الاثنين، أكتوبر ١٦، ٢٠٠٦

كيف تطبخ مسلسلا امبراطوريا !!!

لكل عاطل عن العمل أو باحث عما يشغله وقت الفراغ , لكل من ليس لديه أية أهداف ويرغب بتحضير مسلسلا سريعا ماسخا بلا طعم , نقدم لكم الوصفة السحرية الامبراطورية الدسمة ولكن نحذر من انها قد تغث من يأكلها وتسبب له التخمة والحارج و...الغثيان أحيانا

المقادير :
  • متابعة أحد الاعمال المكسيكية المكررة لأخذ لمحة عن قصة المسلسل
  • الاستعانة بأحد اطفال العائلة المتمردين والشياطين ويفضل ان يكون من النوع الذي لا يحب الدراسة وينحاش من المدرسة وذلك لرسم شخصيات العمل وكتابة الاحداث
  • عدد 1 خبيرة تجميل يفضل مختصة بماكياج المهرجين
  • عدد1 مصممة دراريع + كم كبير من الملابس النسائية التي تكشف أكثر ما تستر
  • عدد 4 أكياس طحين ابيض
  • كم من الالون أو صبغ الرش
  • عدد 3 الى 4 لزمات ( كلمة معينة يرددها أحد الممثلين ) أو أكثر
  • عدد لا يقل عن 60 نكتة سخيفة بمعدل كل حلقة نكتتين
  • عدد من 4 الى 5 ممثلات أصواتهم مزعجة ليس لهم علاقة بالفن ولا يملكن أي قدر من الموهبة في التمثيل , يجدن الرقص
  • عدد 6 ممثلين فاشلين ( اللجوء لممثلين أو ممثلات من المعهد العالي للفنون المسرحية أو من ورش الشباب ممنوع منعا باتا ) كي لا تحترق الطبخة
  • عدد 1 دكتور تجميل سكة
  • عدد من 2 الى 3 فيلا سكنية حديثة وعدد من السيارات الفارهة
  • كوبين سخافة
  • عدد 3 أكواب من الدلع الاصطناعي
  • شتائم وكلام بذيء حسب الرغبة
  • مجموعة من الكومبارس ايضا الكمية حسب الرغبة
  • لا بأس بإضافة عناصر من مطربات الدرجة العاشرة
  • فرقة شعبية

الطريقة :

  1. تخضع الممثلات لعمليات تجميل خاصة للأنف ويتم نفخ شفايفهن
  2. تلطخ وجوه الممثلات والممثلين بالطحين الابيض بدلا من كريمات الاساس
  3. تمرغ وجوه الممثلات بالالوان البهلوانية والاصباغ ثم تضاف الملابس والدراعات والاكسسوارات المبالغ بها
  4. تخلط المقادير كلها على بعض ثم تضاف التتبيلة المكونة من الصراخ والسب والنكت السخيفة واللزمات التي يتم ترديدها بمناسبة وبدون مناسبة كما يتم إضافة مشاهد رقص حسب الرغبة ولا بأس بأي نوع من المشاهد الوقحة للإثارة
  5. يترك المسلسل على نار اعلامية وبروباجندا لمدة تمتد الى شهر او شهرين قبل رمضان
  6. يقدم العمل بطبق من احدى المحطات الفضائية ويوزع على صحون اعلانية

وبالهناء والشفاء

فعلا دعواتي بأن يتشافى الفن الكويتي من كل العاهات الدخيلة

ملاحظة هامة : هذا الطبق الفاشل الذي فاحت رائحة احتراقه وأزكمت الأنوف انما يعود فشله لكل من شارك به , صحيح ان كاتبته كويتية وان بعض الممثلين والعاملين به كويتيين الا انهم لا يمثلون سوى أنفسهم فلا يمثلون المجتمع الكويتي ولا حتى العربي والفن الكويتي منهم براء

هناك ٣٦ تعليقًا:

غير معرف يقول...

