الثلاثاء، يوليو 31، 2007

مصختووووووووووووووووها





من السنة اللي طافت واحنا نعاني من أزمة الكهرباء بالكويت في وقت نتبرع لدول أخرى بالطاقة !


اقطعوا الكهربا واوعدوا بحل الموضوع وتفادي الأزمة ودارت السنة وما شفنا شي تغير وانطمينا


لاموا الناس وقالوا السبب هو ارتفاع الاستهلاك وان إستهلاكنا يعادل ضعف استهلاك الموزمبيق مادري الواقواق !!! وطوفناها

سووا حملة ترشيد وتوعية ماظل عوير وزوير ما حطوه لنا يحثنا على توفير الكهربا وسكتنا


فضحونا بالاعلام بين الدول وصرنا طماشة ونكتة للناس وعضينا على ضروسنا وتحملنا


أزعجونا بالمسجات والاتصالات وهم يقولون وفروا في إستهلاك الطاقة فوروا دمنا بس هم ما شكينا


النواب والوزراء والمسئولين كل واحد طق الجنطة وشلل وخلى الديرة تغلي على صفيح ساخن ما قلنا شي


لكن يقعدون يدزون مسجات يهددون بالقطع ويقولون اقتربنا من التشغيل الخطر طفوا التكييف !!! لأ عاد مصختوها


قولوا من الاول بنقطع الكهربا لا تقعدون تلفون وتدورون على الناس وتحملونهم ذنب سوء إستغلال الموارد والفساد الاداري وعدم التخطيط في البلد وتقولون زيادة في الاستهلاك وترشيد ويا طلابة الترشيد ...يعني جو الكويت بشهر 7 و8 حر ولاهوب وقيظ ما يتحمله الصخر منو اللي يقدر يطفي التكييف فيه !؟ والله لو أحنا من الزواحف ما تحملنا ! البعير اللي اهو بعير ما يتحمل شمس الكويت بهالشهرين يعني حدث العاقل بما يعقل وإن أردت أن تطاع فاطلب المستطاع ...خافوا ربكم وبعدين السنة بالذات بعد الظيم والإنصهار اللي حاش الناس العام كل من شل شلايله وسافر المقيمين كل من راح ديرته وضحى بالامتيازات اللي ممكن يحصل عليها لو إشتغل بفترة الإجازات وكل من بقلبه يقوله إنشالله ماحد حوش , والمواطنين اللي أساسا متعودين على السفر صارت سفرتهم السنة ضرورة ...حتى اللي متردد بالسفر للبنان بسبب الأوضاع الأمنية غير المستقرة مؤخرا إتكل على الله وباعها وراح وبينه وبين نفسه يقول نارك ولا جنة هلي ...

يعني إذا معظم سكان الكويت من مواطنين ومقيمين خارج البلد وين الاستهلاك الزايد !!!؟

يعني بوق وقواة عين


ليش مافي واحد من المسئولين عنده ذمه يطلع ويقول احنا قصرنا بحقكم والذنب ذنبنا على الأقل نحترم فيه صراحته وأمانته

بس ما أقول الا الشرهة على اللي معطيكم ويه


أنا وحدة من الناس ماراح أوفر باستهلاك الطاقة وبشغل المكيفات لأن بدون المكيفات ما نعيش والي عنده غير هالكلام يبلش بنفسه ويراوينا تجربته الحية في تحمل الحر والقيظ بدون تكييف والتشبه بسفن الصحراء وبعدها نفكر نوفر ...

بكل الأحوال قاطعين الكهربا فرجاءا فكونا من لغوتكم وبلاترشيد بلا بطيخ

هناك 33 تعليقًا:

PearL يقول...

