الاثنين، سبتمبر ١٥، ٢٠٠٨

جديد x جديد


ياهلا بالضيف ضيف الله ...أحباب الروح إي والله
حياكم ...إي نعم هذا اهو بيت تويتي ما غلطتوا بالعنوان , هذا بيتي اليديد سلمكم الله ...مابغينا نغير الديكور حالنا حال الناس , عساه بس إيوز لكم ...اشتبون بعد فرشنا لكم البلوق ورد وواقفة أستقبلكم بالورد وبأغاني( ياوردتي يا ندية) و (ياورد ين يشتريك) , تصدقون عاد أحس هالمرة الصور تعبر عني أكثر من اللي قبلها لأني في الحقيقة والواقع ما سموني ( سموني مش سمموني ) تويتي نسبة إلى المدعو تويتي الاصفر أبو صماخ ولا يربطني به أي شبه يذكر بل العكس بيني وبينه خلف خلاف بينما أحس إني أشبه وايد صورتي الحالية المعلقة فوق ! ويه مدور وعيون صغار وأحلى شي فيني إبتسامتي المشرقة( إسم الله علي ) مو الطيور اللي قبل أمهات عيون امبحلقة ياكافي أشوفهم كل يوم جنهم يحروني بعيونهم اللي جما ساعة الربان على قولة شاعر البواشي .
إنشالله عاد يعجبكم النيو لوك وحياكم الله البيت بيتكم والمكان مكانكم وإخذوا راحتكم وهذا البوفيه المفتوح عزيمة البيت اليديد يايبته لكم من أرقى المطاعم , واللي بييب أحد من أهله يزورنا هم حياهم الله بس بدون عيالكم الله يخليكم مافيني شدة صراخ يهال ولويتهم ...إي كلمة تستحي منها بدها والحق ما ينزعل منه , خو ماترضون فلذات أكبادكم يعلون كبدي .
واللي ما لقى إسمه في قائمة المدعوين !...قصدي في لستة عيال الجيران وسقط إسمه سهوا يذكرني عشان أضيفه ترى جل من لايسهو وكلكم حبايب وغالين علي
عاد وإنتوا يايين اشوي اشوي لا تزلقون بالرخام تونا حاطينه
p:

هناك ١٨ تعليقًا:

Mishari يقول...

والله ونظفت يا مسعد :))

الصراحة طلع ويهج

بس جان نطرتي لى العيد
اعرفج عجوووولة على الفاضي
:))

المهم انتى شلونج قرقعتي؟

Mishari يقول...

يا سلام دايما صايدج اول تعليق والثاني بعد :))

violinist_q8 يقول...

منزل مبارك

وراح اشرب من فنجان الضيف لفنجان السيف :d

Sweet Revenge يقول...

عساه منزل مبارك ,ماشاء الله شرح والالوان مشرقة ومتفائلة.
مشكورة علي الدعوة والبوفية الحلو ونبي بوست يديد بالمناسبة السعيده

عثماني يقول...

مع ان اسمي مو موجود

:(

الا اني عازم نفسي بنفسي

الف مبروك النيو لوك

:)

نون النساء يقول...

يا زين صحون السلطة زينااااااه

:""""""p

عالبركة عالبركة ... عاد هاذي دراعة العيد ولا دراعة رمضان ؟؟؟
هههههههههه

ياعله بلوق مبارك ان شاء الله

ma6goog يقول...

al muhim el mathmoon:)

Purplecious يقول...

و أخيييييييييييييييرا

الحمدلله ما بغيتي!! منزل مبارك

حبييييييييييييته وايد حلوووووو النيولوك

و بعد لنكات و حركات و عيال الجيران لالالالالا مضبطينج عدل
هههههههههه

عاد عفيه جابلي بلوقج مو تهيتينه
ما تحسين انج ودج تقعدين فيه طول الوقت من غيرتيه؟؟

ترى نوله عليج و على سوالفج و مواضيعج.. لج فريه يا تويتي لا تكشتين فينا مره ثانيه مادري ثالثه ماردي رابعه

الواحد ما قام يثبت من كثر الغطات

الكبر شين ياوخيتي هههههههه

غير معرف يقول...

زلقت عند الباب وتوصخت دشداشتي :)

واخذت فوق تحت

مرة ثانية كتبي الارضية مبللة

lawyer يقول...

ياااااااااااااااااازين ريحه الورد
مطييييييييييييبه الفريج كله

شي شي شي


شالكشششششششششششششخه

شالزييييييييييييييييين




لووووووووووونج تايم بيبي

بشريني عنج

THE BOSS يقول...

