الاثنين، أكتوبر 02، 2006

سلم تويتي يالله خلها لأمها يالله



القرقيعان سنة بعد سنة بدا يفقد طعمه وتميزه , ماكو يهال يطقون الباب يقرقعون نفس قبل واذا بالغلط صارت الفلبّن يغنون بدالهم ! ولا فيه ذكريات ومغامرات يتراولي أن اليهال هالايام ما يعرفون شنو يعني قرقيعان أصلا!
فصار القرقيعان مناسبة ثانية يتنافس فيها المخابيل من خلق الله بمنو يوزع أكشخ قرقيعان حق عياله وطبعا لازم كل سنة فنتق يديد , أعرف ناس من قبل رمضان وهم يفكرون بديزاين حلو وكشخة محد سواه من قبل عشان قرقيعان عيالهم مع ان عيالهم اعمارهم ما كملت سنة ! يعني مايدرون وين الله قاطهم ! لأن القرقيعان العادة التقليدية اللي كانت تفرح الاطفال صارت عند البعض ضرب من الجنون والجنون فنون وقلة العقل مصيبة بعض الناس اتخذوه وسيلة لأظهار مستواهم المادي العالي جدا( المقترن طبعا بمستواهم العقلي الترللي) حتى لو كان على حساب ميزانية البيت لأن المهم اهو البريستيج !!
ما علينا ... شنو أبرز ذكرياتكم مع القرقيعان ؟؟

هناك 31 تعليقًا:

ZiZoTiMe يقول...

Ana el awaaaaaaaaal

SnipeeeeeeeeeeeeeeeeeeeeR!!!!!!

el gargai3ab ohwa e6rara bs 3ala kashkha :P

bo9ali7 يقول...

اي والله..الناس مو صاحين..اول مرة اشوف قرقيعان داخل البيت..اذا مو فرارة بالفرجان

Fuzzy يقول...

اي والله ذكريات القرقيعان حلوه ! كنا نسوي فرقة موسيقية نييب قوطي حليب نيدو وعصاية ونطقطق عليه ونسوي ازعاج بالفريج لين يعطونا قرقيعان غصب هاهاها والبيت اللي مو شارين قرقيعان مساكين صراحه يحوشهم غزو وقصف بالصخر والحجارة عشان يتأدبون والسنه اليايه يشترون قرقيعان هاهاها

شطانة صبيان ما عليه

3AJEL يقول...

ما اتذكر شيء مميز يستحق الذكر غير الوناسة
---
الشيء المحزن ان فرحة القرقيعان قتلناها بعد تحولت الى مزاد للشحاطة والفشخرة
يا حسافة

Charisma يقول...

اى والله صار امزامط

واى احنه اهل كيفان اول انقرقع بكيفان يطرى على مع عيال خالتى بنات وصبيان نطلع اشكثرنه
البنات قرقيعان وقرقيعان والصبيان سلم ولدهم يالله ههههههههه ويعطونه المقسوم
والبيوت الكشخه يعطون فلوس يطرى على هههههههههه
بخانق قصيره والصبيان دشاديش ودنابك وقوطى حليب الحديد فاظى يقلوبه ويطقون فيه هههههههههههه
يحلو ذاك الزمان بس

Mamloo7a Q8ia يقول...

قرقيعان وقرقيعان .. بيت قصير ورميضان
عادت علكم صيام ... كل سنه وكل عام

كل شي حلو لعبوا فيه وخربوه ياحلاتنا اول لي طلعنا نقرقع من بيت لي بيت والبودي غاردس اخواننا وعيال العايله ورانا يحرسوننا والله كانت ايام وكنا ننطر القرقيعان بلهفه
اللحين يجي القرقيعان ولا يحسون فيه
حسافه على هالعادات انها تندثر وينسونها اعيالنا

jeningals7723503367 يقول...
أزال أحد مشرفي المدونة هذا التعليق.
ام الحفيز يقول...

