الجمعة، سبتمبر ٠٨، ٢٠٠٦

i can c it in yr smile !



يقال ان للبسمة تأثير كبير على الناس وهذا صحيح , وفي ديننا الابتسامة في وجه أخيك صدقة كل ذلك لا خلاف عليه ولكن لماذا هناك من أصبح يعول على الابتسامة ويحملها معاني كثيرة وتحليلات واستنتاجات تجعلنا ندفع ضريبة ابتساماتنا !؟
أنا شخصيا يقال عني اني بشوشه شي طبيعي من وحدة كريكرة ضحوكة بالكويتي فأشوف من الصعوبة أن لا أبتسم , الابتسامة عندي تحدث تلقائيا دون اي استعداد , عند السلام , او مقابلة أشخاص أعرفهم أو مصادفة أحد ما تحل الابتسامة لدي محل التحية والترحاب والشكر وأحيانا الاعتذار وغيرها من الامور ..لا أعرف ولكن أنا هكذا لا يمكن أن أذهب لأجراء معاملة في مكان ما دون أن تسبق ابتسامتي سلامي ونفس الحال ينطبق في كل مكان مع اي كان في المستوصف ..في المطعم ..الخ . طبعا مو أمشي وأوزع ابتسامات مثل الهبلة لأ إذا تم حديث بيني وبين أحد ما وموقف ما فلابد ان أبتسم حتى في أحلك الظروف ( حلوة أحلك ) وفي أسوء الظروف فأنا أعتقد أن الناس ليس لهم علاقة بظروفي وبالتالي ليس ذنبهم أن أقابلهم وأنا عاقده الحاجبين على الجبين اللجين . من هذا المنطلق لكم أن تتوقعوا حجم المواقف والمشاكل التي وقعت بها مع أشخاص مو شايفين خير يعتقدون أن الابتسامة تدل على الاعجاب أو ربما دعوة للتعارف أو حتى إشارة للحب !!! ماذنبي أنا إن كان هناك من يفكر هكذا !؟
أتذكر مرة بالممشى وأنا أمشي والا اجبالي 4 أو 5 رياييل يمشون يم بعض يعني مو مخلين أحد يمشي يمهم ولازم امشي على التراب عشان أطوف فواحد منهم استحى على ويهه ومشى وراهم عشان أمر فابتسمت بشكل لا إرادي من غير لا ألف ويهي قصدي شكرا ..أنا ابتسمت ما بغيت الا عمري أخونا في الله يوم يمشي وراي ويوم يوقف يم سيارتي لا بدع قام يلحقني ويحاول يتكلم ويقول رقمه عالهواء مباشره ( هو انت ما صدقت ياعبدالعال!؟ ) ما سوت علينا ابتسامة المشكلة أنه شكله مايوحي أنه مراهق أو صغير بس الطفاقة مالها عمر الظاهر

مرة بالدوام أول ما تعينت أنا ورفيجتي ناطرين رفيجاتنا يطلعون من الكافتيريا ومجابلين الدريشه اللي تطل على مبنى حاليا هو فندق وقتها كان ليلحين ينبني ونحش فيه التفت والا رفيجتي هادتني ورايحة اتسلم على مادري منو ووراي موظف قاعد يضحك أني أسولف بروحي فابتسمت مادري ليش يمكن من الفشلة بعدها بيومين والا هالزميل يدق على مكتبي يسلم ! ما أعرفه ! انزين انشوف آخرتها وفجأة أسمع وقع الكلمات الثقيلة : أنا معجب وودي أتعرف وأعتقد انج اتبادليني الإعجاب !!! رديت وأنا عيوني طالعة جنها عيون هالطيور المبققة في بلوقي : عفوا ؟؟؟ جان يقول أي ذاك اليوم ابتسمتي لما شفتيني !!! ياسلام والله ثقة

في لبنان تحديدا في بحمدون وأنا اسولف مع أحد المسئولين اللبنانيين في ريسبشن الفندق وكان يسأل عن الكويت فابتسمت وأنا أسولف طبعا أهو اللبناني عادي ماكان في مشكلة المشكلة بواحد من المشافيح اللي يسافرون عشان التحرش والتعرف على البنات الحمدالله والشكر والا يقول : المفروض تبتسمين حق ولد ديرتج أولى !! نظرية العنصرية حتى في الابتسامه