الله ياخذ فجر السعيد جانها امشوهة صورتنا
بهالايام الفضيلة عسى الله يستجيب

cosimfree911 يقول...

eeee walaaah kalaaamch 100% 9aa7 ehyaa tafahaa 3alaa sa5afaa 3alaa gelat adaab shenoo hal 5al6aa elly etfashel

alyoom wa7ed meen rab3ee so3odee dag 3alii eygooly shenoo hathaa chethee lekwt 9ej
wala alnaas g3ed ta5eth fekraa enaa kelnaa chethee shabaab tafeh oo banaat ray7ean feyhaa hathaa almojtam3 lekwatee yaa fajer alse3eed oo yaa bajee alkotaab altafhean
alaah kaream
anaa agool alsharhaa 3ala kel wa7ed eshtagal aw sa3ad aw mathal hal tafahaa 9ej naaas tafhaaa

Unknown يقول...

واحد كونتينر دراريع انسام
----------------

30
طن ملاقة لكل حلقة طن خاص بها طبعا
----------------

50
جينز ماركة دزني واطيح
و50
ثانية ماركة انا نازل بتيي معاي

و50 ثالثة ماركة الضغاط المحيط

--------

سيناريو بوثلاث صفحات والباقي كيفكم

--------

خام وايد للتحذف على القاع اي كلام
يعني رؤية اخراجية

--------

جمهور كلكجي يقول انه ما يطالع المسلسل
وهو حافظ التفاصيل صم

Jibla Square يقول...

+ جمهور من الهيلق و العقد

Manooya يقول...

لووووول بدعتي =)

بس صاجة والله

انا بصراحة اتابع مو ما اتابع بغرض اشوف لي اي مستوى من الانحطاط بتوصل .. تقدرين تقولين بلاغة شف ^_^"

ReLaaaX يقول...

بلا مسلسلات بلا عوار راس


جابلي لج سما دبي مع الفطور ..ودبي الساعه 12 عقب اخبارهم


فريج وبس


احلىىىىى شي شفته صراحه برمضان كله

sologa-bologa يقول...

هههههههه

خوش طبخة من اجل التخمة وعوار المخ

ونسيتي شي مهم

وهو رعاية بعض القنوات الفضائية لهالنوع من الطبخات يدورونهم دوارة

وايضا في نهاية كل مسلسل
الشكر الموجه الى الجهات اللي ساهمت في انجاح هذا المسلسل

ودائما البداية مع المطاعم
بعدين الخطوط الكويتية
بعدين وزارة الداخلية ومخافر الكويت كلها
بعدها المستشفيات الخاصة كلها

اهم شي ان الكل يتعالج بالجناح الملكي


وجبة رمضانية شهية

Aurous يقول...

6ab`7a 3ajeeba, alwa9fa al-af'9al le3awar alras oo lo3at elchabd!!


ofe3lan e7na netbara men mosasalatha..

ام الحفيز يقول...

تووويتي

والله اني محتررررررررررررررررره البارحه وحده من البنات في مجلس جان تقول توووها جايه من العمر ...وتقول اقعدت جنبي وحده اعربيه وجان تلتفت علي وقالت لي انتي من فين قلت لها من الكويت...جان اتعجب وتعدل قعدتها وترد عليها ليش انتوا بالكويت الحريم يدشوون مساجد؟؟؟ جان ترد عليها هااواواواوا اشقالوا لج مجوووس اكيد نروح المساجد ليش؟ جان تقول نحن في الامارات انتوقع حريم الكويت ما يعرفون درب المساجد من هالمسلسلات الرمضانيه جان ارد عليها هاااوهاااو حريم دبي يروحون مساجد؟؟؟
صــــــــــــــج احتريت

Fuzzy يقول...

الطبخة ناقصها شوية ثوم وبصل عشان تكمل الخيسه

سالفة قلب يقول...

هاهاهاهاها

بدعتي حدج


اي والله صدقتي

ولدي اللي عمره 7 سنين ينقد عليهم


يقوللي ماما شنو اسمها اللي سوت

الامبراطورة!!!

قلت له ليش؟؟؟ يقوللي لانها سوت شي

الكل يقول لاتطالعونه...عيل ليش سوته؟؟

esTeKaNa يقول...

وي يا عل عيني ما تبجيج يا الغاليه
بردتي قلبي


تدرين مرة كنت اسولف ويا واحدة خليجية تقولي والله مجتمعاتنا فيها كل شي ويمكن اكثر منكم،بس الفرق بينا وبينكم ما عندنا مسلسلات تبين هذا الجانب السئ ولا تعلن عنه بهالوضوح كأنه فخر
:(
المشكله في اجيال كبرت وتعودت على هذا المستوى من السخافه وقله الادب
الله يهديهم يارب قولي امين

the tooth.fairy يقول...

tweety shakelha el mosalsalat emsawyatlech araq ..