انا يطري علي اول في منطقة ام صده
بيتنا الاوليي...واذكر الجدر العووود الي متروس قرقيعان وبيزات وقناطي وجاكليت ابو البقره والبرميد الحار المشرشب والوالده اتغرف وتنجب بجايس العيال...وانا ابي اخذ وامي ماتعطيني تقول هذا حق الي يقرقعون...جان اطلع من الباب ديوان ابوي الله يطول بعمره مع اثنين من اخوواني ورحنا انقرقع على باب بيتنا علشان امي مع حوست اليهاهيل ما تحسن فينا واحنا انغرف من الجدر العود وانا والي معاي مو صيدنا القناطي صيدنا البيزات....وذكرياتٌ عصفت بي
الحين؟؟؟هذا مو قرقيعان هذه هدايه معلبه ومزركشه يتم ارسالها للاهل والاصداقاء وبس

mishari يقول...

يا معودة قبل خيشة وتكفى يهال المنطقة كلهم
الحين
على 400 و500 لى 1000 دينار
مصصصصصصصصصصصاخة
وانا قرررت هالسنة ماكو قرقيعان باحط مال الجمعية بالبيت واللى يطقون الباب ياخذون بسسسسسس

Alia يقول...

الصراحة ولا مرة قرقعت
ولا عيالي عمرهم قرقعوا.. الكبير يستحي والصغير وايد صغير ما يفهم

وعلى العموم ما في ناس تقرقع على البيوت هالأيام .. يعني ما طافهم شي

Fuzzy يقول...

kitty

لوووووووووول ليش الفضايح يعني لازم تقولين ان عيال كيفان تخصص قواطي حليب نيدو لووووووووول

Fuzzy يقول...

أم الحفيز

أم صده :)

يحليلها هالمنطقة .. عسى ما بنوا فوق بيتكم مجمع الاوقاف هاهاها ؟

Nescafé يقول...

اي والله الحين احس القرقيعان صار مالق مومثل قبل، وقليييل اللي يقرقعون قبل كان غير

اذكر كنا نثبت جم بيت لان قرقيعانهم كان مميز كانو يحطون وياه ككاو بوشمسية وككاوات كشخه وفلوس وحلاو بوبقرة عزكم الله كنا ناخذ القرطاس ماله الاحمر والاصفر ونقول انا اشووف الدنيا كلللها حمره ، ولا صفره واختي ريلاكس تحط عين وعين يعني كشخه .. اتوقع الحركه هاذي كانت معروفه عند الكل
طبعاً لما نقرقع كنا نلف المنطقة كلها ما يبقى بيت ما نروح له.. مومن كبر منطقتنا كلها 3 قطع بس مرات نسوي نزول اضطراري ترانزيت على بيت يدي ننزل الحموله ونرجع نكمل

..واذكر موقف يفشششل ليلحين في بالي
!!اكو بيت مرينا عليه مره..ومرتين.. وثلاث
الشايب اللي بالبيت عصب جان يقولنا بسسس جم مره نعطيكم قرقيعان نصرف على عميان ! الله يالفشششله
بس طبعاً قبل ما نندقر وماعندنا فشله لسانه شطووله نقوله لا لا هذا مو احنا ! جذابييييين

والله ذكريات .. اثرتي الشجون ياتويتي

العين الساهرة يقول...

أنا ما قرقعت وأنا صغيرة ، منطقتنا الشويخ كله صخه حتى في رمضان ينامون إمبجر، لكن بعدين رحت قرقعت مع عيالى عن خاطرى ودبتى جدامى حامل، لا وحوشت قرقيعان ، وتسيورة وضيافه في بعض البيوت. في السنوات الأخيرة عاد بعض الأبناء إلي إحياء هذه العادة الجميلة لكن البايخ هالخدم ترز جيسها قبل جيس الياهل؟ بس الأسف بعض الأهل ما يوجه أبناءه إلي إحترام الذوق العام، يعنى لما كنت ساكنة في الروضة كانوا اليهال يطقون الجرس وإحنا نتفطر إشدعوه إمشفح لا والجرس ما يسكت تصير الساعة فوق الثنعش ، شنو ما يعيزون . سنه من السنين جابلوا بيتى يهال كل يوم يطقون يبون قرقيعان، ثلاث أيام نفس اليهال ، بعدين قلت عق ريلى شنو هذول عيال الروضة إمشفح يا حافظ، الحمد لله إنى طلعت من المنطقة وعدت غلى جذورى ومنطقتى الهادية

tweety يقول...

