعمون ولا يهمهم يدشون عرض , يكفخونكم
----

هههههههههه حلوه هالمشيه

-------
هذي كانت نبذة من ملاحظاتي
-----
اي نبذه اي ملاحظات مشاءالله موسوعه
والله اذا بتقدمين على برنامج قدمي وانا اضمن لج 30 حلقه بدون مايتكرر اي موضوع

:)

tweety يقول...

diver
أي دير بالك :P
يا عسى أيامك كلها ضحك ووناسة
لا تقاطعنا

mishari
مالي شغل تقراه مره ثانية
اتصدق ذاك اليوم وحدة الساعة 3 ونص بعز الواهي تمشي بالممشى !!؟
بس أنت إذا بتمشي بس قولي خل أيي أعاين مشيتك وأشوف أي نوع
:p

zizotime
مادري !! يمكن مشية الزرافة ولو انه مشية الغزال تلوق لي أكثر :p
لووول

mr chocolate
ياهلا ومن حسن ظني أنا بعد
توني قايلة حق زيزو عن مشيتي إذا تبون مرة ثانية أثبت عدل وأقولكم
شكرا على الكلام الحلو والمشجع وانشاءالله انشوفك دوم
لا تقاطع

butterfly
بسبوسة وتاكل بسبوسة !؟ ;)
سلمي لي على الوالدة

chai 7aleeb
عاد انت عراب البوستات الكوميدية ;)
أنا ماخذة التسمية منك وعشان جذي ما شرحت وايد لأنك كفيت ووفيت عن القباقب
والعفو ما ذكرت انك المرجع انشالله انتفادى هالاخطاء في المرات القادمة ;P
الله يسلمك من كل شر

layal
ما طرت على هالاغنية جان ضفتها

al3in alsahera
شوفي ترى ما أحط بذمتي أنا مسميتهم قوطي روب بس جان صج يحطون والا لأ مادري يالله طبقي القاعدة وقوليلنا اشيطلع وياج يمكن انضيف تسميات يديدة

butterfly
تصدقيييييييييييين !! لا واذا ثنتين يمشون لازم يمرون من بينهم !
أما امهات قواطي الروب أنا ما اشوف انه هالموضة فيها من الذوق شي بالعكس اتخلي اشكالهم غلط

sologa
لوووووول ترى صج مادري اذا يحطون قوطي روب بس أنا مسميتهم جذي لأن جنه قوطي روب بقمة راسهم
شكرا على الاضافة أنا راح آخذها بعين الاعتبار في البوست الياي والعنوان عجبني انشالله اسوي البرنامج واييبك ضيف فيه

arwa
مشكورة على التعليق حبيبتي
يالله ترقبوني , أوعدكم بنيولوك حق البرنامج
كلهم يقولون جذي !
حياج ولا تقاطعينا

mishal
اي في ناس لي تكلموا جنهم حاطين مسجلة يمهم لا تعابير ولا حركات
بس لا تشيشوني عالبرنامج بروحي على طريف ومايندرى باجر أتطور واعطي محاضرات ودورات عن المشيات لووول
حياك الله لا تقاطعنا

tweety يقول...

nadeya
حبيبتي عساج دوم مستانسة سوري سقط ردي عليج سهوا
صاجة ايصيرون مخلوقات فضائية أنا شايفة فيلم أجنبي جذي وكان يخرع اسم الله علي

nice يقول...

ما شاء الله عليج مو مركزة وجذيه ما خليتي احد بمشيته ما كتبتي عنهم واسامي مشيات اول مرة اسمع فيها
جهد مشكور عليه :)

9ahba'a يقول...

hehhehehheheheh
من زمان ما ضحكنا الله يونسج مثل ما ونستينا

Unknown يقول...

انزين ما في مشية اسمها مشيت لشيوخ؟؟؟
سؤال برئ جدا

Jandeef يقول...

Hehe nice post

ReLaaaX يقول...