6alla3tai kil elli eb galbech.

7asafa ma3ndi 3arabi chan ta7achait 3ala ra7ti, bss e9ara7a feech mawaheb dafeena :P

Mohammad Al-Yousifi يقول...

لوول

tweety يقول...

anonymous

نقول الله يهديها أو يبعدها عن طريج الفن جان هذا فنها


cosimfree911

احنا متفقين على مستوى التفاهة والانحطاط بهالعمل بس عاد صاحبك حده سطحي , أعترف المسلسل يفشل بس ما يجوز نحكم على مجتمع كامل من خلال مسلسل !!
عسى عاد بردت جبدي ورديت عليه ووضحت الصورة !!؟


عاجل

لو أدري جان قايلتلك نكتب الموضوع يميع صراحة ملاحظاتك بمحلها ...بس ما تحس ان الخام المحذوف على القاع أدى أحسن من هالممثلين النماين !؟


jibla square

ما أعتقد حتى اللي قلت عنهم لهم ويه يمدحون هالعمل المنحط


manooya

انتي نفس امي تقول بتابع بشوف لي وين بتوصل هالفجر باليراعة والتفاهة
بس انا ما اقدر اتحمل اشوف 3 دقايق مالي خلق اشوف ناس يمثلون بشفايفهم وحواجبهم واستاثم فيهم


kitty

الله يسلمج حبيبتي
مو بس انتي انا نفسج انغث وانقهر من هالانحطاط ! انتي شفتي مستوى الحوار !!؟ مسخرة !! وين ايام الفن الهادف اللي كان يشهد له بالمنطقة ..يو الحين هالمرتزقة يطيحون اسم الفن بالقاع بانتسابهم له
وطبعا التأثير الاكبر على الاطفال والمراهقين لأن العمل يدخل كل بيت الشرهة على قناة الراي اللي ما عندهم شخص مسئول عن مراقبة الاعمال وتحديد ما اذا كانت صالحة للعرض


relaaax

والله في اعمال جيدة فيها قصة حلوة يمكن فيها بعض الاخطاء بس اتهووون
مو هالعمل اللي لا قصة ولا حوار ولا هدف ولا مستوى


sologa bologa

صاج والله
مو بس قنوات فضائية ...شركات انتاج وشخصيات راعية وجهات رسمية تدعم وتفتح المجال لكل من هب ودب للعبث بمستوى الفن الكويتي ونقل رسالة مشوهة عن واقعنا
أنا حدي منحبطة ..أذا ليلحين بتروح النيبار خذني معاك


aurous

اما لوعة الجبد والمغثة وحدة بوحدة ينصحون فيه :P
عساها تحس على دمها وتعتزل وتفكنا


ام الحفيز

الله يحر هاللي قاعدين يحرونا بهالاعمال
المشكلة ان في ناس قلوبهم على جيوبهم مو على ديرتهم حسبي الله عليهم


fuzzy

من ناحية الخيسة فالطبخة خايسة بدون البصل والثوم على الاقل هذيله يعطون طعم بس طبختنا لا طعم ولا لون ولا رائحة


سالفة قلب

شفتي !!!!!!!!!!!
حتى الياهل شهد ان هالعمل اييب اليهد

يحليلي قمت أقول شعر


estekana

الله يبعد عنج البجي ويبرد قلبج دنيا وآخره
هذا اللي نقوله الفن يحاكي المجتمع يؤثر ويتأثر به بس مادري ليش تصر فجر السعيد على الكتابة عن عالم لا يعرفه سواها !!!؟


butterfly

حبيبة قلبي واشلونج ؟ :)
لا الارق مو حايشني الا من هالمسلسل الظيم
شفتييييييييييييييييييييييي
طلعت المواهب لوول


kila ma6goog

انشالله دوم تضحك

QiYaDiYa يقول...

صححححح لساااانج..

لانه صج هالمسلسل ولا غيره كلهم مأساااة بمأسااااة !!


ولا التتفخ الي بالويوه !!

يلوع جبدج لما تشوفنه اصلا !!