ومرة واحد من المراجعين عرفت من اسمه أن أبوه دكتور في الجامعة سبق أنه درسني وانا كنت أحترمه وايد وأعزه فابتسمت وٍسألت عنه وقلت له يسلم عليه وانا بكمل المعاملة والا أشوفه يرفع ايده بشكل متعمد عشان أشوف الدبلة !! طنشت ما شفته الا يقول : على فكره ترى انا متزوج !! انزين أنا شكو !؟ ترى أنا سألت عن أبوك عبالك دبت في دباديبك لو سائلة عنك جان شقلت !؟ طبعا ما قلت هالحجي هذا اللي دار في بالي
وغيرها من المواقف العجيبة
اشدعوه يا جماعة الخير ...يعني لازم أمد البوز شبرين وانا أتكلم ؟ منو اللي قال أن الابتسامة تعني الأعجاب في كل الأوقات
!!؟
والا اشرايكم

هناك ٣٥ تعليقًا:

غير معرف يقول...

تووويتي دايما اقول لنفسي لما يتكرر موقف معين واحس اني مو مفهومة من الاخرين سواء لخلل في تفكيرهم او تربيتهم الخ الخ اقوول لازززم اغير طريقتي لاني مااقدر اغير الناس بس قادرة على تغيير نفسي

اذا الابتسامة تتفسر بهالشكل لا والله عني ما ابتسمت لووول وكيفهم خل يقولون قبسة

بشووشة انا مثلج بس مع الغرب اتحاشي ابالغ بالبشاشة واكو ابتسامة عارفة اللي امبينة انها مجاملة بس معناتها:


شكراعالخدمةماقصرت بس لاتشطح


هذي تنفعج بهالحالات




soulvoice

Mohammad Al-Yousifi يقول...

مثل ما قلتي

مو شايفين خير و مشافيح

QiYaDiYa يقول...

نفس الحاله !!

بس ترا المشكله مو فينا فيهم !!


انا عندي اكره موقف لما اكون رايحه عزا .. اقول عظم الله اجركم و ابتسم !!

يكون مو قصدي بس لاني لما اسلم لازم ابتسم لا شعوريا !!

هني اكره عمري احس اني مو قاعده احترم مشاعرهم !! بس والله ما يكون قصدي شسوي !!


و هم موقف بالسوق مع واحد يبيع بالمحل ! مو كويتي بس قتله شكرا و ابتسمت !

ما وعيت الا القمزه شاقه الويه!!
و وصلني لي الباب !!
اعرفك تعرفني !!

lawyer يقول...

صااااااااااااااااااااجه امراض

بعدين يقولون بناتنا شايفين حالهم
و كل وحده بووووووووووووزها شبر!!

elq87obi يقول...

خخخخخخ حلووه و الله :)

ترى في ناس ما شاء الله عليهم الابتسامه ما تفارق ويهم اهمه جذي طبعهم مبتسمين :)

و في ناس لا ابتسمتي بويهم يكيفون حدهم يحسبون هالابتسامه لهم ؟؟ يمكن الواحد توه مجرب معجون الاسنان و قاعد يجرب مفعوله خخخخ <<< مو تبتسمين علشان ما افهمج غلط خخخخ

كلام حلو و الحلو فيه انه من الواقع و هذا اللي يعجبني فيه :)

سلاامز :)

غير معرف يقول...

"ٍسوء فهم الابتسامة"


سوء فهم النظرة



منتشرررررين عند ربعنا

meo يقول...

وينج انتي خل اراجع عندج

layal يقول...

صج صج هذي مشكله منتشره
اذا ابتسمتي معناته معجبه من اول نظره واذا سكتي وله عطيتيهم تعبير وامبرشن
قلوا بل هذي ثقيله وجايفه روحها ومصدقه عمرها ما ادري علي شنو
ضحكتيني بسالفه اللي يرويج خاتمه
ويقولون البنات ما جيفين خير ؟؟

albandry يقول...

eee wala sa7 elsanich

malet kela 3abalhom mayteen 3alehom wayh manchab

makoo ella 3egday elnoona o dayman m3asba

bas tha7akteeny 3al elwla tebtasmeen 7ag weld deertech

:)


keep smiling o ta`7theen ajer

Alia يقول...