برافووو عليج

احس ان ودي اصفق لج


يعني كلامج بالضبط اللي بقلوب وايد ناس بس محد قاعدة يتكلم

ياريت البوست هذا ينتشر بكل مكان

بس عشان يعرفون انهم قثووونا

يعني معقولة قبل فترة يناقشون مع العراق شلون يطورون الكهربا عندهم واحنا يبونا نطفي التكييف


صرنا مسخرة جدام خلق الله

Mishari يقول...

نفسيتى يا توتو بالحضيض من الحر
والله العظيم احس ان راس بينفجر
وحالتى حالة
ادرى انى ما نولدت بسويسرا
لكن من جد الحر يذبح
والقهر بالدوام قوموا وفصلوا التكييف علشان يصلحونه
انقمت بغيت احرق المكتب باللى فيه

ومانى مرشد ولا محافظ
خل يصرفون تذاكر كويت ديبون كويت لمدة شهر مع اقامة و ثلاث وجبات ونادى صحي على ما يخلصون تخنبقهم

TechnoHuman يقول...

yeslam temek :P
yebteeha boog o gwat 3een

نون النساء يقول...

امس طفو علينا الكهربا بالشركة
لمدة ساعه
مادلاي عطل مادري ترشيد هانم
مرت سيرت علينا اشوي
اتعرفين شنو
ضاق خلقي


لكويت هالكبر
خو لاهي الصين ولا اهيه الهند بأوادمها

ونص الأوادم مسافرة
بالله على شنو ترشيد

منو يشغل السخان بهالقيظ
ومنو الحمار اللي يطفي التكييف ويخليه على 25 بالحر والخيسه
منووو منووووووووووو

انزين اشلون اطفيا لتكييف بالغرف الغير مستخدمة إذا كان التكييف مركزي

:/



اسفه
التكييف كل يوم احطه عالعشرة
واللي فيه خير خل يخليه 15
وأبطل الدريشة اشوي علشان يطلع البرد على ذوقي

*^____^*

اللي عنده مشكلة يشتكيني للشرطة


>_>

طائر بلا وطن يقول...

تعليق أول و زيارة ليست بأولى
:)

في البداية ابداء اعجاب بالمدونة و قلمها
من حيف الطرح الموزون و الفكر الموضوعي
و خفة الظل

تحية
:)

:

الله يذكر اللي قال لي هالعبارة بالخير

اثنين يعيشون بهالجو

البعير .. و الضب

أنا حاس اني قاعد اتحور شيئا فشيئا

يعني عقب فترة بتشوفين بالديرة

كويتي بو سنام

و كويتي عكرته وراه يجرها جراً
:p

مرطب حراشف بالجمعيات

بوليش و أصباغ و تلبيس
لوازم لزينة السنام


هههههههه


الحمدلله على كل حال

طائر بلا وطن يقول...

حيث*

بوادر التحور
:(

Mamloo7a Q8ia يقول...

صح لساااانج وتسلم ايدينج على هالبوست
لوعوا جبودنا بملاقتهم
شلون زاد الاستهلاك وماكو احد في الكويت
يعني الجماعه كلش مو لاقيننا يقصون علينا


صاجه يا وخيتي فضيحتنا بأت بجلاجل
في قطر صار شعارهم
شبوا الليت احنا مو في الكويت
تصوري ديرة العز .. عروس الخليج
صارت مطنزة


لا ترشيد بعد اليوم
هذا شعاري من عقب المسج اللي يتني امس يهددونا فيها بالقطع

بالديسار يقول...

سيدتي

فلنسمي الأشياء بمسمياتها

من المسؤول الأول فيما يحدث

قطعاً ليس وزير الكهرباء

الشق عود

kila ma6goog يقول...

ماقدر انام بدون مكيف

خل يسمحولنا الترشيد

AuThoress يقول...