zizo time
لوووول , مبروك عليك المركز الاول
خلاص لك علي ايي اقرقع عند باب بيتكم بالهندي :p

bo 9ali7
اي والله ياختك صار حده مليييييق

fuzzy
لووووووووووووووول
شنو هذا قرقيعان بالاكراه !!؟ حرب شوراع هذي الله يسامحكم ! اشوه انك كبرت
:p

عاجل
أتفق معاك بكل كلمة

kitty
على طاري الاغنية مادري ليش كنت ولازلت اعتقد ان اغنية الصبيان احلى واسهل واونس !

mamloo7a q8ia
كانوا الناس يستانسون باليهال واليهال يستانسون بالدوارة من بيت لى بيت أيااااااام مضت

أم الحفيز
يعني كنت شيطانة شوي وانتي عنونة :p

mishari
زين تسوي والله الله يلوم اللي يلومك
والله يديم الرخص :p

alia
أنا قرقعت بس منطقتنا ماتونس بالقرقيعان كان قرقيعانا بايخ مافيه اكشن

fuzzy
اشفيييييييييييكم يا عيال كيفان على النيدو !!!؟
اشوف يقولون : مع نيدو تنمو الاجيال
لوووول

nescafe
اتصدقين ! اول نفرح ونكشخ على بعض بالكاكاو والحلاو منو عنده اكثر واحلى
عقبال ما أثير الافراح يا نونو بدال الشجون :)

العين الساهرة
احنا بعد منطقتنا مشرف وايد هادية ومليقة بالقرقيعان
بس والله توني ادري شكو بعد الخدم يرزون جيسهم !!!!؟
ذكرتيني مرة واحنا في بيت يدتي الله يرحمها والا اليهال يقرقعون عندنا الله وكيلج كل واحد يصرخ من قمة راسه مادري يعني كل واحد يبي ان صوته اعلى من الثاني ! المهم قلنالهم نطروا ماكو فايدة تموا يصارخون لين شفناهم داشين نص الصالة لوول

ReLaaaX يقول...

شوفي الله يسلمج كنا قروووب اسمالله علينا .. وفيه بيوت اذكرها ليلحين :)


وبيت لقينا عند جرسهم بريعصي قمنا نسميه بيت بوبريعصيه .. وبيت يران يدي كانو يوزعون كاكاو كشخه .. اصلا وايد كنا نحبهم


والحمدلله والشكر عندنا اللي ايمع اكثر اهوا الشاطر ليش مادري ..!؟


وتعالي شوفي الجياس اللي نشوقلهم .. احنا نيمع والكبار ياكلون :) ماكان يعجبنا يالله من فضلك ...



يدي الله يرحمه اول مايدش رمضان قط علينا هالجيسين والا ثلاث ملوت الصيداوي هالكبار ياحلوه ^_^



وووو بعد شنو ياربي ..لووووول فيه بيوت ندلها وندل حتى بيبانها .. اذكر بيت كان فيه 6 بيبان 3 بالويه وثلاثه بالظهر .. ندش من اللي بالويه ونطلع من اللي بالظهر .. يعني انجاز

/-\ ---> هذا اقرب شكل حق الابواب متخيله يعني موديل يحليلهم



امبيه والله حد الذكرياااااات :) ياحلو هالايام

mishal يقول...

سلم تويتي يالله خلها لامها يالله

-
هههه

-
والله للحين موجود القرقيعان على شكله القديم في بعض المناطق بالكويت

لكن بعض الحريم الله يهداهم كرهونا بهالسالفه
لازم تصور العيال ولازم تشتري من الحلاو الغالي ولازم تسوي وتسوي

ليش كل هالكلافه

loco Q8 يقول...

ya zeen ermthan wa el gerge3an bel Q8 :'( estansaw wa salem waladhom yalla ;)

LonDonY يقول...