آنا شخصيا من اللي يقولون عنهم شايفين روحهم وما يبتسمون
بس والله مو غرور .. وجهي شذي شسوي
ما اعرف اضحك علطول احس روحي شني هبلة
ولو انني احسد الناس اللي يقدرون يضحكون وبشوشين علطول (زي حلاتك يعني) بس انا ما اقدر .. خلاص تعودت
بعد ما شاب ودوه الكتاب يعني؟

بس عجبتني سالفة تبتسمين حق ولد ديرتج أولى ... مو إنت لو صج أولى شان ما قلت هالكلام يا مصرقع

والثاني اللي وراج دبلته ويقوللج ترى انا متزوج .. لو آنا منج شان قلتله : وشنو يعني تبي تتطلق؟

3abeer يقول...

يقولون أن اللي تبتسم خفيفه .. هذا آخر ما سمعت .. وأن الضحك من غير سبب قلت أدب.. وغيرها من الأمثال والأقاويل التي تشجب وتستنكر الأبتسام وتشجع على مد البوز والكآبه .. فعلى كل من هو حاصل على الجنسية الكويتية أن يمد بوزه بقدر المستطاع ليثبت لذوي الآراء العظيمة فيما يخص الابتسامات والمبتسمون والضاحكات والضاحكون أن الحياة لا يجب أن تؤخذ بالضحك والمرح والروح الحلوه والمعنويات المرتفعه واللباقة وحسن التعامل بل يجب أن تكون هم وغم وقساوه وشراسه .. واياكم والابتسام ..


مع تحياتي

اكس مبتسمه

Unknown يقول...

زيننننننن كتبتى بوستى يديد
بس اللى عجبنى هالجملة

أن الناس ليس لهم علاقة بظروفي وبالتالي ليس ذنبهم أن أقابلهم

لان هذى الطريقة اللى افكر فيها

بس عادى الناس بالكويت اذا كنت بشوش قالوا شخصيتك ضعيفة واذا بوزت يعنى انت ثقيل

اقووووووووووول
مااااااااااااالت

Michomeme يقول...

هاي تويتي
بوست رائع جدا وواقعي

دائما الناس يفسرون تصرفات بعضهم بصورة سلبية ويسيؤن فهمنا..

مثل الالابتسامة او النظرة

لكن اكيد اكو ناس يفكرون مثلك ما راح يفهموك غلط..

الممهم انتي تتصرفين على طبيعتك وتبقى الابتسامة مرافقتك دائما..

لان احلى ما بالانسان عدم التصنع...والتصرف بعفوية والابتسامة هذي دليل على التصرف العفوي والبراءة ايضا..

ولا تغيرين في نفسك ابدا

اني اببتسم دائما من اسلم على شخص معين بحيث اتصور اني بالغت بأبتسامتي..لكن اقول اني على هذا الحال وما اغير من نفسي ابد..

ولا يهمك تفكيرهم ابد

تحياتي

صديقتكم
ميشو
من
العراق

Chai-7aleeb يقول...

بالإبتسامه


تحصل على كل ما تريد

هاذى عقيدتى و تجربتى

ما فقدتينى يا كيتى؟

Fuzzy يقول...

جميل انج اخترتي صورة الموناليزا لان هذه الرسمه احتار المختصون في تفسيرها ان كانت ابتسامة او نظرة حزن .. مادري شقول عن موضوع سوء تفسير الابتسامة اللا ان اكو ناس مشافيح مو شايفين خير وهالنوع حتى لو ما ابتسمتي هم بيتحرشون بيقولون طالعتي صوبي او اي سبب ... المهم انتي خلج على طبيعتج مبتسمه وبشوشه والباجي على الله

Manooya يقول...

قوة =)

انا من كثر ما تعقدت من هالهيلق قمت لا شعوريا اول ما ادش مكان فيه عناصر ذكرية اكشر واعقد النونه =\

الا في الحالات اللي اكون فيها حدي مستانسة ساعاتها ماكو شي يقدر يوقف بطريج ابتسامتي الشقاقية لول =)

بلوقج حلو اعجبني خصوصا الطيور اللي فوق اشكالهم لطيفة -_*

the tooth.fairy يقول...