انا صراحه داش غلط و مضيع
عموما مبروك بلوق فرايحي بس ما عندكم شيشه
وعطني ولعه

على نفسها جنت براقش يقول...

خوش اكل و خوش بخور

منزل مبارك

:)

ترى الوانيت لاحقنى بالخرفان

:q

layal يقول...

كل شي منج حلو
عساه منزل مبارك والله يعطيكم العافيه علي هذا الطباخ الحلو تسلم الايادي
عجبني النيو لوك والخلفيه فله

Kuw_Son يقول...

عساه منزل مبارك
:P

LonDonY يقول...

لا يا تويتي لاااا .. الحيييييين على هالخبة والشغل الززززين..... يطلع البوفيه من مطعمممم :// يالله عاد نبي شغل بيتكم

بعدين انا ماراح اجيك على اسمي .. سيده بدرعم
اموون>> الدعللله شلون صايرر؟؟ p:


بس صراحة صراحة.. النيولوووك حددده امسكككت ونازززك
وايددد حلو وررراقي ما شاء الله.. عليكم بالعافيه الله يبارك لكم..
عساه منزل مبارك وعامر باهله

:))

tweety يقول...

mishari

مسعد !!! وبعد نظفت !؟
غشقالولك بالله أنا قلقة قبل ها بو ميشيل نسينا ماكلينا ؟ نسينا منو كان يلحق الباصات حافي ويحذفهم بحصم ؟
:pppppppppppp

وبعدين تعال يالحزرة إشكثر صارلي أعرفك !؟ وإنت اربع وعشرين ساعة مطيح بمنطقتنا وين قرقيعان البنات !!؟


violinist q8

الله يبارك بعمرك
بالعافية عندنا كل أنواع القهوات
:)


sweet revenge

الله يبارك بعمرج حبيبتي
عيونج الحلوة



عثماني

وي وي واخزياه
سهوا والله سهوا ما انحط إسمك وإلا حشا مو ناسيتك أنا ما أنسى اللي دمهم خفيف وياما سويت حق بوستاتك دعاية

أفا عليك بيتك ومكانك لو مو عازم نفسك جان زعلنا منك



نون النساء

إيييييييه أهم شي السلطات عندي ورانا عيد مانبي ناكل وايد

بعدين نون إنتي عزيزة وغالية عن الإحراجات والتسأل هذي دراعة إثنين في واحد رمضان وعيد لزوم التقشف والغلاء إللي في البلد



ma6goog

ياربي على هالتدقر :(
مانبي منك هدية البيت اليديد لا تخاف

على قولة القايل مضمون حبي لك



Purplecious


شفتي إي والله حابته وايد بس مشغولة بهالمسلسلات والبرامج مالت رمضان سوت لي صداع
بعد عمري يعل ماتفقدين غالي
أنا قاعدة أضبط مسائل حياتي شوي شوي عشان أتفرغ أكثر
ملاحظة : لاتيبين طاري الكبر مابي أتذكر خليني ناسية


محسد

سلامات سلامات خطاك السو
الله يهداك ياينا مبجر اتشوفنا قاعدين نغسل الحوش
الدشداشة لاتحاتي انفصل لك وحدة يديدة حق العيد بعد مرة وحدة


lawyer

لووووووووووووووووير !!!
أنا بذبحج إنتي وين تروحين وشدعوه بلوقج تخشينه عنا ياحافظ
والله ذاك اليوم قاعدة أسولف مع أحد الزملاء عنج وأقوله صج صج فاقدتها هالبنية مو مسموح لج تنخشين


the boss

اشقالوا لك عيوني داش قهوة الفيشاوي!؟
لا ماعندنا احنا ناس مانعين التدخين والشيشة بيتنا يديد تبي تولع روح ولع بعيد وتعال


على نفسها جنت براقش

ياهلا ومسهلا
الطيب لأهل الطيب

ماقصرتي عيوني ليش مكلفة على روحج



layal

ياهلا وغلا
حيا الله اهل البحرين
وين الحلوى واللقاح ؟


kuw son

الله يبارك بعمرك
ماقصرت
:)


londony

ليش الإحراج بعد اهو أكل وخلاص
الا نقول لك ما نعرف نطبخ يعني

درعم أفا عليك وإسمك ترى موجود والشباب ناطرينك بالدوانية عشان تلعبون كوت بوستة
:p

Entrümpelung Wien يقول...

موفقين ... لكل ما هو جديد و قيم

Entrümpelung Wien
Entrümpelung
Wohnungsräumung
Wohnungsräumung WIEN

الربح من الانترنت يقول...

الف شكر على الموضوع الرائع
التسويق الالكتروني
bookmarks