اليوم كنت عند وحده من ربعي .. و قاعدين بالصاله فحاطين الامبراطورة اقولها .. ويييع والله جبدي تلوع !!

احنا مو جذي !!
مو بنات الكويت الي يقططون نفسهم على الريايل !!

و ما عندنا خبول لهدرجه !
ولا اوادم ميتين على الفلوي جذي !!

احس كلها اشياء اووفر !!

ترصص بالهدوم الي مادري من وييين !! و تلزق بالرياييل !!

ابوي يقولي اهم بنفسهم قاعدين يفضحون نفسهم !! قاعدين يعرضون واقعهم مو واقعنا !!

والله عاد في بنت محترمة تطلع السكه بقميص نوم على بو بتبطل الباب و الي على الباب ريااال !

حتى لو مو متحجبه !!

بس عاد بقميص نوم !! وين صارت هذي !!


طلب :

باجر الثلاثاء و الخميس ..
حلقة برنامج نقطة نظام !

http://talk.fanateq.com/vb/forumdisplay.php?f=100

عن الاعلام و الفن ..

فجري فيهم ..

احس بقلبج كلام وايد على هالموضوع ;D

Unknown يقول...

تويتى
ـــــــــــــــــــ
مت ونبح صووووووووتى وانا اقول هالمرة الله يعينها على نفسها
شنو اللى قاعد يصير ما ادرى جنا الكويت بس تتفخ براطم
وويوووه مشدودة
ومخدارات
الله يهديهم ويفكنا من هالاشكال

the tooth.fairy يقول...

tweety,

بدون اي سبب

hach :* :*

loco يقول...

e walla ! fajer el se3eed ma adry e9ar feeha ! a3teqeed 5areefat !
akeed 5areefat makoo a7ad eb nafs mostawa el embra6ora el '3abya ! afsha mosalsal sheefta eb ramthan , 6ab3an fee fashleen ba3ad bas hatha ohwa el afshal . fajer l see3eed entahat ma3a enteeha2 mosalsal denya el gway ! 3ogbaha matat maskeena kela a3malha ena el mojtama3 el kuwaiti sekeer mo5adarat wa wa9a5a ! lish etshaweeeh 9ooratna bara ! fee nas ehny eb dubai yes2lony 9eeej 3endkoom cheethy !! sheeno areed ! bas ana ma agool ela 5alha testereee7 a7salaha wa teeg3ad bel bayt ! 5ALA9 RA7AT 3ALIHA !!!!

7osen يقول...

زين تسووين فيهم

عاهات ،، شكلها فجر السعيد شايفه فلم مصري قديم وناقلته ومسويته مسلسل كويتي

قمه السخافه

albandry يقول...

اي واللع فاحت

متنا واحنا نقوول المشكلة الاكبر مو في المسلسل ولا في اللي كاتبته ولا الممثلين ولا جم قناة حاطته

المشكلة والطامة الكبرى انه في نا تتابعه
وتطالعه

لا حول ولا قوة الا بالله

لا والادهى والامر محسوبين علينا كويتين

بنت الشاميه يقول...

تصدقون اول مره اكتشف ان الكويت صارت هوليود كلهذا ممثلات عندنا حسبالي ان ماعندنا ممثلات ......يزرعونهم والا وين يلقونهم
اخواتي اخواني لازم ندعي لفجرالسعيد في هذه الايام ان الله يهديهاوتوب وماتكتب لنا شئ السنه اليايه اوتنسي تكتب مسلسل لرمضان................الله يغفرلها

PearL يقول...

وصفتج ناقصة تويتي

بعد ناقص كوب من التمثيل المصطنع
كوب ونص من المواقف والكلمات اللي محد يقولها ( الامبراطور )

و ملعقة ناس مالهم لزمة على حسب الطلب

:)

صج قمة في المسخرة

Nora يقول...

عليج الله يا تويتي نشريها بجريدة تكفين
!

و لو انها تبي الهجوم و النقد عشان تحس انها بطلة و تحت الاضواااااء
!

يعني مطلة بنات الكويت صراحة
(.......)

اللي امي قالت ابييه اخاف بس احنا اللي مو جذي
!!!

تدرين شنو سويت .. عكست المفعول
من اول ما يبدي المسلسل لين يخلص
وانا اقول حق اختي الصغيرة .. هذا مسلسل يورينا الناس المو زينين .. كل شي فيه غلط و عيب .. فااا

حتى ديوومة قامت تستنكر و تجشب
;D

ebdaaaa3 wallah tweety ..