احمممم

مساء الورد

أول شي .. الموضوع جدا يأرقني

الله يسلمج آنا عندي نفس حالتج
Smiling- in a friendly way "at most times" syndrome.

و يا كثر ما تصيرلي سوالف على هالابتسامة اللي بالغلط ابتسمتها

عيل مرة اب تشوكليت بار البدع قاعدة اسولف ويا الوالدة و مندمجة قلت شي ايضحك جان ابتسم حيل يعني ابتسامتي المشهورة لووول ما وعيت لما التفت كنت لي الحين مبتسمة

اللي جدامي ما خلا فرصة ما أشرلي و خزني و سوالي حركات من تحت لي تحت

عباله ابتسمله شين الحلايا لوول
لا جد يعني اشهالسوالف؟

اهم شي اللي تسألين عن أبوه يقوللج ترا آنا متزوج

----------------------
طنشت ما شفته الا يقول : على فكره ترى انا متزوج !! انزين أنا شكو !؟ ترى أنا سألت عن أبوك عبالك دبت في دباديبك لو سائلة عنك جان شقلت !؟
LOOOOOL
------------------------

وبعدين شفيه جاي حليب امضيع .. كيتي منو؟؟

دمت بحب
:*

Unknown يقول...

بالكويتي الفصيح الموضوع محسوم من زمان خلك عقدة النونة احسن يقولون مغرورة موم هم احسن من خفيفة مليون مرة
واحسن من المواقف المحرجة هم مليون مرة

Warda يقول...

صاجه!!!!!!
كل ما ابتسمتي حق واحد عباله انك طحتي في غرامه !!!!!
هذا لو بالغلط تغمزين حق واحد فيهم اشبيصيررررر ؟؟؟

انا ساعات اندمج بالغناء بالسيارة و لما احس بعمري اتلفت اقول عسى بس ماكو احد امثبتني و انا مندمجه بالغناء فكان واحد بسيارته يضحك علي انا توهقت و ابتسمت هم بالغلط من التدوده.... ما سوت علي لحقني لين المكان الي بروحله !!!!!
قطيعه!!

sick people!!

tweety يقول...

soulvoice
ياختج ماعرف اسوي كنترول عليها صراحة

kila ma6goog
اشكرك على تأييدك :)

qiyadiya
اييييييييييييي
انا نفسج عاد سالفة العزا حدها فشلة
والمحلات هذيله بوست بروحه

lawyer
لا كده عاجب ولاكده عاجب
ماعرفنالهم !! انا مرة ثانية بخليج ترفعين لي قضية سوء تفسير الابتسامة

elq87obi
عاد انا مو جني القطة الباسمة امشي واوزع ابتسامات بس لما اسلم على احد او اكلمه احس تلقائيا ابتسم
بس اتصدق شيشتني ..خوش فكرة من باجر بسويلكم دعاية كلوس اب :p
حياك الله على مرورك الاول انشالله مايكون الاخير

soulvoice
قولولولولش غدا الشر يا سوسو
قمتي اتعلقين بدون ال anonymous
ضيفي على اللسته سوء النية

meo
لووووووووووووووول
أخاف انت من هالنوع اللي من بسمته الناس حبته :p

layal
حبايبي والله حاسين فيني
مالت عليه يراويني الخاتم يعني : هاا ديري بالج لا اتولعين فيني ترى انا متزوج

tweety يقول...

albandry
شفتي يختج !! عبالهم ميتين عليهم
وهالأهبل يطالب بتأميم الابتسامات متبع سياسة الكويتي أنفع :p
صح بدنج يالغالية

alia
انا كانوا يقولون عني جذي بالجامعة لأني امشي وما اتلفت والحين لأني ماعرف القي احد ويه الا وانا مبتسمة ما بغيت الا عمري
ما عليج شابوا عدوينج انشالله اذا نويتي بس قوليلي واعطيج كورس
بس شفتي هالخبل اللي يشكك بوطنيتي عشان ما ابتسمت له لوول

