الأربعاء، يوليو ١٢، ٢٠٠٦

المسج الفلتة

وأنا في البيت استمتع بشبه هدوء بعد يوم عمل يجعلني أحس أني في سوق واجف مو دوام خاصة أن نسمات الغبار العليلة حبستني حبسا أجباريا في المنزل وإذ بصوت خافت يرن ...مسج ! من ترى الذي يسأل عني هذه الساعة ؟ يمكن أحد ولهان ؟ عتبان أو شخص من زمان ما أدري عنه المهم وأنا وحده ماحب الإزعاج رحت أشوف وإذا بي أرى المسج التالي : 0
( تبي تشوف نطحة زيدان في كأس العالم رد 99)
ما تتصورون اشلون عصبت لأني كنت على وشك أنام
منو هذا زيدان ؟
وانا اشعلي اهو من نطح ؟! والا التيس منو نطح ؟ والا منو اللي كسر المنظرة!؟
أنا ما أدري عن الدنيا هوت والا غوت في عالم الكرة والناس اتابع المباريات وأنا في عالم ثاني
والحين ما صدقنا على الله تخلص المباريات دازيلي هالمسج !؟
لا وهالحزة ... الظهر !!!!؟
بعدين تكفون منو اللي ما شاف زيدان وهو ينطح ( مادري منو ) !؟ ماظل جريدة ولا قناة ما حطت الخبر
حتى رفيجتي ( خوخة) شافت النطحة التاريخية ... ولمن لا يعرف ما سبب استشهادي بخوخة أفيده بهالمعلومة
سلمكم الله خوخة هذى رفيجتي وزميلتي في الدوام تشاركني عدم الإهتمام بمباريات كرة القدم خاصة العالمية منهاالا انها تعدتني بمراحل كثيرة في هذا الامر للدرجة اللي تسأل فيها بقية الصديقات : في المباراة الأخيرة كان يلعب معاهم اندر تيكر !!!!!!!!!!!!!!!!!!!!!؟
لوووووووووووووووووووووووووووووووووووووول
يعني إذا خوخه هذي شافت نطحة زيدان ظل أحد بعد ما شاف ؟؟؟؟؟؟؟؟؟؟؟؟
بذمتكم هالاعلانات الظيم لي متى بيظلون يزعجونا فيهم ؟
أنا متأكدة أنه مافي أحد سلم منهم وياريت عاد يعلنون عن أشياء تسوى
والا اشرايكم ؟

هناك ١٣ تعليقًا:

sOulvOice يقول...

hi tweety:)



لووول حدهاامظيعه رفيجتج


مي تو اشاركج عدم الاهتمام بالمباريات بس ادري انه اندر تيكر مصارع مو لاعب قدم ;p



نرجع لمحورنا


حركات ارعه من شركات ماتحترم نفسها وسمعت انهم يطرشون مسجات شغل انشر ولك الاجر


الاجر اللي ايي من وراهم مانبيه;p




مشكووووورة

neelaah يقول...

وايد
مزعجه المسجات الثوله اللي يطرشونها

جان زين يركبون خدمه بلوك
الواحد يستخدمها ضد هالارقام

اووووووووووف

ترى الموبايل
نقمه


بديت ما احبه
ودي اتخلى عنه

tweety يقول...

soulvoice-misso
هلا وغلا بالضيفة دائمة العضوية
عاد هذي سوالف انشر ولك الاجر يبلها بوست بروحه اشدخل الاجر بالمسج يا ناااااااااااااااااااااااااااس

neelaah
نيله بجلالة مكانتها عندنا في المدونه !! يا مرحبا نورك غطى عالكهربا
والله لوفي خدمة جذي بلييييز أحد ياخذ فيني ويه الله ويعلمني عشان ما توصلني هالمسجات الدايخة ,,وانا معاج أني ماقمت أحب الموبايل ما وراه الا الازعاج والمغثة

ReLaaaX يقول...

looooooooooooooool


لأ اما اندرتيكر هذي تحفه ..


الحمدلله فيه اردى مني بالرياضه ;)


اما هالمسجات الشنيعه مااحبها


بس احتريت بالانتخابات توصلهم دعوات الا آنه .. بس توصلني دعوات اللي بالجهرا ليش مادري


مع ان بيتنا بالنزهه والله العظيم

tweety يقول...

ريلاكس
لا في أردى وايد بس الستر زين
أما مسجات الانتخابات فحدث ولا حرج
ومصدقينج يا بنت النزهة بدون حلفان

Fuzzy يقول...

دام السالفة فيها خوخ وزيدان و اندر تيكر .... تذكرت اغنية بفيلم مصري من افلام المقاولات يغني فيها أحمد عدوية اغنية يقول فيها " الحلوه خوخه جت بعد دوخه "
يالله رب ضارة نافعه
يمكن عقب هالنطحة ينتبهون العالم للتفرقة العنصرية والدينية لاني حسب ما سمعت انه نطح الايطالي لانه غلط على الاسلام ! ولو ان اكثر الرياضات اللاعبين يتعمدون يستفزون خصومهم بكلام بذئ بس ردة فعل زيدان كانت كانت كانت صدمة

neelaah يقول...

fuzzy

منين مطلع الاغنيه
عجيبه

عيله تايهه تايهه يا اولاد الحلال
ببلوزة نايلون نايلون
على جيبه بريال

والله نبشت الذاكرة

tweety يقول...

fuzzy
لوووووووووووووووووووول
تذكرت الأغنية بس المشكلة مو في النطحة في اللي سووا منها حدث عالمي
وغثونا فيه
شكرا على المرور والمشاركة

Chai-7aleeb يقول...

ناس فاظيه

tweety يقول...

جاي حليب
ياريت تنورنا منو الناس الفاضية اللي تقصدها !؟

3afoor يقول...

ضحكتني سالفة اندرتيكر
اما بالنسبة لعدم الاهتمام بالمباريات فأشوة عبالي بس انا
زيدان لوما نطحته جان ليلحين ما عرفته ..و بالنسبة حق اعلانات الموبايلات فعما بعينهم ..انا كنت مسافرة أمريكا يعني لما عندكم انتو الصبح انا عندي الفير ..كل يوم منقزني من نومي اعلان من هالعلانات السخيفة

Fuzzy يقول...

neelah & tweety !!
اللي يعرف هالاغنية معناها ان الشيب ترس راسه
هاهاهاها
لو سائلكم جم اعماركم اهون

tweety يقول...

3afoor
على قولتج زيدان من نطحته الناس حبته
:P
اما المسجات فالله يعينج انا اكثر من مرة بغيت اكسر الموبايل والسبة هالإعلانات
fuzzy
اشوه اني فاضحة روحي وبكل شجاعة أدبية كاتبة عمري