مشية كاسبر : في ناس ( أنا اللي صادفوني حريم مادري إذا في منهم رياييل ) يمشون ويدعمون ولا يهمهم يدشون عرض , يكفخونكم بالجنطة المهم تمر بالطول بالعرض بتمر ماتنطر بس الفرق ان كاسبر يدش بالطوف وهالنوع أتمنى يدشون بالطوفة من طفاقتهم

========
لوووووووووووووووووول


ياني ماحب هالمشية .. ياني اطالع اللي مسويها فيها بنظرة خطر ماتطلع عيوني منها .. والمشكله كل مره انطر أحد يتأسف لووول والله اني على نياتي



بس بالنسبة لمشيتي احم احم .. والله مو طاووسية بس نوعي اذا مشيت مااحب اتلفت طبع فيني :)

tweety يقول...

nice
في وايد أنواع بعد بس انت قول ماشالله لا تنظلني :p

kitty
اشرايج انسمي مشيتج يا لذيذ يا رايق ؟
تلبق عليج أكثر

balqees
يا عسى الضحكة ما تفارقج

9ahba
الله يديم عليج الوناسة قولي آمين

عاجل
اشرايك اتوضح لنا هالمشية وتوصفها عشان أقولك إذا في أو لأ
:p

jandeef
ahlain
welcome in my blog & thanx

relax
أنا نفسج فيني هالخصلة اني ما التفت بس اتوقع مالها علاقة طاووسية هذي ثقل والتقل صنعة :p

الـفــــجـــ الــبـــعـــيـــد ــــــر يقول...

عجيبة هالمشيات لوووول

Unknown يقول...

LOOOL

very funny :D

fi sa3at 7areem ma3a ba3ath 3ala 3arth elmamsha matigdreen i66ofeen o bil`3a9ib yamshon...

Fuzzy يقول...

هذا ونتي مالج خلق تكتبين هاهاها

نسيتي مشية الطوفة .. هذي مشيتي امشي واخم اللي جدامي ووراي واللي بايع عمرة يوقف جدامي

Unknown يقول...

صج لاحظت شئ مشترك

انا وايد ادقق على حركات الايد واذا ابى اعرف ان الواحد انحرج والا لا اطالع بلعومه او اطالع اذونه صارت حمرة والا لا

عقد اللهم كافى :))

Fuzzy يقول...

Buy this Book " the definitive book of BODY LANGUAGE " by: Allan + Barbara Pease.

im sure you will like it

tweety يقول...

alfajer alba3eed
هلا والله
حياج الله في البلوق وانشالله دوم تضحكين

night knight
اي صح !!! لا ويصرون انه ولا وحدة فيهم اتحرك جنه ممشى أبوهم
حياك الله خلنا انشوفك مرة ثانية

fuzzy
أهليييييييييييييين
الحمدالله على السلامة صج فقدناك العادة انت اول واحد اتعلق
بس قول ماشالله لا تنظلني
واذا بتروح مكان عطني خبر عشان ما يصدف نمشي صوبك ونبتلش :p

mishari
توني أعرف معلومة الاذن !!! أشوى اللي قلت لي عشان أطبقها
خوش معلومة صراحة تشكر عليها

fuzzy
inshalla i will

غير معرف يقول...

قوطي الروب مو اللي يلبسونه يصيرون جنهم من قبيلة الطوارق بس بدون سيف والا غيرهم ؟ :)

R7eeq يقول...

ههههههههههههههههههههههههههههههههههخ

توتيني مينونه طلعتي
هههههههههههههههههههخ
واي لا بدعتي


عجبتني قوطي روب ,,, واي لا لوعه


واهم شي بيب بيب اموت من الضحك لاشفت هالنوع لول


ونستيني بهالليل لول الله يونسج

:))

the tooth.fairy يقول...

يالللله tweety

نبي بوست يدييييييييد من زمان ما ضحكت

شكلج رحتي الفلم و شوفة شاروخان سوتلج تنويم مغناطيسييي؟؟

ما يندرى

:P

يالله تلحلحي ولهنا على تحلطمج

LonDonY يقول...

مشية البطريق خاصة بالمتان بس في مشية مشابهة اسمها البلنتـي .. مثل البطريق بس خاصة بالوزن الخفيف..
الحلو فيها انها تلقائية من الله.. ما فيها ابداع وتخنبق >> قوطي الروب
انا والله ما الاحظ بالعادة بس صاجه يصير حجابها طامر بشكل مؤرف :/ يعني حلووو جذي ؟؟؟

sOulvOice يقول...