3abeer
على جذي عيل انا اول من يسحبون جنسيته !
حياج الله بابتسامة والا بدون:P

mishari
كثر من الاعجاب المشجع أنت كريم وانا استاهل :p
بكل دول العالم اي عمل فيه زباين او مراجعين من متطلباته الابتسامة والاسلوب الحلو وانا دايما جذي لأني انا شخصيا لما اروح اراجع مكان ماحب اتعامل مع واحد منفس والا مبوز بس طلعت على ازيد من بيع السوق

micho meme
احلى شي ان احنا دايما متفقين وفاهمتني على طول
انا اقول نفس الشي دام انها عفوية وصارت جزء من طبعي مالي ذنب بتفسيراتهم
الف تحية لك

chai 7aleeb
انا حصلت على مالا اريد
بس اش هالسجع ! صرت شاعر من ورانا
انا تويتي مو كيتي ترى

fuzzy
اهلييييييييييييييييييييييييين
الحمدالله على السلامة ..تو ما نور البلوق
شوف الموناليزا أسالني انا احنا حريم ونفهم بعض ابتسامتها ابتسامة قهر يا قلبي , كلامك صح المشكلة فيهم مو فيني اهم على طريف الحمدالله والشكر

tweety يقول...

manooya
الله يقويج
يبيلي كورس تكشر الظاهر ..
حلت دنياج ومشكورة على المرور الاول
لا تقاطعينا

butterfly
هلا والله بأميرة الفراشات كلهم :)
اي هاذي وايد اتصير لا ولي كنتي بالسيارة عزة الله موصلج لي بيتكم
شاي حليب اذا صج مضيع فيني بسويه فيمتو حق رمضان :p

عاجل
مغرورة صار لك مدي
بحاكيكي وما بتردي
ياربي ماعرف ..شسوي !!؟

warda
لا يامعودة احنا ابتسامة ومو مفتكين هالمرة غمزة !! ننخطف لوول
ناس عقد الله لا يبلينا

kitty
والله يا زيننا احنا نميز الابتسامات والنظرات والنغزات ...عقولنا كبيرة
شفتيييييييييييييييييييه!!!!
والله بغيت اكفخه بالدباسة مالت عليه وعلى ويهه عباله ميته عليه
لووووووووول على مغطات البيبسي
مرة ثانية بسوي حسابي واحط بالجنطة تحسبا للظروف

غير معرف يقول...

خخخخخخ بعدي بالمنفى بس لانج حاطة خاصية other
فأقدر اعلق



المهم تويتي

امبين طبيعة دوامج لازم تصحبها ابتسامةدائمة الله يعينج مالومج يوم فكرتي تطلعين

هذي وحده من سلبيات التعامل المباشر مع الكستمرز ://


ئوي ئلبك

esTeKaNa يقول...

اييه هذا الويه الصبوحي
ابتسمي وانا اخيتج ولا لج شغل باحد
وهذا بو دبله جان حذفتي بأقرب ما عندج
مشالله عليه واااايد مخلص
عسى الله يهني مرته فيه
:))
وفعلا في ناس تفسر الابتسامة مثل ما تشتهي،ولا تنسين الحريم
بما انه عندنا ظاهره الخز فأنا هابه كل واحده تخزني ابتسم لها
وجم مرة اسمع نفس السؤال:
تعرفيني؟
!!!!
يعني لازم اكون مشبهه واعرفها عشان ابتسم
:)

Maximilian يقول...

لووووووووووووووول

فعلا شي ظريف .. وانا احب البشاشة .. وسالفة تعقيد الحاجبين وتقطيبهم وزم الشفتين مو شي يا خيتي
تحياتي :)

PearL يقول...

بالضبططططططططططط

افف شكثر اقول هالحجي بيني وبين نفسي

شالطفاقة الزايدة
ليش كل ما وحدة ابتسمت شوي قالولي عنها حبت وخلاص
كل واحد عباله صار رشدي اباظة

neelaah يقول...