حسام بن ضرار يقول...

انا قلت من الاول ومحد سمعني


حذفوا القناة اللي تعرض اي تبن لفجر و فكوا حالكم



لا تعورون قلوبكم ولاشي

Dakhtour يقول...

Yam3awda 3ayazna o e7na netkalan ena hal mosalsal men awal 7alqa embayen men 3enwana ena atfah musalsal q8y! Emsaweena godfather o yarait 7elo ba3ad!!

Kel el fn el q8y 7ashya aids mo bs a normal disease.. Alah yer7am Drb el zalag o khalty eqmasha o thech el Musalsalt el gashra :)

العين الساهرة يقول...

وفيتى وكفيتى يا تويتى يا بنت امج وابوج، صح لسانج وبدنج على هالوصف الأكثر من رائع، ولكن هل من متعظ؟

lawyer يقول...

والله انج صااااااااااجه

صدقتي

و لا تنسين جم جرشووعه من العربيد


اشووووووووووووووووه اني ما اشووف
بس اعيالنا و الناس كلها تشووف



والله يا تويتي
هالسنه لما سافرت
كل البنات الخليجيات يسألووني

فاطمه انتو الكويتين كلكم كذا زي الي بالمسلسلات؟؟!!!


قلت طبعا لألألألألألأ

و قالت طيب وكلكم بيوتكم كذا مزوقه كنها قصوور
قلت لألأسف هذي مووضه

قالت و كل رياييلكم خوونه
و بصباصيييين

قلت في هذي اصصصصصصصدقت

tweety يقول...

qiyadiya

اي والله بقلبي حجي وايد
لأن شي يفشل وايد ومحسوب علينا
ما ينسكت عنه مصختها وايد هالمرة


mishari

اسم الله على صوتك من البحة , منو يطفرنا بعدين ؟ :p
الشرهة على اللي فاتح لها ولغيرها من عديمي الموهبة المجال ومشجعها انها تقدم اعمال دون المستوى


butterfly

حبيييييييييييييييييييييييييبتي
:*
مشكورة


loco

ما خرفت الا عمتها المادة
وتوقعت انها تقدم إثارة بهالبدع والمسخرة اللي تقدمها , حاطة جم نمونة بتسويهم غصب طيب نجوم
بعدين لا اذا احد اسألك لا تسكت قول لهم ان احنا ارقى من جذي بوايد


7osen

والله ما اعتقد ان في بعالم الفن عمل بنفس هالمستوى المتدني من جميع النواحي الفنية والاخلاقية


albandry

اي والله محسوبين علينا كويتيين للأسف
بس لو قلبهم على ديرتهم جان ما استهانوا بعمل مثل هذا يشوه صورة الكويت عشان الفلوس والشهرة


بنت الشامية

اشدعوه عاد يايبة ممثلات والا يعرفون شنو يعني تمثيل !!
الله يسمع منج الله يهديها وتعتزل ونفتك


pearl

اهو خل يكون في تمثيل عشان يصير في تمثيل مصطنع !
الا في سخافة وقلة حيا


a7la eng

لووول راح أحاول أنشرها
لا حشا اسم الله علينا احنا مو جذي واللي بيناقش الجوانب السلبية في المجتمع ما يناقشها بهالطريقة ..بس اهي ما تعرض مجتمعنا تعرض مجتمع محد يعرفه او سمع عنه الا اهي


حسام بن ضرار

والله ياخوي ما عورت قلوبنا لأن نشوفها حشا ان شفناه صدفة غيرنا القناة بس عورت قلوبنا أن محسوب على الفن الكويتي وهو ردئ فنيا وأخلاقيا , الناس قامت تاخذ فكرة غلط عن الكويت


zizo time

دام بيفتحون المجال حق ي احد يكتب على كيفه اكيد يتدهور الفن
احنا من طلت هالفجر واحنا نشوف العجب وطبعا أكيد بييك تيار يمشي على نفس النهج


العين الساهرة

ياعمري والله ...منكم نستفيد
صدقيني انا من الاول بكتب واقول لأ ما تستاهل بس لما مصخت السالفة قلت ما لازم نسكت عل وعسى يصير في متعظ أو أكثر


lawyer

مادري ليش ما يطلعون شغلات ايجابية او يطرحون السلبيات بشكل محترم

لوول يا حسرتج من الرياييل لي قروا
:p
ادري قصدج بعضهم مو كلهم

sOulvOice يقول...