تويتي:*

انا مثلج وايد ادقق بمشية الاوادم بالذات البنات ومشيتي من اكون بروحي تعتبر بيب بيب ,, زيادة على الانواع اللي ذكرتيهااكو مشية العارضة والباليرينا حدها اتينن لاتصيرين سلبية ;p



اما سالفة قوطي الروب اتوقع عشان تثبت الشيلة واكثر شي يسوونها خواتنا الاماراتيات بس الراس جنه طاولة اوتي يصير ,,كلش مافيها حلا الحركة الله يهداهم البنات لو يتمون على الشيلة التقليدية والله احلى مليون مرة واذرب


يلا تويتي نبي منج بوست تحليلين فيه شخصيات البنات من خلال الشيلة ونوع الحجاب اللي تلبسه


تيك كير ياقمر

Si7LeYa يقول...

لوووووووول

صراحه موتيني من الضحك

يعطيج الف عافيه عالموضوع

:)

Fuzzy يقول...

همممم أين أنتي ؟ يالله عن الكسل نبي موضوع يديد .. بس عفية وخري عن سوالف زافين وشاروخان وخازباز وهالاسامي اللي تخرع هاهاهاها

كتبي موضوع عن كل وردة ورمزها :P

tweety يقول...

hamad
انا عاد ما شفت قبيلة الطوارق شيلبسون مع الاسف

r7eeq
يقولون الجنون فنون :) بس أنا شكلي يومين وتطلع لي قرون
عساج دوم مستانسة

butterfly
مارحت الفيلم :(
يا شماتة أبلة ظاظا فيا
انشالله التحلطم مستمر لا تحاتين


londony
شكرا على المعلومات اليديدة راح أثبت عليها هذي بلنتي
أما قوطي الروب مع أنه احتل مركز الصدارة بالتعليقات بس ما اشوف في شي حلو

soulvoice
انتي ويييييييييييييييييييييينج !!!
مطول الغيبات ...والله ولهت عليج
طاولة أوتي !!! لوووووووووووول عجيب التشبيه
انشالله في القريب العاجل نكتب عن الحجابات

si7leya
الله يجعل ايامج كلها وناسة وضحك
ويعافيج ...لا تقاطعينا

tweety يقول...

fuzzy
حسبي الله على ابليسك خازباز عاد !!!
أوخر عنهم كلهم الا شاروخان
:p

the tooth.fairy يقول...

وييي حتى أنتاي؟؟
:P

ولا آنا رحتله

وبعدين آنا ماني فاهمة ليييييش شاروخان من بد العالم بالضبط لييييييش؟؟

sOulvOice يقول...

يابعد عمري والله مي توو


كل ما اشوف شاروخان سيدة اذكرج

الله يجعله من نصيب وحده فينا قولي امين :D

Unknown يقول...

هذي شوي صعبة لكن اللي ماشي ما تدرين هو رايح أو جاي

tweety يقول...

butterfly
ليش أحب شاروخان ؟ سالفة طويلة بس باختصار
يعجبني جدا شكله كرجل
يعجبني أدائه بالنسبة لي ممثل مبدع
عنده كاريزما عجيبة

soulvoice
آميييييييييييييييين
:)

عاجل
لووووووووووووووول
هذا كلامك مالي شغل

Alather يقول...

لول بصراحة ضحكتيني ..
وعلى قولتج قوطي روب.. انا اسميها كائنات فضائية .. او ابو الهول ..

على قولة وحدة تقول.. يعني مادري مو عاجبكم حجم راسكم ..!

المشكلة يشوفونه حلوو .. اوكي موضة بس مو كل موضة حلوة وتصلح لنا..

بعدين ويع شلون بيكون شكلج .. يعني سنة 2006 طلعت موضة ابو الهول فسويت مثلها بعد ست اشهر تغيرت وصارت موضة امم خليني افكر نقول موضة الوردة فوق الراس مثلا (كل شي جايز ) عااد مو حلو شكلج كل ستة اشهر مغيره ومتغيرة علبونه موضة .. تتلونين عشانها وتتعكفين معاها ..
لازم يكون لج موقف ثابت شوي..
لازم تكونين واثقة من نفسج ...
مو كل شي خذيتي وركبتيه على نفسج .. ترى مو كل موضة عنوانها كشخة..

^^ من الحرة اقول هالكلام يعني مادري شالحلو فيها !! ^^


مشاري .. انا اراقب البلعوم بس الاذن ما مرت علي اول مرة ادري انها تصير حمرة اذا الواحد انحرج .. خصوصا ان حواليني متحجبات بس بشووف الوضع : )