صارت عند البعض ضرب من الجنون
---------------------------

تدرررين اشمنه ؟؟؟

من زووود النعمة يا توويتي
للاسف قامت الناس تبطر
وتبذخ عاللي يسوي واللي ما يسوى
سواء كان قرقيعان ولا ولادة اسطورية
ولا ولا .. اللي متأكد منه انهم مو عارفين قدر النعمة اللي الله منعم عليهم فيها.. على قولتج ما عندها مشكلة اتقط 400 دينار على قرقيعان
بس اتطق بريك وقت ما تبي اتــبرع
للفقاره والمساكين.. واتحسبها الف حسبة
الله يهدي الجميع وانا اولهم
حتى بدعوتي نحيس مو؟
;p

أُكتب بالرصاص يقول...

طيب
علشان نقدر نشارك معاكم

ممكن نعرف يعني ايه قرقيعان ؟

انا عارفها ..ايوة
بس هي مش واخدة بالها مني

طب حد يقول وانا اقول على طول

بقال تسع سنين باسمعها ومش عارف مين دي؟

sOulvOice يقول...

@@

@@ متى نزلتي بوست


بديت اشك بقواي العقلية كل يوم ادش بلوقج ماشفت البوست هذا


عموما


ماقرقعت بحياتي الا مرة وحده وحسيت روحي سخيفة و مستحية



ياكره اليهال لاقلتيلهم ماعندنا ويردون عليج ويص ويص في بيتكم جعاميص

مال طققققق



مرسووو

albandry يقول...

اي والله صاجة بادي ينقرض هالقرقيعان الله يستر


ماعندي ذكرى معينة بس كنت اقرقع بنية بروحي مع عيال عمي واخواني وناسة حده كله مدللة ويعطوني كاكاو اكثر لاني بنية وحيدة

لا ومايخلوني اغني من خبصة الصبيان

DanDash يقول...

اتذكر قرقعت مرة وحيدة و ماعدتها لانه كنت استحي لول

شقول لج يا تويتي على قرقيعان عيال هل الوقت يوم الاربعا سوينا حفلة قرقيعان بمدرستنا ولا يطوفج الامهات شملبسين عيالهم و بناتهم الي ملبسته مهراجا !!! و الي ملبسه بنتها اسباني و مسيوه شعرها كيرلي @@

حلات القرقيعان بالدشداشة و البخنق بس شتقولين

arwa يقول...

بصراحة مااعرف القرقعان بحد ذاته
لايوجد في منطة الغربية من المملكة
لكن ..اعرفه من التلفاز واستطيع تخيله
استمتعت بقراءة ذكرياتكم
ولاتستغربين تحول التراث لمجال للبرستيج
حنا في الخليج مو تاعبتنا غير الكخة وللاسف مانحس انها موجوده في البساطه
:)
الله يسعدكم يارب

tweety يقول...

relaaax
حلوة ذكياتج ماشالله كله ولا بيت بو بريعصي :p
اتصدقين عاد علج بو قطوه لي شفته استانس ليلحين مع اني ما اواطن القطاوة

mishal
مشكور يالغالي قاعد تقرقع لي :)
عاد انا ودي اشوف القرقيعان القديم قولولي وين باي منطقة خل اروح

loco q8
الله يونسك انت بعد
ويردك ديرتك سالم

londony
اولا : اش هالصورة العجيبة ؟؟؟ عجبتني صراحة
ثانيا : صح لسانك والله صدقت ناس تقط فلوسها على شي فاضي بس عشان الناس يتكلمون عنهم
ثالثا : حتى بدعوتك نحيس ؟؟ الجواب : مو :p