فعــلا ..
بوق وقواة عيــن

من زين التخطيط وسنعه، خطط خمسية وعشرية بس "بالكلام" على قولة غُلام في "درب الزلق"، ماشين فيه والبلد متزحلقة باللي فيها

ليش عندي شعور دائم بأن كل شيء "هنا" مؤقت" بشكل موجع؟؟

في يوم بنشوف "صخة" تشبه يوم الغزو، وإلا إحنا يالمواطنين/ ابناء الارض .. مهيّتين لا "وليّ ولا مِرشد"، وتاركين لنا ورقة صغيرووونة فيها : باي باي :)

تهقون؟

charisma يقول...

مساج الله بالخيير يا ويه الخير

لا صرنا مصخره للى يسوى والى ما يسوى
والشمااته على افا من يشييييل

ومسجات الطنازه تينى من بره على بو نكت وانا اغلى اغلى
اقول صج دنيا اول انا الى ادز المسج اطنز عليهم والدووور الدنيا واتصير المسجات من بره الكويت توصلنى طنازه ونكت على الكويتيين والكهربا

شفتى الدنيا يا تويتى
اااايييه الله كريم

يقولج اليمن حلو ازمتهم
واحنا لى الحين قاعدين
وازمة اليمن نفسنا بالكهرباء
:/

وصج صج ما يبط جبدى الا المسج الى يهددددددددددد
يحرررررررررررر

وتسلم ايدج على هالبوست
:*

violinist_q8 يقول...

الصراحه لازم هالموضوع ينّقل لجريده
من بعد موضوعج اللي نقلوه عن مسلسلات رمضان
---
كنت محافظ على مبدأ الترشيد عشان الكويت وادري اني بروحي ماراح اقدر اسوي شي

لكن بعد تفكير حسيت بغدره كل ما اشوف العداد يزيد ماينقص قلت شكلهم ناوين يقطعونها من زمان جان اخلي التكييف شغال على طول
امرنا لله

تسلم الايادي

بـركـــــان يقول...

احب الثوريين :)


بركان ثائر

حلم جميل بوطن أفضل يقول...

أشوف بايعتها هاليومين و صايرة ثورية

:)

من حر ما في القلب .. أدري

tweety يقول...

pearl

حبيتي والله
لا خلاص عمايلهم السوده اتخلي اللي ما يتكلم يتكلم ..بس يه الوقت اللي اهم يسمعونا لأن فعلا امصخت

انطفي التكييف وغبرنا يبوق ويقب



mishari

ماألومك والله
انشالله جهنم تحرق كل من ما تهمه الكويت

احنا أكثر من مرة يطفي التكييف واحنا انظل نستقبل المراجعين ! مع أن بكل الدول وبكل الاعراف والقوانين لي وصلت درجة الحرارة 50 محد يشتغل بس في ناس الظاهر ناسين ان احنا بشر

أنا من زمان قايلة بنتخبك نبي يعطونا كلنا إجازة شهرين اللاهوب الاعظم 7 و8 وتذاكر وإقامة
نستاهل وغيرنا مو أحسن منا


technohuman

هذا وانت تكنو تقول جذي ! يعني حتى أنت طقت فيوزاتك من الوضع
:p


نون النساء

بالضبط ..عبالهم لاقينا بالسوق يقصون علينا ثلاث ارباع الديرة هاجين وين الضغط !!؟ قولوا احنا بقنا ..نهبنا ..ما اهتمينا
بس لا يبينون حق الناس بره غير هالكلام

من الذكاء الخارق مادري منو قايل لهم احنا بزمن الكنديشه
مالت أقول

tweety يقول...