توتو ماتلاحظين الكاتبة العظيمة دايما تختار الاطفال واتوظف ادوارهم بقلة الادب وطولة اللسان عالاهل؟؟


السنة اللي طافت وهالسنة ثبتها





استغفر الله لما اشوف حلقتها جني اشووف بنات ليل مو ممثلات

الله يهديهم ويهدينا

Cr8ivia يقول...

للاسف الاسيف كلامج صحيح :|

توني قبل لا اقرا بوستج بشوي كنت اوري اختي صور الامبراطور و اهوه يلملم شيماء علي و رفيجتها بالمسلسل !!!!

فتذكرنا قصيده اخو الكاتبه النائب السابق الموقر
اللي عن البدو و دينهم و اصالتهم و و و ..

أين انت و قبيلتك و بداوتكم دينكم و أصالتكم و عاداتمكم و تقاليدكم عن ما جادت به قريحه اختك الموقره لاتحاف المجتمع الكويتي؟

elq87obi يقول...

تويتي يبلج صفقه قويه على هالبوست الحلو

موضوع قمه في الروعه ضغطتي على الوتر الحساس

بالفعل مسلسل هابط و الفظه نابيه و بذيئه و منتهى قله الادب

بصرااحه من كثر ما مدحوها شكلها ينت الله يكفينا شرها

انا خابر الناس لا امدحوهم يبدعون و مو يعفسون الدنيا و يقعدون :)

يعطيج العافيه على البوست الحلو

و للامام

سلاامز :)

Warda يقول...

9ajaaaaaaaaaaa kalamech kella 3adel ib 3adel :) I hope that someone can forward this post to her so she can read it !! bs il mushkella il nass ili dar madar-ha ili im-majdeeen-ha ma adri 3ala shenoo !! il 9ara7a ehya insana mostawa-ha wa6i oo mosalsal-ha ma yede3l ela 3ala il mostawa ili ihya feeeh "HABE6" هابط!!

Mamloo7a Q8ia يقول...

الحمدالله ان الله فكني وما شفت ولا مسلسل من اللي عرض في رمضان وما حاشني تلوث سمعي ولا بصري ولا فكري

عيدج مبارك مقدما وشهالكشخه شحلات اجناطج

daktara يقول...

طيب هل الطريقة تختلف علشان اطبخ فيلم اسطوريا ولا الاتنين واحد

tweety يقول...

soulvoice

امبله سوسو لاحظت مع الاسف
دايما لازم ياهل بيعاري لسانه طويل مع الكبار ..عبالها فخر

ايييييييه الممثلات اللي اتييبهم الله بالخير ولا وحدة فيهم تمثل ياين للعرض فقط لا وكل سنة تطلع لنا نمونة يديدة الله يهديهم بس


cr8ivia

اولا اش هالنك الكرييتيف حده :)
للأسف انه هالصور انتشرت وايد انا اصلا ما اتابع هالعمل بس انصدمت لما وصلني الايميل اللي يفشل
لا بتضحكين اخوها ايام ما كان نائب كان ضد الاختلاط والحفلات اسم الله عليه!!


elq87obi

تسلم ايد اللي صفق ,,مشكور
والله من حر مافي قلبي
احنا اللي اول يحجون عن مستوى الفن والثقافة عندنا يطلعون ناس عديمي الموهبة والذوق يخلون المستوى ينحدر للحضيض بخرابيطهم


warda

ما اعتقد انها ما تدري بس وصلت لمرحلة قامت تكابر وتعتقد انها فوق مستوى النقد لأنها مبدعة ! مالت عليه من ابداع فعلا المستوى اللي تطرحه هابط جدا من جميع النواحي


mamloo7a q8ia

زين اتسوين الله يحبج
ياعمري أيامج سعيدة وعساج من العايدين الفايزين
شفتينيييييييييييييييييي
اهم شي وردة فلونة مالت الصمدي لوول


dektara

اهلاااااااااااااا د. خالد
كل عام وانت بخير
هو ممكن بس ما انصحك