اكتب بالرصاص
لوووول القرقيعان مو وحدة
شوف يا محفوظ السلامة : القرقيعان مناسبة رمضانية قديمة في الكويت عادة تخرج مجموعة من الاطفال الصغار يحمل كل منهم كيس ملون من القماش في يوم 13 و14 و15 من رمضان ويدقون باب كل بيت يصادفونه ( عادة تكون البيوت القريبة او في نفس المنطقة ) فيسألون عن اسماء الابناء في البيت من اولاد وبنات ويغنون لهم
اغنية البنات : قرقيعان وقرقيعان بيت قصير ورميضان عادة عليكم صيام كل سنة وكل عام ويالله تخلي ( اسم بنت صاحب البيت ) يالله خلها لامها الخ

والاولاد : سلم ولدهم يالله خله لامه يالله ويقولون اسم الولد ايضا
بعدها تقوم صاحبة البيت بتوزيع القرقيعان على اكياس الاطفال وهوعبارة عن مكسرات وكاكاو وحلاو الخ
يعني نفس الهالوين او وحوي يا وحوي

soulvoice
سوسو حبيبتي اسم الله عليج اشفيج ؟
يا مأثر عليج الصيام والا الحب ؟ :p
لوووول
اتصدقين انا نفسج كنت استحي اغني بس هم احب اروح لقافة

albandry
عاد اتصدقين اغنية الصبيان انا عندي احلى

dandash
لووووووووووووووووول
صاجة والله ذكرتيني مادري ليش الامهات يهولون بعيالهم لا وتلقين الشعر ابتيه اضغيرة وشعرها بف !!! اذا مو صابغته لها بعد

arwa
لو الله يفكنا من التفلسف والبطر احنا بخير
اما على القرقيعان فانا شرحت حق الاخ اكتب بالرصاص بشكل مختصر
اضيف ان في البحرين يسمونه قرقاعون و في قطر قرنقعوه

Michomeme يقول...

ما عندي اي ذكريات عن القرقيعان لان ماكو قرقيعان بالعراق
:)

بس حبيت اكول رأيي عن الفشخرة والمظاهر، صارت الناس تهتم للمظاهر اكثر من ما تحافظ على تراث البلد بالقرقيعان والعادات والتقاليد الشعبية الاصيلة، والظاهر ماكو شيء يبقى على حاله، كلشي بحياتنا لازم يتغير


دائما مواضيعج حلوة تويتي




ميشو من العراق

kila ma6goog يقول...

اذكر مرة قبل الغزو قررت اني اقرقع عند بيت سمير سعيد و أصور وياه

فخذيت كامرتي و اخوي و ولد عمي و طلعنا نقرقع بالضاحية بس للأسف ضيعت و ما دليت بيتهم:(

barrak يقول...

بكل قرقيعان كان يصير فيني بفاق ويشكلون علي اللي اقرقع عليهم
يسلم هأ يالله خالله لهأ يالله

Manooya يقول...

وووو الله يخلي تويتي الله يخلها لامها ^_^

يالله تيين وياي نروح نقرقع ترى حدي ابي ارد امجاد الطفولة ومغانراتي القرقيعانية

فوقه ؟

tweety يقول...

michomeme
صحيح يا ميشو المظاهر الكاذبة هي شكل من اشكال السخافة وتنم عن سطحية للأسف متفشية في زماننا هذا كالمرض الله يشافينا ويبعدنا عنها
حبيبتي عيونج الحلوة اتشوف كل شي حلو
:)

kila ma6goog
انا لو تقولي الحين قومي قرقعي عند بيت سمير سعيد اروح بدون تردد لا واصور معاه بعد لووول
يالله جان ليلحين بقلبك بس قولي وين ونروح :p

barrak
لووووووول
عاد كلش مو وقته البفاق هالحزه

manooya
يا حبيبتي والله تسلمين
يالله انا ماعندي مانع وكاهو كله مطقوق بيودينا بيت سمير سعيد انقرقع عندهم جود يعطينا قرقيعان من الخباز
:p

Alia يقول...

تصدقين عاد إنني عمري ما قرقعت
ماكان شي مهم عندي
وما أستانس أطوف بالفريج وأرقع
مجابل التلفزيون هوايتي منذ الصغر