نون النساء

أنا بشوف منو اللي ناوي على عمره ويشتكي ساعتها


طائر بلا وطن


ونسسسسسسسسسسسستني والله !! حتى أنا أمر عليك وايد وما أعلق ..إنت من المدونين اللي أتشرف بتعليقهم وزيارتهم وإعجابك على راسي

يعني غصب بتخليني أقول الله يعافي الترشيد اللي خلانا نشوفك :p

صاج صاج والله
أنا حاسه إني من فصيلة الزواحف ويبيلي مرطب الحراشف أجسامنا قامت تعاني من التصحر والتبخر والإنصهار !
بس جان زين على كيفي جان صرت حية أم راسين وطبيت بجدر اللي في بالي ...


mamloo7a q8ia

صح بدنج حبيبتي

ما تتصورين اشلون هالشي مضايقني
احنا اللي معروفين بالتطور والحضارة وكنا مثل لباجي الدول صرنا بالاخير !
مو احنا اللي نرضى يصير فينا جذي

معاج لا ترشيد وعلى قولة عاجل نبيها ولعة


بالديسار


معاك حق بكل شي

المشكلة إني وحدة من أبعد ما يكون عن السياسة , لا أحب أتابع ولا عندي المهارة على الكتابه ومخليتها لأهلها بس الأوضاع الأخيرة اتخلينا غصب انتكلم ونطالب بحقوقنا كواطنين مثل ما احنا نعرف واجباتنا


kila ma6goog

أنا ماقدر أقعد حتى بدون مكيف
ويسمحون ما يسمحون كيفهم


authoress

والله الوضع مؤلم ومحزن وماعمري تصورت يصر جذي بالكويت اللي تستاهل اتكون بالقمة بكل شي

طبعا ممكن ...اذا في ناس ولائهم للمادة والمصلحة الخاصة باجر الله لايقوله لو يصير شي بالبلد ونرد بحر وبر أول من يشلل اهم



charisma

هلا وغلا

وااااااااااااي يا كاريزما والله مو هاين على الشماتة حتى بالبرامج يطلعون ناس ما يسوون بيزة ويقولون الكويتيين خل يروحون يحلون مشكلة الكهربا والماي عندهم بعدين يتكلمون ! :(

اتهقين نروح اليمن يعني ؟
:p

ماعاش اللي يحرج
إهديهم إغنية : آآآآآسفة وف لك غيري

tweety يقول...

violinist_q8

ماعندي مانع ينقلونه مع ذكر المصدر
-----

كلنا ممكن نسوي كل شي عشان الكويت بدون مقابل
بس هم لنا حقوق كمواطنين والأوضاع من سيئ لأسوأ نطوف شي ايي شي أكبر ...فعلا ناوين يقطعونها وانقهرت أن ما عندنا مسئول عنده الشجاعة والضمير الحي يعترف بأنهم قصروا بحق الكويت والشعب ..زلا شفنا دراسة جادة أو حل جذري للمشكلة بالعكس صار اللوم علينا احنا ! احنا المقصرين واحنا المذنبين ! وهذا موصحيح اللي في حيل وقوة ما يحاسبنا على تكييف انشغله بعز القيظ يحاسب اللي باق واللي أساء إستخدام صلاحياته واللي ماخطط عدل

الله يسلمك


بركان

حدوني على جذي أنا ثورية على الغلط وما أحب الحال المايل


حلم جميل بوطن أفضل

أي تمردت شسوي بعد , ده أنا شاربة المر من كيعااااااااااني

كل شي ممكن الواحد يتحمله بس حملة الترشيد هذي مهزلة لازم ما تتكرر

اييييييييييي قلبه متروسة
:p

esTeKaNa يقول...

واي يمة يمة اسم الله على اخيتي
ماااااي بااااااااارد شربيه
حسيتج معصبه معصبه
وما تنلامين يا بعد روحي والله
صج فشلونات واخزياه عيل هذي حاله
طول النهار حاطين تلفزيون الكويت ابوي يشوف مشر البورصه وامي عينها على الساعه مالت الاحمال وكل ما وصلت يم الحمره قالت وي وي يا حسرتنا
:(
هذي ديرتنا؟
واخزيااااااااه بس

كلنا وياج لا للترشيد

violinist_q8 يقول...

اليوم طفت الكهربا العصاري كنت بالقهوه قبلها شايف العداد 8767
بس طفت شويه مو وايد

وواحد من الربع يقول امس طفت عليهم الكهربا بالليل

حـ نبدا اللطم

:)

Kuw_Son يقول...