انا من الناس اللي يؤمنون
بانج لازم تكونين على سجيتج
و ابتسمي مثل ما تبين
و تركي تأويل الناس عنج

لانهم ما راح يعتقونج الا لما تكونين لابسه طاقيه الاخفاء

tweety يقول...

soulvoice
وي عيل يبباي طلع عالهبني :( , يالله ماعليه عقبال ما نيبب لج عروس قولي آمين
لا مو من متطلبات دوامي بس هذي مهارات خاصة فيني محد مقدرها
:p

estekana
لول , صاجه يناشبونا حتى على الابتسامة وتلقينها تسألج عن اسمج واسم امج وابوج وطوايفج الا بتصيد أحد تعرفه
مشكورة حبيبتي على الدعم المباشر:)

cute-q8i
ياهلا والله
شكرا على تشجيعك للبشاشه :)
لا تقاطعنا عاد

pearl
طل بعينهم رشدي اباظة تلاقينهم هالمشافيح حتى ما وصلوا مواصيل اسماعيل يس

neelah
حبيبتي والله
خلاص راح أكمل مسيرتي وشعاري: اشعليا انا من الناس واشعلى الناس مني

lo0ola
الظاهر الناس هذيله عندهم انيميا الاعجاب
حياج الله على مرورج الاول
ولا تقاطعينا

Aurous يقول...

lool
الله يعينج على هالناس

انا برايي اذا صارلج جذي اتقصين ويهم عشان بدل الابتسامة تصير ضحكة
^
^
وحدة نذلة :P


salam :)

The Simper يقول...

*thou shal smile as strong as u can

**thou shal conquer thee with no care

***and thou shal give no damn to them who bother u

****thou shall not fear the reactions of those who are messed up ;)

cosimfree911 يقول...

walaaa anaa goolch ebtasmy oo 9'e7ky estansay malch shegal ebkalaam alnaas elly yamshee waraahom yet3ab oo mayestefead elaa 3awaar algalb
oo mashalaah 3alich 7etaa bel dawam mebtasmaa wain fee mawa9'afaat methlch anaa kel mokaan aroo7 alnafseyaa 5aysaa oo shenaa a7ad met5aang 7etaa loo nebtesam ebwayehom makoo faydaa

alaah ey3ean aljemea3

العين الساهرة يقول...

الحال من بعضو، أنا مثلج كله يقولون ويهج سمح ودايماً مبتسمة، وتعرضت حق مواقف مثلج. الله يعينا. رفيجتى دايماً تقول كلى كشرى لا تبتسمين بس يا رب ما نعرف. ما أقول إلا الله يعينج

العين الساهرة يقول...

تويتى

قولى حق سويل فويس إنى مو قادرة أعلق عندها ، كل ما اعلق يقول لى سورى، شنو القمندة في باسورد معين ولا شنو

tweety يقول...

aurous
لا توصين حريص عاد أنا بروحي على طريف
:p
حياج الله وخلينا انشوفج مرة ثانية

the simper
thanx dear
i will

sarah
صاجة القناع مفيد في هالحالات
اما هذا بو ثقة الاخ اللطيف فحده الظاهر كان مصدق اني بموت عليه
مالت أقول على هالنماين

cosimfree911
thanx 3ala eda3am
sheft 3ad ba5ti ma3ani men elly yebtasmon 7ata bedawam bas ma7ad mqadir mwahbi ;p
7ayak allah 3ala mrorek elawal
la tga6e3

al3in alsaherah
المشكله الناس عبالهم سهل تمشين وتكشرين وتغيرين طبعج
انا اشوف اش سالفة سول فويس واقولج

عاشق مها الكويتيه يقول...

صباح الخير


والله يصير بس لاتكوني مغروره
انا لقيت وحده في بحمدون اسمه مها ما تشوف شباب في عينها ماشاءالله عليها بس
ذبحتني لاني ما تحمل الجمال والغرور والاناقه ويقول

عاده سيئه فينى نحب لي يجافينى@
ومن حبنا عفنها حتى لاونا ميتاً فينى @

وأختها اسمه هبه ياليتني جالس يمها لحين
وألا؟؟؟؟؟؟؟؟؟؟؟؟؟؟؟؟


بس صدق ذبحتني وما اقدر انساها

مع تحياتي ومتناني إلى من جرحني وذهب

وهذا رقمي أنشاءالله تشوفها
009745466640