والله من حر ما في قلبج .. ما ألومج ..

الله يعطيج العافية ..

صج مصخت السالفة ..

هي المسألة من ورا الحملة الإعلانية لترشيد .. إلا بس تخفيف الصدمة .. ولا السالفة مطبوخة و الكهرباء ما ردها بتنقطع !!

فوضى يقول...

عيل سمعي هالنكته
هذي اخر نكته متدواله حاليا في قطر


ام تقول حق ولدها
يمه اذا طلعت صك الليت وراك
يرد ولدها
شنو يمه احنا بالكويت؟؟


مضحك مبكي

اجار الدين كشمش يقول...

انا اشووووووووووف
كل من يتهجم على
الحكوووووووووومه
ليششششششششششششش الترشششششششششيد

ابي اسال من هو الي
مااااااااااايدفع

فاتورة الكهرباء
اذا ؟
الواحد ياتوتي لازم يقص
الحق من نفسه
اذا يدفع له كل الحق
بان يقاضى الحكومه
وليس ينتقدها بشده فقط
واذا ما يدفع
يكرمنا بسكووووووته
ويسد حلجه ويحمدربه ان
هالدوله المهتريه
معطييييته واير كهربه
مو بعد كيييبل
كل من صار
عمر بن عبدالعزيز
يشب فانوسه اذا يقرا القران
ويشب فانوس الدوله اذا
قرا رسائل الولاة

مايدفعون فواتير
ويسبووووووون الدوله

اقسم بالله العظيم
ان احترم الدستور وقوانين
الدوله واحافظ على اموالها
وخاصة قانون دفع الكهرباء
من عطاني ابوي بيت
لم تطالبني الدوله ولا فلس
كهربائي

Manooya يقول...

فللللللللته انتي فللللته


تطلعين الي بقلب الواحد غصب

لازم نرشحج رئيسة مجلس الشعب وحقوق الانسان =D

بدعتي =)



اقولج انا صارت عندي عقدة اتوقع باي لحظة بتنطفي الكهربا ونعيش نفس الدول المتاخرة والمحتله

عمار يا كويت .. مسكينه يا كويت

العنتري يقول...

اي والله صح لسانج
بس الحكومة إهي إلي تتحمل وليس الوزير
ولكن ترقبي الوزير الآتي ونرجو ألا يضاف أي إنجاز للعليم إلى الحكومة بل إلى رصيده الشخصي

sologa-bologa يقول...

أحلى شي
وأنا مسافر
إني أتابع

حركة مؤشر الكهربا

:)

وأضحك إذا وصل عند المنطقة الحمرا
وباقي اثنين في المئة من الطاقة


ودمتم بحب وود بالكهربا

hamdool يقول...

وأزيدج من البيت شعر

قبل فتره بسيطه
حكومتنا متبرعه لبناء
محطة كهرباء ضخمه في جورجيا
وقيمتها ملايين تخرع
وتغذي كل المناطق المحيطه


وإحنا الفقاره يعني
عيال السيلانيه

:(

Flirty يقول...

لا و ابشرج

المشكله ما راح تنحل الصيف الياي

لان مناقصه الكهرباء لمواجه صيف 2008 صار عليها مشاكل و صار فيها بوق ولجنه المناقصات وقفتها

لي يومج ماصار شي

جنون إحساس يقول...

آنا مو منقمته من هالموضوع
حتى الدول الثانيه قاموا يرسمون كاركاتيرات عنّا


بس شاطرين مساعدات حق لبنان
وماي حق العراق
وتبرعات حق مادري وين
زين ماقلنا شي ميخالف
بس الأقربون أولى بالمعروف

2 u ALL يقول...

كلام صحيح 200% نعم هناك بعض الأسراف أحياناً بس وين "التخطيط المستقبلي" ومراعاة الأحتاجات والتوسعات المستقبليه وين الدراسات ..!! صج لي قالوا "الكويت" سايره على البركه وبحفظ الله ..!! مره ثانيه "صح لسانك" ..!!؟

سالفة قلب يقول...

انتي اشلوووونج

الحكومة مصخوها بالكهربا ...وانتي غيابج عنا... راضيه عنّه؟

لج وحشه
:*

بـركـــــان يقول...

أدعواجميع أخواني المدونين و المدونات بزيارة الموقع التالي و كتابة فقرة لا تزيد عن خمسة أسطر دعما لحرية الكلمة و الفكر بالكويت ..ادخل عن طريق البريد الالكتروني التالي و اضف مقال باسم مدونتك .. و انشروها لنثبت لهم ان الشعب الكويتي شعب حي لا يهاب الترعيب و الترهيب.

http://q8ifreedom.blogspot.com/


E mail: q8ifreedom@gmail.com


Password: abc123456




FREE SPEECH IS PATRIOTIC


MICHAEL MOORE 2004

tweety يقول...

estekana

كل شي يخلينا انعصب هالايام
مابي ماي بارد ابي استكانة منج كل يوم وانا اصير اوكي


violinist_q8

يقال ان السنة الياية بدال لا يوعدونا بانتهاء الازمة يوعدونا باللطم اللي على اصوله والله المستعان
عسى ما تطفي برمضان بس


kuw_son

صح لسانك هذا اللي بنوصله
الحملة وغيرها مامنهم رغبة فعلية او تحرك جاد لحل الازمة بس عشان يوهمون الناس انهم السبب


فوضى

سمعت وياريتني ما سمعت
عمار ياكويتنا


اجار الدين كشمش


اجار يا بن كشمش ! اشفيك الله يهداك عصبت علينا واتهمتنا بالتجهم على الحكومة والتجني عليها ! لبسنا تهمة بعد :p
احنا ما قلنا نبي كهربا بلاش احنا نتكلم عن المبدأ دولة نفطية متقدمة من المعيب ان تفتقر للتخطيط وتكون لديها أزمة في الكهربا خاصة ان عدد سكانها مو كبير , ماسمعنا هالمشاكل في دول الخليج يعني
الطامة في ان نفتقر للخدمات حالنا حال اي دولة فقيرة بالموارد مو بالسداد اللي اكيد مو عيزانين عنه لكن في سبيل خدمة سنعة

tweety يقول...

manooya

اتهقين ارشح روحي يعني !؟ أخاف يسووني وزيرة ويهددوني بالاستجواب واستقيل

بس ما عليج اذا صرت نائبة أحطكم كلكم سكرتارية بمكتبي ومستشارين ولا اخليكم اتداومون والنواب اللي خبرج مو احسن مني :p

العنتري

أنا مع احترامي للعليم بس ما اشوف سوى اي انجاز يذكر واستغرب عدم استجوابه


sologa

اعمل حسابك السفرة الياية تاخذني مرافق
طبعا تضحك انت بره اشحارك احنا اللي ماكلينها


hamdool

ايييييييييييييييييييه
خلني ساكتة الشكوى لله


flirty

والله هذا اللي باط جبدي معقولة موضوع الكهربا مو قادرين يحلونا لمدة 3 سنين!؟ يبونا انعاني 10 سنين يعني والا انظل جذي طول عمرنا والا شنو بالضبط!!؟


جنون احساس

فعلا الكويت ما تستاهل انخليها حجوة ونكتة بحلوج اللي كنا نتقدمهم في يوم من الايام


2U ALL

هذا اللي بقوله بالضبط ماكو تخطيط ولا رؤية مستقبلية والكويت ما تستاهل كل هذا
صح ابدنك اخوي


سالفة قلب

انا لو اغيب قلبي معاكم وكاله سالفة غير سالفتكم
ماتشوفين وحش بعد قلبي